《生活e5台語，台語e5生活》

 | | | 轉寄

埃及蒙恩記（2/5）

作者 陳鳳翔 2011.03.06

有人puh出一句台語：「這m̄是古早擦尻川ê草紙？」同行團員無chē人知影chit種平凡草紙，但其實he是價值非凡，因伊bat負責承載上帝寶貴ê話語。古早時無印刷術，差不多所有ê 新約聖經抄本，lóng是一字一字寫tī蒲草紙kap皮紙頂面。Siōng早ê新約《馬太福音》ê碎片就是tī埃及被發現，hit-ê年代被確定是主後66年。蒲草紙容易朽爛，oh得保存，除非是tī極其乾燥ê地區，如埃及沙漠。

基督信仰是真理，所信ê lóng有根有據，聖經擋能tiâu受嚴格ê鑑別。其他宗教不談真假，強調「心誠則靈」，經冊自然真chē是人為杜撰虛構，經不起考古鑑定。同團中有一位m̄是基督徒，伊oh得理解為何基督徒會堅持真僞分辨，hit-ê觀念是後現代主義，生活中「善、美」就夠用，無需要「真」，各種人生價值觀lóng真好。M̄-koh，只有「善、美」ê人生價值觀，kan-ta ē-tàng供一己之用。世上有kóa tāi-chì是超越美善，需要真理來做基礎，chiah ē-tàng有永恆ê宏觀角度，願意棄sak保全己身，犧牲小我。

我kap伊分享，耶穌周圍原本有一大堆ê跟tòe者，但當祂被掠、上十字架，hiah-ê人通通lóng tio̍h 驚走了了。直到耶穌復活並顯現hō͘ in看，in因為信仰為真，tùi án-ne ē-tàng違反人性ê貪生驚死，個個lóng為tio̍h永恆價值ê福音赴湯蹈火。若人生價值觀無重視真僞，án-ne就會tòe環境變動，無可能持守，mā無需要持守。這就是為何基督徒真重視所信ê是真。

按照行程，用完晚餐是搭夜舖火車，清早到路克索。無想tio̍h，當地導遊講，in ê總統tī路克索當teh演講，火車停駛。瞬間阮chit團二十五個人，遭遇了第一個難題，無旅館thang tòa。兩個gín-á聽tio̍h無所在tòa，非常擔心。因為前晚tī飛機頂無法度倒teh睏，in已經thiám kah beh死。Chit時禁bē-tiâu想tio̍h約瑟kap teh-beh臨盆ê馬利亞，in當時千辛萬苦來到伯利恆，mā是chhōe無所在tòa。Chit chōa聖地之旅所遭遇ê第一ê突發事件，竟然hiah-ni̍h相像，有可能是上帝ài阮tùi其中ê經歷來感受ê功課。

M̄-koh，慈愛ê上帝只hō͘阮小khóa感受一下當年約瑟kap馬利亞ê困境，並無hō͘阮真正tòa-tī 馬槽或露宿街頭。大約暗時八、九點，終其尾tī吉薩chhōe-tio̍h一間bē-bái ê旅館。雖然早to̍h超過晚餐時間，初到埃及ê喜樂卻hō͘大家一點á mā bē iau。