《生活e5台語，台語e5生活》

 | | | 轉寄

Tio̍h＝To̍h；Tō≠就(Chiū)

作者 Chuniok 2006.01.01

以前我一直認為 “tō=就(chiū)” ，真chē台語文文章mā是lóng án-ne。最近幫忙整理李勤岸教授ê文集出版，我起先lóng kā伊原來ê “to̍h”改作“tō”，伊kā我講伊最近chiah發現“tō ≠就(chiū)”。我就去查《台日大辭典》，結果是：

1) To̍h [著] ＝[著(tio̍h)]ê(4)(5)(6)(7)(8)(9)kap (11)ê場合mā有發chit-ê音；但泉州系khah chē。 2) Tio̍h [著] ......(4)需要。例：~ 力；beh過去廈門 ~ 一暝一日；起一間厝 ~ 一千銀。(5)表示命令。例： 你 ~ 去！~ 緊來！~ 起--來！lóng ~ 洗！你 ~ khah骨力--leh!你 ~ m̄-thang講！(6)(kap[才(chiah)]對用)若...才...。例：~ 你去才有chhái-kang;~ 先phah定才有穩當；~ 有涵養ê人才有窗做先生。(7)表示他動詞ê動作結果。例： 扭(láu) ~ 筋；犯 ~ 規矩；拾 ~ 銀；thàn ~ 大錢；掠 ~ 賊；得 ~ 家伙。(8) 表示自動詞ê動作結果。例： 接 ~ 伊ê phoe;船靠 ~ 砂；沃(ak) ~ 雨；tú ~ 朋友；見 ~ 頭家。(9)主要khǹg tī副詞、形容詞ê頂面或說明動作ê結果koh附帶條件ê假定。例： 講 ~ lóng是無影；穿 ~ 礙gio̍h礙gio̍h;看 ~ 真súi;食 ~ 真苦；聽 ~ 不止心適。(11)(kap[就]ê(3)(4)(5)仝意思來使用)(a)表示某動作結束真久ê意思。例：未領台以前我 ~ 有kap內地人teh來往；早起天未光我 ~ 來；自古早 ~ 有。(b) 某動作結束了馬上ê場合。例：你tńg--去伊 ~ 來；食一杯酒面 ~ 紅。 (c)說明假定某一項代誌個結果。例： 無顧身命 ~ 會破病；無細膩 ~ 會跋倒；koh一個銀hō͘你 ~ 夠額。

我koh查手內所有ê字典，kan-ta陳修編ê《台灣話大詞典》chiah有 “tō=就(chiū)”，莫怪一kóa台語文ê前輩講：「陳修ê詞典雖然有真chē錯誤ê所在，但對現此時ê台語文運動mā有相當ê幫助。」 台語文受外來政權迫害百外冬，taⁿ需要khah chē人來研究台語方面ê語言學，漸漸除去錯誤ê部分，緊來恢復咱台語ê原貌。