《生活e5台語，台語e5生活》

 | | | 轉寄

透早ê素描──Khō͘ si-á送報紙ê少年家

作者 翔鈴 2005.07.01

天氣lú來lú寒冷（hân-léng）！逐工透早，可能真濟人若想tio̍h ài tùi sio-sio ê 棉被內底爬起床，就感覺teh beh起ka-léng-sún（打哆索），心肝內可能想講：「若會當kiu ti燒烙ê棉被裡面，m̄免起來tàng冷風，不知beh jōa好leh？」

「Bōe（勿會）當koh nòa tī（賴在）眠床頂啦，為著顧三頓，顧一傢伙ê腹肚，吃、穿、用，天氣koh khah寒（kôaⁿ），嘛是要爬起來，kap伊拚落去！」這是大部分ê人ê心聲。一種有責任感ê阿莎力，但是，ká-ná減一kóa歡喜、快樂ê熱情。

●快樂e kho͘ si-á聲

最近，逐工透早差不多固定ê時間，tī我頭殼iáu渾渾沌沌、iáu未完全清醒ê時，就聽見輕鬆、快樂ê kho͘ si-á聲。每一工hit-e kho͘ si-á ê歌曲攏無仝款，不過，攏是hō͘人聽了真輕鬆ê旋律。聽到hit-ê「美妙」e kho͘ si-á，就想到細漢ê時，老爸kap阿兄、阿姊tî厝裡kho͘ si-á，作伙合音ê鬧熱氣氛，hō͘我原本渾渾沌沌ê頭殼，隨時清醒，kui-ê人精神起來。

「到底是sím-mi̍h人 teh kho͘ si-á？」為著beh看hit-ê人ê廬山真面目，hit日，我特別khah早起床。面洗洗leh、衫換換leh了後，就爬起去樓尾頂。

打開樓尾頂ê門，一káng（股）風吹過來，清涼透心肝，kui-ê人精神清爽起來。雖然日頭尚未完全出來，不過天色已經光iāⁿ-iāⁿ。街仔路，有幾個頭毛已經白kah泛光e歐巴桑及歐吉桑，穿著整齊、同款ê運動衫，有講有笑往附近學校ê方向行過去。我想，in應該是beh去學校練太極拳抑是練氣功吧？真正是注重養身之道ê「快樂銀髮族」。除了chit-kóa beh去運動ê老大人以外，街仔路看起來淡薄仔冷冷清清，無看見半個少年人。少年人攏bih --khí 叨位？我想，可能攏koh kiu tî棉裘被裡面；in-ūi chit-chūn離學生囡仔上課，抑是吃頭路上班ê出門e時間還koh真久leh。

●騎著小綿羊ê廬山真面目

時間iáu真早，我一面做運動，háiⁿ手、伸腳、旋ām-á-kún……，一面斟酌注意聽hit-ê從遠遠傳來e kho͘ si-á聲。 Hit-ê熟似5e旋律從遠遠ê所在傳來，代先親像輕聲細說，後來漸漸接近，轉做熱情有力ê快樂聲調。平平是對同一人ê嘴所kho͘出來ê，互人ê感覺竟然hiah-nih-á不同，真是稀奇！

Kho͘ si-a ê是一個粗勇、親像「相撲選手」ê少年家，穿一件青藍色ê hiû仔，騎著一台紅色50cce「小綿羊」。「小綿羊」ê後座兩邊，報紙載khah tīⁿ滿滿。一種真趣味ê對照。我tī心裡暗暗仔偷笑，也聯想起中古世紀hit-ê追逐自己ê夢、為著beh打倒對敵，不驚面對艱難及危險ê西班牙浪漫英雄──唐吉訶德。這位粗勇ê送報紙ê少年仔，好親像是用他e kho͘ si-a聲，大聲喊講：「我來了！」 看chit-ê粗勇e少年家，一邊kho͘ si-á ，kho͘出快樂ê樂曲；同時陣，手伸到後壁，用mé-lia̍h ê速度，抽一份報紙出來，然後，細膩仔將報紙áu作三áu（折成三折）。Áu好了後，輕輕仔將報紙khǹg入去阮厝邊門腳口ê烏綠色ê信箱。了後，油門一催，「小綿羊」噗噗噗……ê聲音，koh伴著他ê kho͘ si-á聲，漸漸遠去……。

●工作中得到滿足快樂

Tī無tiuⁿ-tî ê時聽tio̍h輕鬆快樂ê kho͘-si-á 聲，引起我ê好奇想beh看chit-ê聲音是出自何方人士。Hit工ê透早，看著chit-ê送報紙e一舉一動，我ê心中tùi伊產生極大ê敬意。每一工，他不nā將全世界e好消息或是歹消息，帶hō͘每一個訂報紙ê人，也將輕鬆、快樂ê心情，透過si-á聲帶出來，感染ho͘每一個聽到他ê kho͘ si-á聲ê人。

對真濟現代人來講，若無賺大錢、住好厝、得到khah好ê地位、有互人欣羨ê名聲，生活實在是快樂不起來。但是，tī這個逐日kho͘ si-á teh送報紙ê少年家身上，我發現，快樂是用金錢買不到ê；人ê品格是高尚或是卑賤，更加不是會當用金錢來chún-chat（衡量）ê。假使，一個人真努力去做一項他所歡喜ê代誌，就算hit項代誌tī別人ē目睭中實在沒什麼，甚至看做卑賤，但是他猶原真拍拚去做，並且心存歡喜，他所做ê代誌，就是一項偉大ê代誌。他tī工作中散發出來e活力與快樂，也會感染ho͘在他四圍ê人。

Hit工透早，我從一個kho͘ si-á ê派報生身上，看見一個tī工作中得到滿足快樂ê熱情，也學習到一項人生ê功課！