《生活e5台語，台語e5生活》

 | | | 轉寄

講我美麗又koh生份ê母語─ 聚會使用語言ê省思

作者 徐玫玲 2006.12.10

台灣基督長老教會ê聚會傳統是以母語為主，所以自細漢tī教會中習慣使用台語。Tī學校教育強制boeh kā台語消滅ê時空下學習華語，但放學了後真自然tī厝內學會曉日常生活中ê台語對話，甚至有時iáu真得意聽bat厝內長輩用日語講gín-á m̄是ê談話；tī教會中，則注意聽牧師每週一pái經過幾nā pái構思ê文雅台語，日積 月累，也bōe記得tang時，台語真正成做我ē-tàng流利使用ê語言，當然也成做我認知中ê母語。今á日回想起來，台灣基督長老教會對母語聚會ê堅持，實在對台灣當今母語ê推廣極有貢獻。當然，了後又koh學會曉ê外國語文，則幫助我方便接收真chē資訊，這是我tùi小到大ê語言經驗。

M̄知tang時開始，tī白色恐怖時代堅持使用母語聚會，七十年代m̄驚白話字聖經被沒收ê感動人精神，卻tī解嚴後不敵年輕世代語言ê變遷，紛紛以「傳福音」hō͘少年人ê考量，某種程度soah棄守對母語ê堅持。Chit種ê困境，我也親身體驗過：大cha-bó͘-kiáⁿ tī德國出世，tī回台讀小學一年chìn前，伊tī厝內ē-tàng講正港ê台語，tī幼稚園ē-tàng講同年紀gín-á程度ê流利ê德語，禮拜日去華語教會，也自然講起帶tio̍h德語腔ê華語。Án-ne看起來kah-ná有點á厲害ê狀況，tńg來到台灣完全走樣，因為一接受學校ê認字教育了後，伊腦中ê語言系統全lóng是華語，kap死黨mā lóng是以華語哈拉，m̄-nā無願意講台語，德語也bē記得kah一乾二淨。我終於體會tio̍h學校教育kap同伴團體對孩童語言ê強烈影響，所以tī厝內，我siōng囉唆ê一句話就是：「講台語！」這是我gín-á ê語言經驗。

Bē-tàng否認，每一個世代lóng帶有無仝ê語言習慣kap經驗，家庭中所使用溝通ê語言，是父母文化認同ê選擇，但咱卻常常聽tio̍h阿公阿媽teh講所謂ê台灣華語，為tio̍h是boeh kap寶貝孫á溝通，chiah會有時下流行ê「粉可愛」、「看電ㄙㄨˋ」之類ê詞語出現，父母kap gín-á koh-khah有用台語kap華語互答ê對話。這是一種透過語言所呈現複雜ê文化現象，但是咱是m̄是也tio̍h思考，是誰剝奪了gín-á學習家己母語ê機會？是大人siu°過愛護in, siu°過保護in,或者siu°過以成人ê學習限制來抹煞眾細kiáⁿ ê學習潛能neh? 國家所選用ê語言政策是「政治性」ê考量，常常是為tio̍h鞏固具有權力之統治階級，所以地球上弱勢族群ê語言常有面臨消失ê危機。Á咱ê「信仰」應該phah破無仝語言ê藩籬，tī上帝ê疼內面彼此溝通。但是，「傳福音」卻是kap語言ê使用息息相關，這thang tùi來台灣ê外籍宣教士為著傳講福音ê緣故，用心學習華語或台語ê實例看出。所以，目前真chē長老教會因為「傳福音」之故，tī禮拜日開設兩堂講道ê時，根本無需要考慮就將聚會語言真直接來劃分做一堂華語，一堂台語，美其名是拓展m̄-bat台語ê會友，但實際上，bē少教會因此人數增長ê非常有限，反倒方便無法度早起或禮拜日有tāi-chì ê會友，錯過chit堂iáu有下一堂，省得iáu會接tio̍h關切ê電話！Chit種ê邏輯就ná親像改變聚會ê方式，以所謂敬拜讚美、外表活潑ê詩歌吸引少年人，聚會人數就ē-tàng直線頂升ê速食思考！

東門長老教會結局kap其他長老教會仝款，ài面對聚會語言抉擇ê問題。這是大家應該tio̍h好好祈禱ê tāi-chì,是bē-sái根據「會友民調」來決定chit兩堂是beh用toh一種語言來進行。未來ê chit一步是tio̍h謹慎而且堅定ê!總..是，我只有一個疑問，當咱ê gín-á tī教育部規定ê小三時開始學英文，或如真chē小學tī小一時就偷走教英文，真chē小學生英文真溜ê同時，卻bē曉講家己ê母語；tī教育部全面培植母語教師，推行母語教育，咱長老會顛倒不斷放棄過去ê美好傳統，kap社會虛偽ê高尚語言文化妥協，這代表ê是什麼意義neh?堅持以母語來聚會，是歷經台灣政治長期戒嚴真正「焚而不毀」ê見證，今á日為tio̍h某種重大ê緣由，假定開設了另外一堂華語ê聚會，án-ne kui-ê教會應該iáu是ài有真清楚ê語言堅持，這m̄-nā是tī禮拜日ê聚會，甚至tī主日學、少契、社青等lóng應該鼓勵多使用台語，並請盡量tùi老師、輔導者做起，ná驚只是台語、華語參雜使用，lóng會有真好ê教導作用，致使台語tī教會中ē-tàng傳承落去。現在三、四十歲chiah-ê世代，tī成長階段，其父母基於政治上ê考量，大多數無做講台語ê要求。等chiah-ê世代ê人成做父母，tī經歷「轉換ê母語」(tī學校被要求ê語言替代自然ê母語) 後，當然也忽略了對家己gín-á講母語ê教育。現在母語對真chē人來講，是相當生疏，但請練習講屬tī家己美麗又koh生份ê母語，這並m̄是狹隘ê語言觀念，卻是只有透過對母語ê學習、認同，chiah會清楚知影你是toh一塊土地所孕育ê子民，chiah會曉感恩伊、珍惜伊。台灣長老教會久長以來持守「釘根土地、關懷弱勢」ê信仰觀，正是實踐chit項語言堅持ê信仰告白。