《生活e5台語，台語e5生活》

 | | | 轉寄

第十屆世界台語文化營圓滿結束但....

作者 Chuniok 2005.08.14

由台灣羅馬字協會、成功大學台灣文學系、台南市政府主辦，國語推行委員會、文建會、台灣民主基金會、樂安醫院、台灣南社、長榮中學、台南女中、長榮大學、台南大學語教系協辦ê第十屆世界台語文化營圓滿結束。

Chit屆ê營會主題是「台灣話銷全球─全球化之下台灣語言文化ê國際佈局」，我受邀請做營會主題座談會ê引言人，我以Boston台語進步社所做ê台語文運動kap大家分享。

其他ê座談議題有台語教學現況、語言公平法、台語輸入法、台文創作、台語文運動、台語羅馬字整合等。我mā受邀請將最近完成ê台語信望愛網( taigi.fhl.net)內ê台語工具：台語摘譯台日大辭典、輕鬆台語漢字輸入法、羅馬字翻寫漢羅、華語翻譯漢羅台語等系統展示說明。

各議題內容豐富，學員lóng收獲良多。唯一遺憾ê是「台語文運動」座談會已開始約十分鐘，一位原營會手冊無列入名單ê人來坐tòa引言人「王華南」座位，當伊引言ê時，伊自我紹介講是伊代表台灣長老教會總會張德謙總幹事來參加。續落去由酒井亨(日本人)引言ê時，王華南聽tio̍h kap伊無仝款意見ê引言，馬上tiô起來，大罵「馬鹿野郎」(日語罵詞)，衝向引言台beh phah酒井亨。佳哉身體高大ê主持人阻擋，另外一位kā伊拖出去，koh沿路罵「馬鹿野郎」。身為台灣長老教會會友ê我，看tio̍h chit-ê場面大gōng-gia̍h,總會總幹事thái會派chit款ê人來代表參加世界台語文化營？我真懷疑王華南kám真正有受總幹事ê委派？我感覺真見笑，現場向hit位日本引言人會失禮。