《賴永祥講書》

 | | | 轉寄

羅華改造統一書翰文

作者 賴永祥 2006.08.06

賴永祥講書(022)

《羅華改造統一書翰文》，劉青雲著，是chit本漢文尺牘(書翰文)ê指南，特色就是每一文例，lóng kā羅馬字照廈門語音讀，句解kap註釋。上海商務印書館印刷，1925年2月台南新樓書房經銷發行。本文513頁，頭前有序、例言、目錄，後面有附錄。

「書翰文」，tī民國叫做「尺牘」，就是咱日常生活上bōe thang 欠缺ê phoe 信。漢文書翰文ê範例，tùi古早到現今著出chōe-chōe 額數。總是看hit ê組織、索引上嶄然無利便，koh 再bōe 有thang自在獨習，雖然hit中間有註解詳細ê，也是用漢字來解說，所以難免有失落實在。劉君青雲應用新式ê學術，koh利用羅馬字來教寫書翰文，定tio̍h 有解放漢學ê深沉，hō͘ 伊生命新鮮，氣運燦爛.，是未曾有ê快作。...Chiah ê語是鎌田榮吉(曾任文部大臣、慶應大學總長)tī序文所寫ê。

1924年12月，著者tī序文講： 我記得16年前，我tùi台南長老教中學，轉校去日本京都同志社普通部(中學)ê時，無thang去chhē有chit-ê會曉教故土ê字音解說ê先生，也無thang去得tio̍h beh入獨習自在ê參考書，所以m̄-nā讀書上，iū-koh每pái beh舉筆寫phe，大大感覺tio̍h困難，該哉óa靠羅馬字來得tio̍h kap親朋友親戚通信，免失落人情。Tùi-án-ni put-chí感覺tio̍h有考案獨習練達漢文ê字音解說，kap速成習得書翰文ê必要，這就是我著作chit本書ê動機là！另外ài beh 講；chit本書tī形成kap印刷校正ê頂面臨，受tio̍h我ê窗友陳君大鑼，苦心協力，深深表感謝ê意思là。

Chit本書將書翰文分34類，類別按羅馬字ABC讀法順序排列：問候、贈與、招聘、招待、照會、稱贊、請願、請求、推薦、催告、推卻、應諾、返還、家書、介紹、感謝、廣告、慶賀、詰責、勸誘、懇求、女界、辯明、謝絕、謝罪、送別、貸借、弔喪、陳述、忠告、通知、註文、委託、慰問。共有428題ê文例，lóng用羅馬字照廈門語音讀，有句解kap註釋。書翰文分段真明，註有符號數字，讀者thang順序對照「句解」，解說有時無十分明瞭ê時，thang再koh參考「註釋」(附引例)。

附錄有三種：對字音解說有疑問ê時，thang參見附錄(1)同字音義差異kap(2)同字同義無同音；關于書信往來，敬稱謙稱ê樣式，thang參考附錄(3)應對稱呼一覽表。後者最有用，舉一例：咱一般叫阿「公」 (kong)，書信敬稱「祖父」，書信對稱「孫兒，孫女」，對他人謙稱「家祖父」，對他人敬稱「令祖」，去世自稱「先祖考」，去世敬稱「令祖考」。著者是我ê丈人(tiūⁿ làng)，書信敬稱「岳父」，書信對稱「子婿」，對他人敬稱就是「令岳父」了。

著者tī台灣教會公報刊登廣告寫-án-ni：本書特色，內容豐富，句解精確，古典詳明，新語載錄，組織嶄新，索引便利，獨習自在，一目瞭然；請看！學習漢文尺牘ê最經濟法。