《生活e5台語，台語e5生活》

 | | | 轉寄

埃及蒙恩記（4/5）

作者 陳鳳翔 2011.03.20

後來順利出埃及進入以色列，好友聽了chit段，sńg笑講伊也tio̍h講： “I have kids, Don't kill me. “ 我bē了解就問講：「你黃金羅漢腳，thái有gín-á？」伊講：「Lín有兩個，bē曉分我一個ah？」 平安了，就ē-tàng大講sńg笑，當時ē-sái講是一點á mā笑bē出來。

捱到第三工早起。仝旅館有真chē外國團lóng決定搭機tńg來國內，因為阮ê簽證問題，無法度提早去以色列，但蘇伊士運河hit條公路暴動mā小khóa平息，交通管制開放，tùi án-ne照第三日ê行程，坐巴士前往埃及杳無人煙ê西奈曠野，去hip西奈山：耶和華上帝tī-hia kap摩西講話，並kā兩塊法版交hō͘伊ê聖山。上帝感動院長做了chit-ê極佳ê決定，若無阮一陣人就會像新聞播ê一堆旅客擠tī機場坐tiàm土腳苦候。

巴士tùi吉薩路經過開羅市區，ǹg西奈曠野駛去。沿途lóng是hông phah破毀壞ê店面，每條街口lóng設哨站，並有荷槍實彈ê軍人teh看守，iáu有民間家己組成ê守望相助軍，防止有人趁火phah劫。連gín-á lóng the̍h棍棒加入！一整排ê裝甲運兵車守tiâu重要ê政府機關，電影chiah看會tio̍h ê重軍備kui排，全履帶配置、有兩棲能力、thang高速行駛ê M113裝甲運兵車、M60坦克車。Jú駛近郊區，邊界駐守ê則是siōng大台ê主力坦克車，甚至iáu有大型軍用運輸車kap卡車。終其尾tio̍h出埃及，竟然kap當年以色列人出埃及ê心情一般，擋bē-tàng趕緊遠離成群ê埃及軍。

Tùi埃 kap西奈半島荒漠tio̍h進入埃及熱鬧ê市鎮，lóng一一受tio̍h嚴格盤查。每台車lóng會被cha̍h落來徹底搜查，看起來可疑ê份子lóng會 被詳細盤問。阮方向相反，前往郊區西奈半島，所以檢查鬆散。車頂，院長帶阮讀聖經以賽亞冊十九章21節：「耶和華beh hō͘埃及人bat祂；tī hit日埃及人的確bat耶和華，… 」先知以賽亞預言耶和華賜福埃及，in將來mā仝款是上帝ê人民。大家紛紛為chit-ê土地求平安祈禱。