《生活e5台語，台語e5生活》

 | | | 轉寄

2011年第27屆北美教協神學研究會暨年會報告

作者 陳清芳牧師 2011.11.13

2011年10月11日到15日，tī加拿大溫哥華台灣基督長老教會舉行2011年第27屆北美教協神學研究會暨年會。溫哥華長老教會謝貫明牧師夫婦、長老、執事kap眾會友ê完善籌備kap熱情ê服事，hō͘大會非常圓滿ê閉幕。繼1998年，第二pái tī加拿大mā是tī溫哥華舉行。 欣見該教會ê同心kap成長，多年前，mā分設本拿比台灣基督長老教會，本拿比教會ê長老kap會友mā分擔一kóa接送、招待kap導遊ê工作。Chit-pái參加ê學員人數頭一pái破 百，共有121位參加。溫哥華教會出資雇用大型巴士早晚接送學員來回旅館kap教會。三餐kap點心ê提供koh-khah是設想周到，服務親切。 　　

今年主題「回廠保修–屬靈ê更新」。切合每一位學員kap教會ê實際需要，講員mā tī主題kap內容上，提供了明確ê教導kap指引，講員們m̄-nā有風富ê學識，而且有牧會多年ê實際經驗，著作真豐富，演講mā極受愛戴。兩位溫哥華神學院教授Rev. Dr. Stephen Farris kap Rev. Dr. Richard Topping雖然大會m̄-bat，tùi該學院ê網站上搜尋ê資料，發掘in是siōng好人選。Rev. Dr. Farris來到溫哥華神學院chìn前是多倫多大學ê講道學kap敬拜學教授。

Rev. Dr. Topping bat tī蒙特婁牧養數千人ê教會，也bat tī McGill大學教授講道學kap實踐神學ê課程，目前教授改革宗ê神學、歷史kap靈修學。In樂意用非常微薄ê車馬費接受邀請，是上帝hō͘咱極大ê恩典。In深知靈命ê更新是tī上帝ê話語受造就，講台m̄是道德倫理ê要求kap教導，koh-khah重要ê是傳講福音，會友一旦經歷了上帝ê恩典，自然會有疼ê回應，mā就樂意順服上帝ê旨意kap聖經ê律法要求。

Rev. Dr. Farris tùi釋經學ê原理kap經文ê示例，透視整本聖經所揭示ê上帝福音，注重講道kap正確ê解經，chiah ē-tàng有效來hō͘內在生命更新。 Rev. Dr. Topping tùi加爾文ê神學中，神ê話kap聖靈來闡述，神ê話kap聖靈是靈命更新ê兩項要素，伊mā呼籲咱tio̍h 回歸聖經，mài被現象或急功近利所迷惑，追求聖靈本身重tī聖靈恩賜，用上帝ê話來檢驗靈恩或一切ê靈界ê現象。

台灣長老總會mā供應咱一位傑出ê講員莊孝盛牧師，伊tùi神學院畢業了後，被派到一間庄腳ê竹塘長老教會傳道，了後被按牧，到taⁿ牧養該教會23年，一個無資源、無法度自立、被咒詛、將殘ê教會hō͘伊翻轉過來，成做宣教典範ê教會。牧師經歷了屬靈ê更新，有了異象kap遠見，m̄驚艱辛困苦，投入社區ê需要，伊因為需要大膽地向父神祈求，建了上千萬ê教育館﹝對in來講是天文數字，因會友ê更新，家家戶戶lóng樂意遵守什一奉獻 ﹞成了神蹟，教育館提供中輟生向日葵學園ê教室kap社區ê活動場所。該教會koh-khah聚集附近鄉鎮七、八間弱小教會組立二林宣道中心，共同分享資源kap合作 。竹塘鄉鎮人口外流，卻增加了400位ê外籍新娘，教會幫助in語言ê學習，kap生活ê適應，如siōng起碼ê交通工具騎o-to-bái，筆試kap路考，lóng需要有人輔導in。Iáu有諸如活動圖書館，鼓勵青少年閱讀好ê冊刊，送餐到居家老人，輔導兒童學業等。阮每間教會mā需要研究阮社區ê需要，成做傳達ǹg望，落實上帝國ê精神–公義、和平、仁愛，kap hō͘ in生命ê教會。總講一句，咱tio̍h認bat宣教是：教會kap人ê相交，上帝ê宣教，傳達上帝ê救恩，chhōe求正義，佈道，處境化，解放，進入文化，共同見證，上帝所有子民ê服事，向別種宗教信仰者作見證，神學，ti7ng3望中行動等。教會ê作法：以基督為中心，高舉基督，倦tah-tah、憂傷、重擔者ê心靈ê家，無圍牆，拆除圍牆kap社區phah成一片，共同chhōe生命，共同領受宣教ê使命 。若ē-tàng落實chiah-ê作法，教會必定會有良好ê見證kap成長。

