《賴永祥講書》

| | | 轉寄

《教會史話》(1_093)天主教捲土重來

17世紀天主教初次傳入台灣。1626年西班牙人佔據台灣北部,教士mā隨軍入台,tī雞籠(基隆)、淡水、噶瑪蘭(宜蘭地方)一帶傳教;1641年荷蘭人攻佔台灣北部,教士mā隨軍撤退。

天津條約簽訂了後,天主教士就捲土重來。咸豐8年(1858年),菲律賓道明會(多明我會.Dominican )決定來台佈教,就派郭得剛(Fernande Sainz,一般譯為桑英士)kap杜篤拉(Joseph Duttoras)兩ê神父先去廈門;杜神父因為會曉講華語,著留tī廈門;翌年ê 9年5月15日(1859年6月)郭神父、洪神父(Angel Bufurall又譯蒲富路)kap華籍修士三人教友二名,自廈門來台,5月18日tī打狗(高雄)登陸,22日進入戱獅甲(今高雄市新興區)。M̄-koh過無lōa久兩ê神父著受人民控告,被鳳山縣解送台南府入獄。經過交涉,兩人tī 6月1日出獄。洪神父因為破病著轉去廈門,郭神父tī前金庄(今高雄市前金區)傳教。7月鳳山知縣佈告,嚴禁以土地、房屋貸租出讓hō͘天主教教士;經過交涉了後縣勉強將佈告撤銷。到了10年(1860年)郭神父tī前金庄建立了第一座天主堂。Chit-ê堂原本是一小座,m̄-koh tī同治元年(1862年)就改以紅磚、硓估石kap三合士建造,號名作玫瑰聖母堂。(1928年重建,採後期文藝復與期建築,規模壯大;可惜tī太平洋戰爭中被炸燬,戰後復興,伊pú色ê牆看起來真壯麗,正門頂面koh有掛1864年咸豐帝頒賜「奉旨」牌一方)。Chit-ê堂khí tī愛河高雄橋畔。

咸豐11年(1861年)安東(Marano Anton)神父來台協助教務,所以郭神父就深入萬金庄(今屬屏東縣萬鑾鄉),向群居hit-ê所再ê平埔族人擴大傳教,成績真好,不到一年就得著力力、赤山、加匏朗三社二百外人成為信徒。ㄧ開始有一ê小堂,tī同治8年(1869年)12月正式修建,次年ê 2月8日完工,就是赤山天主堂,今稱萬金天主堂,是台灣現存最古老ê天主堂,所以被政府指定做「台閩地區古蹟」(第三級)。日人藤島亥治郎bat tī「國寶」月刊,推賞介紹hit-ê堂,尤其是真重視伊ê雕刻裝飾帶有西班牙kap台灣混合作法,chit-ê堂tī屏東縣萬鑾鄉萬金村萬興路24號。

重開北部傳教,是何安慈神父(Celedonio Arranz,又譯阿蘭子)tī光緒13年(1887年)tī和尚洲(蘆洲)設教開始,翌年何神父koh tī大稻程(台北)設傳道所。

《台灣教會公報》 1978期 主後1990年1月28日