《生活e5台語，台語e5生活》

 | | | 轉寄

分享ê喜樂人生

作者 林俊育 Lîm Chùn-io̍k 2006.03.26

兄弟ah,當然我無實在想講我已經達到chit-ê目標a;不過我一生唯一ê目標就是bē記得後面ê代誌，極力來爭取頭前ê事。所以我為tio̍h boeh得tio̍h獎品，向目標一直走。Chit-ê獎品就是上主通過基督耶穌召我去頂面領受ê永生。(紅皮聖經腓立比3: 13~14)

一年過了koh一年，匆匆進入「不惑之年」。家己內心不時充滿喜樂kap感恩，朋友時時問講：你喜樂人生ê祕訣mā講kóa來聽leh。我回答講：基督ê疼就是分享，分享ê人生充滿喜樂。

上帝hō͘每一人ê恩賜無仝，有五千ê,有二千ê,有一千ê,mā有無夠一千ê,甚至koh-khah少。我感覺我有一千ê恩賜，kan-ta杯á ê五分之一，但是我無怨嘆he空空無物ê五分之四，我卻重視把握所有ê五分之一，充分kap大家分享，結果上帝ê祝福hō͘我ê杯滿出來，所以ē-tàng時時充滿喜樂kap感恩，生命力充足，對有意義ê tāi-chì做起來lóng bē感覺厭倦。

生命力ê源頭是「kap主同工」
二十七歲結婚了後，我開始創業外銷台灣製ê相機，hit時牽手引chhōa我行入教會，也熱心參與教會活動，但無想boeh洗禮。Hit當時講tio̍h相機，lóng是日本製ê天下，我khah àn怎廣告推銷，seng-lí lóng無起色，每工鬱卒過日。有一工新加坡ê客戶來phoe講boeh總代理我ê相機，phoe頭有一句「與主同工」(華語)。Chit張phoe帶hō͘我事業上ê新光景，chit句話也phah開我心靈ê門窗，hō͘我開始研讀聖經，追求基督ê真理。Hit時我三十三歲受洗禮，從án-ne,「kap主同工」帶hō͘我新生命。

「kap主同工」是「無私ê奉差遣」
受洗了後，我帶tio̍h「kap主同工」ê喜樂，tùi關懷盲人開始「奉差遣」ê事工。我tùi四福音書領悟tio̍h耶穌基督ài咱「疼你ê厝邊」，「疼就是tī別人ê需要上看tio̍h家己ê責任」，hiah-ê盲朋友就是我ê「厝邊」lah。我辭掉教會其他五項事工職務，全心投入盲人事工。

1990年，我決定boeh移居美國ê時，盲朋友煩惱失去我對in ê關心。我對in講：「Tio̍h óa靠上帝，m̄-thang óa靠人。」In有kā我ê話聽入耳，in也真giám硬自立自強，我mā受感動繼續陪伴in行過chit段坎坷ê路。結果教會ê盲人事工無因為我出國來受影響，顛倒發展到成立「視障關懷基金會」。

「無私ê奉差遣」tio̍h「向標竿直走」
高爾夫(go-lu-hu=golf)球是我siōng kah意ê休閒運動，因為phah高爾夫球m̄但ē-tàng陶冶身心，iáu ē-tàng領會tio̍h有ná人生歷程ê體驗。高爾夫球果嶺頂ê球洞lóng插一支旗桿來做目標ê指引，thang hō͘咱「向標桿直走」(腓立比3:14)。「過去ê種種譬如昨日死，未來ê種種譬如今日生」，真正ê人生lóng得重新開始，phah過ê一桿已成既定ê事實，mài計較是好是bái,期待新ê一桿hō͘咱重新開始ê機會，ài有「重生」ê覺悟來好好把握每一個揮桿。

我投入每一個事工，lóng kā伊當做是teh phah高爾夫球，「向標桿直走」lóng bē厭倦，充滿喜樂。Hit粒小白球kah-ná咱ê生命體，第一洞球入洞了後，kah-ná完成人生ê第一個目標，tio̍h-koh設定第二個目標，就是kah-ná第二球洞ê旗桿。照án-ne落去，每一個新洞to̍h是我ê「第二春」。Phah完十八洞，kah-ná行完一生，總桿數加起來就是我boeh向上帝交差ê成果。

「向標竿直走」tio̍h注意「情緒傷害十條誡」
我讀過彭德修牧師著作ê《情緒傷害》了後寫一篇「情緒傷害十條誡」刊tī台灣教會公報社第646期(請參觀http://taigi.fhl.net/reading13.hetl)，這是我時時刻刻警醒，來將「惡性循環」ê情緒轉變做「良性循環」，只有tī良性循環ê狀況下，chiah有永續ê喜樂。

「向標竿直走」tio̍h靠「運動」來充電
我三十五歲受選做執事，當時因事業等無閒kah無時間運動，連giâ奉獻袋to giâ beh起來，醫生講我欠運動。Koh聽一位tī體專teh做教授ê長老分享講：「希特勒無ài運動，所以kan-ta想beh thâi人....運動到流汗，用燒水洗身軀了後所做ê決定chiah會正確。」從án-ne,我就開始phah高爾夫、網球、乒乓球、泅水、釣魚、chhū(滑)雪等等，所以我有夠額ê體力kap智慧「向標竿直走」，lóng bē厭倦，koh充滿喜樂，感謝主。(台灣教會公報社第2820期3.13.06)