《生活e5台語，台語e5生活》

 | | | 轉寄

《馬偕在台灣》布袋戲DVD發行感恩禮拜

作者 陳幸如 2006.05.21

深受台灣人喜愛ê傳統藝術布袋戲，竟然ē-thang將馬偕博士ê故事刻畫kah[栩栩如生]，吸引老少爭相目睹？！ 無m̄-tio̍h,這是頂禮拜六（5/8）tī雙連長老教會舉辦ê《馬偕在台灣》布袋戲DVD發行感恩禮拜現場實況，會場聚集了100 gōa位ê布袋戲迷，這除了是布袋戲跨出ê一小步以外；也是上帝國宣教史上跨出ê一大步。

感恩禮拜由雙連長老教會陳文欽牧師傳講信息－－「救回失落ê台灣文化」，以尼希米記八章1~3節ê信息，鼓勵koh-khah chē台灣人認同家己ê文化、語言，並繼續將布袋戲chit項傳統技藝發揚出來，創造屬tī台灣人ê驕傲。

會中邀請了羅彭金枝女士（羅榮光牧師娘）、馬偕紀念基金會董事長林建德長老、聖經公會賴俊明牧師、傳播中心蘇燕輝執行長與會致詞。羅牧師娘因tī美國波士頓參訪期間巧遇林俊育長老，聽tio̍h林長老想boeh將馬偕ê故事用布袋戲演出來ê構想了後，深表贊同，回國後隨時將chit-ê訊息傳達hō͘長老教會傳播中心蘇燕輝執行長，也促成了chit次ê合作，伊笑笑á講家己是「媒人」，也特別用客語致詞，展現了台灣多元族群文化ê面貌。

總策劃林俊育長老致詞ê時，特別感謝各界對製作過程中經費ê支援，hō͘伊無後顧之憂，to̍h是tī徹夜錄影ê過程中也無感覺thiám,DVD完成了後，看tio̍h大家ê肯定kap支持，是hō͘伊繼續koh做落去ê力量，伊也已經著手計畫製作《切膚之愛》布袋戲DVD。 主辦單位傳播中心蘇燕輝執行長也感性teh表示：「現在iáu有人願意做文化保存ê工作實在真無容易，咱看tio̍h林長老ê堅持，也真感佩伊對布袋戲、甚至語言文化保存ê熱情kap行動力，本身是一個媒體單位，阮真歡喜來宣布「新眼光網路電視台」將tī六月開播，屆時也boeh播放chit部影片，hō͘全世界ê人lóng ē-tàng透過馬偕ê故事來得tio̍h上帝ê祝福。」

感恩禮拜tī「亦宛然掌中劇團」黃僑偉大師，現場演出馬偕牧師夫婦晚年片段，kap洪約瑟兄弟演唱「最後ê khiā家」歌曲搭配下，將馬偕博士對台灣ê不捨kap感懷深刻表現出來，留hō͘與會者真chē ê感觸。也期待koh-khah chē人願意投入台灣傳統文化ê保存kap推廣工作，將信仰以koh-khah多元化ê方式廣傳開來。