Chit-pái研究會亦安排張瑞雄牧師兩堂課，紹介台灣宣教簡史。張牧師kúi-nā pái奔波到英國、蘇格蘭追chhōe早期宣教師寫回 家鄉ê信件，kap差會ê檔案資料，並訪問歸國ê老宣教師。第一堂課紹介外來移植篇，to̍h是紹介早期來台宣教師ê生平kap事工，一張張老舊ê圖片，說明了in ê見證 kap犧牲ê故事。第二堂課紹介在地人本土化篇，講述第一代信徒kap本土傳教師ê見證kap代代傳承ê信仰故事，充滿了血目屎ê英勇事蹟，喚起咱今á日ê責任，信耶穌 m̄是單是今生ê好處，tùi án-ne是行一條背十字架跟tòe主ê道路。

蕭清芬牧師主持第一代kap第二代移民ê對話，教會如何回應這兩代無仝ê需要，教會ê領導者需 ài有智慧kap決心去chhōe求上帝ê領導，教會chiah不致斷層。
林俊育長老koh再紹介網路資源kap福音事工，林長老kap一陣年青同工無放輕鬆teh開拓kap發展網路事工，出版書籍影音、刊物，並無遺餘地四界奔走推廣母語福音事工，咱只要舉手之勞上網，就ē-tàng使用chiah-ê非常豐富ê資源，ē-tàng非常有效tek傳福音。
大會mā安排林興隆長老兩堂伊ê信仰歷程，林長老是紐約筆會ê創會員之一，著述真豐富，tī真chē所在神學院學習，受教tī名師。伊分享舊約kap新約一kóa故事ê真義，非常深入ê思考，大開學員ê眼見，mā挑戰學員作進一步ê深入探討。

Chit-pái研究會tī兩個暗時分別安排了事工分享，kap信徒長執、牧者、師母分組分享。1999年台灣921大地震 了後，台灣中斷了牧者來美ê進修，chit-pái koh再恢復，有15位ê牧師﹝包括多位無仝族群ê原住民牧師﹞，hō͘分組討論了後，聽取三組ê綜合報告，包括老中青三代ê 牧師、牧師娘、kap眾會友ê意見kap分享，趣味橫生，充滿了幽默ê歡笑，不斷來拍掌，具有智睿ê深度kap札實ê內容，可惜時間太短。

大家tī一禮拜ê相處中，把握tio̍h每餐ê用餐交談，kap歇睏ê時間，有了深入ê彼此認bat，kap交換意見，心靈有講bē出ê收穫kap喜樂，大家無願意錯失這相聚ê良機，引頸期待下次ê研究會快快來到。多謝北美教協教育組同工ê精心設計ê節目，尤其組長紀元訓牧師ê辛勞，伊差不多每堂課ê前後，lóng講一則富有神學意義ê笑話，有人滾笑講，kan-ta聽chiah-ê笑話已經值一半ê費用。

今年年會因有多位新代表加入，hō͘年會ê討論kap決議koh-khah充滿了新機kap新氣象。雖然然教會非常分散，無法度不時聯繫kap同齊同工，但深信祈禱中，藉tio̍h彼此ê代禱kap關懷，是咱共同得力ê根源，是咱繼續前進ê動力。
願上帝賜福大家。後會有期。