《賴永祥講書》

| | | 轉寄

《教會史話》(2_147)柑仔林教會自立待望

柑á林教會mā是台灣上早ê教會之一。根據記錄,1871年1月初8馬雅各醫生主持新起ê禮拜堂ê開幕。Chi̍t-ê教會,後來sóa位,叫溝坪教會,koh-sóa位,叫做永興教會。

馬雅各醫生tī 1871年1月13寫批hō͘母會講:禮拜日(tio̍h是1月初8)早起,góa主持開設柑á林禮拜堂。Chit-ê ē-sái tóe 2百ê,當日參加禮拜ê人大概是1百ê,in大部分參加禮拜lóng有一段時間ā。禮拜堂tī內地ê通路上,tio̍h ē引起路kòe ê村民ê注意,無tio̍h是ē來問天國ê福音。禮拜堂附近,其實無kúi戶。其中一戶(按陳炎)奉獻禮拜堂ê用地,mā提供起厝ê建材。禮拜堂另gōa chi̍t-pêng,有二ê無lōa tōa ê房間,提供hō͘傳道ê人來使用;另chi̍t-pêng有灶kha,hō͘ ùi khah hng來參加禮拜ê人煮晝。一切ê建築費用,包括土地、材料、人工,lóng是in來負擔。In逐禮拜ê奉獻mā有夠用來付禮拜堂ê基本開銷。Koh照教會提供傳道者ê規定來看,chit-ê教會差下多ē-sái講是家己獨立..ē( Self-supporting);希望無lōa-kú ē-tàng lóng家己負責(The Messenger, May1871, p104)。

Lán來翻「台灣基督長老教會設教二一O週年年鑑」,看永興教會ê簡史(冊ê 600頁),大概有講:創立tī主後1877年(按,1871年1月初8已經起堂,所以設立ê日chí應該koh提早)馬雅各醫師ê宣教,陳炎之領教人信,無lōa-kú koh有陳邦、買官、楊每、吳老智等奉教,koh發起協議設教ê tāi-chì,陳炎ùi伊ê藥店獻出一部分chò禮拜堂,教會成立。教會集中tī柑子林,大約10年左右,當時hō͘做柑á林教會。後來教會tâu-tâu-á興旺,信徒增加,禮拜堂siuⁿ-sè,koh有河水ê災難問題,逐家chham-siông……楊每願意獻地,當時改做溝坪教會。1937年因為禮拜堂siuⁿ舊ē漏雨,tú-hó͘ hit時政府規定ài用部落做單位,tú-á-hó͘郭有者,願意kā地賣hō͘教會起禮拜堂,所以hō͘中會吳可免長老設計建造。Kàu 1946年12月,經濟獨立成立禮拜堂後改做永興教會。永興教會chit-má ê地址是:高雄縣內門鄉永興村頂庄5號。

柑á林上早ê信徒是陳炎,同治9年4月初8(1870年5月初8)tī木柵受洗,同治11年11月15(1872年12月15)受設立做長老。光緒19年(1893年)6月刊ê《台南府城教會報》(第99號)有「台南府屬的長老名單」,當時陳炎koh活leh, 61歲。

買蜜tī同治9年7月11受洗,tī光緒5年6月16受封做長老。1917年3月22 kòe-sin,lóng總76歲(《台灣教會報》2286期,1917年5月,頁12)。

《台灣教會公報》 2041期 主後1991年4月14