《生活e5台語，台語e5生活》

 | | | 轉寄

中風了後ê現象

作者 高英男 2007.03.11

我ê丈母Chiong Siù-khêng女士，高雄縣內門鄉埤後ê人， 1947年生。伊出世tī一個基督教(長老教會) ê家庭， 自細漢就接觸教會羅馬字。一直有高血壓ê症頭(血壓平常lóng保持tī 170、180以上)， bōe睏，頭殼gâu gông， gâu暈車，血運無好。1998年年底中風到taⁿ。

Kap平常時siāng款， hit一日透早，我ê丈母早早就過去kám-á店開門做生理。Kap丈人交換班了後，換淺拖準備beh洗衫ê時，發覺伊ê chiàⁿ腳穿bōe著淺拖，tùi腳底開始麻，到手，然後到面，就án-ni發病中風。Kui-ê面lóng歪chhoa̍h去， 大小便失禁。丈人要緊用針鑿丈母ê指頭á，隨chhiàⁿ車送林口長庚病院急救。透過病院ê腦部電腦hip相知影，頭殼內有一塊約略直徑7公分ê血角teh-tiâu leh。

經過兩工ê昏迷，精神了後，我ê丈母chiàⁿ半身bōe tín動mā無感覺， khah心適ê是伊上liàn-tńg ê台語soah bōe曉講半句， kan-ta會曉講北京語nā-tiāⁿ。產生聽台語，講北京語，大舌koh hèng-thi̍h ê現象。譬如講：問伊有khah好勢無？伊會tìm頭應講：『好！謝謝』 (有時伊會摸ka-tī ê手kap腳講：『我的手和腳不能動了』)。教會ê會友來探訪，伊會表示，我禱告讓上帝給我（趕快）好，回家煮飯(我ê丈母真gâu煮食)。用提示ê方式請伊認人，伊會tìm頭回應(『是我的女兒』)。丈人kā伊穿尿chū-á，手勢無順，伊會埋怨嫌講：『你都不會穿』。我ê姨á kā伊飼飯，因為伊半pêng ê面無感覺，致使嘴唇、嘴舌，咬kah流血流滴，伊會反應， siuⁿ過頭大嘴，伊咬無法，以上等等。

Chit種情形約略維持有一個月久。另外，tú-á出院hit段時間，丈母ê目chiu mā有變化，伊感覺看電視ê時， ná親像望遠鏡sa tò-péng看一樣，銀幕變真細。因為丈母真kut力復健，致使伊ê心、身lóng恢復了真緊。

現此時ê伊kap正常人siāng款， kan-ta感覺腳、手會麻、頭殼會暈kap bōe睏ê症頭îⁿ纏伊。另外一方面，我感覺伊tī言語ê表達、反應kap思想，親像早前ê 變竅hiah緊一樣，並無受中風ê影響。心理方面，對伊ê言行用舉止，hō͘阮感覺伊真無安全感，真自卑。這是阮無法度去理解伊ê內心ê所在。M̄-kú我ê丈母ê積極siāng時亦hō͘我有體會復健ê重要。