《生活e5台語，台語e5生活》

 | | | 轉寄

台灣 「愛玉á」(之1）

作者 黃慶三 2011.01.23

愛玉á (Jelly Fig，學名 Ficus awkeotsang Makino) 是台灣特有植物 (to̍h是原來只有台灣chiah有ê植物)。伊屬tī桑科 (Moraceae Family)，無花果屬或榕屬 (Ficus genus)，是常綠多年生藤本植物。日本人牧野富太郎 (T. Makino) tī 1904 年發表愛玉á是一個新種，chiah訂出伊ê學名。台灣ê俗名有枳á、玉枳、草枳á、枳蒲、天拋子等等。伊ê天然生長地以台灣中央山脈海拔 1,000 到 1,800 公尺，多雨、潮濕ê闊葉林內。主要產地是嘉義縣，有「愛玉王國」ê好名聲。續落來是南投縣。

講到同屬無仝種ê薜荔 (Climbing Fig，學名 Ficus pumila)，會結愛玉凍ê成分極少，並無食用ê商品價值。台灣各地區、南加州、佛羅里達州等，1 lóng常kā薜荔當做綠化橋墩、水泥牆、磚牆、庭院ê用途；或以籬樹修剪法 (Topiary)，而且常用模型支架，做成動物、飛鳥、景觀等等造型。

「愛玉」chit-ê名稱ê由來，根據連雅堂 1921 年ê「台灣通史」ê「農業志、果之屬」中ê記載，2清朝道光初年 (道光元年是 1821 年)，有福建同安商人常來嘉義採購土產。有一個日頭赤iā-iā ê日，行路經過大埔鄉，伊真嘴ta，tùi án-ne用手捧起來lim山溪ê水。卻見水面堅凍，lim了後心涼脾土開。伊真奇怪，án-ne日頭赤iā-iā ê日為什麼溪水會結冰？細看之下，chiah看tio̍h水中有樹子落kah滿四界，k?伊揉有漿。Tùi án-ne拾一kóa樹子帶tńg去厝裡，用水洗了後無jōa久就堅凍。若加糖水，口味koh-khah chán。Chit位商人有一個 15 歲、生做kó͘-chui得人疼ê cha-bó͘-kiáⁿ叫愛玉，伊就用chit種樹子做成果凍來賣，真受歡迎。Tùi án-ne chiah-ê顧客就kā伊叫做「愛玉凍」。但是連雅堂所講：「按愛玉子，即薜荔」並無正確。

因為多年來台灣闊葉林hō͘人大量剉掉，野生愛玉á大大減少，所以發展人工栽培。Siōng早人工栽培成果無好，因為它常tī果實成熟以前，便產生果實i?u未熟就落現象。經行政院農業委員會苗栗農業改良場多年ê研究，chiah知影原來是減少「愛玉小蜂」 (Fig Wasp，屬tī膜翅目榕小蜂科 Hymenoptera：Agaonidae) ê傳送花粉交配，造成愛玉雌果iáu未成熟就脫離樹枝來來來。「愛玉小蜂」約二毫米 (mm) 長，小kah ē-tàng穿過針孔。

愛玉雌、雄異株，必須靠頂面所講ê「愛玉小蜂」來傳送花粉交配。咱食用ê「愛玉凍」是ùi雌株生產ê雌榕果製成 (to̍h是雌愛玉果)，á雄株生產ê雄果則成做愛玉小蜂產卵、孵育成虫ê溫床。雄果中ê「虫癭花」(Gall Flower) 提供愛玉雌小蜂產卵、孵化，á發育成「虫癭」(或叫「樹癭」) (Gall)。

所謂「虫癭」是一kóa種類ê小動物，會tī植物体 (比如葉子、枝椏) 注入一kóa化學物質，刺激植物產生組織增生á膨大。Chiah-ê造癭ê小動物，khah大面會bih-tī增生ê組織裡面，吸食植物ê汁液 (養分)。常常看見橡樹頂乒乓球形ê五倍子或無食子 (Oak Gall 或Oak Apple) 就是一例。Chiah-ê小動物m̄-nā得tio̍h虫癭ê保護，而且mā取得食物ê來源。通常只有chiah-ê小動物受益，所以是一種「片利共生」(Communalism) ê現象。但愛玉小蜂kap愛玉則是「互利共生」 (Mutualism)，因為愛玉小蜂tī愛玉雄果內產卵、生湠下一代，但雌愛玉小蜂則負起為愛玉雌果傳送花粉交配ê任務。因為兩個互相依賴，bē-ōe chhōe求替代ê對象，所以特別koh叫「義務性」互利共生 ( Obligate Mutualism)。

因為極大多數ê無花果，包括人類食用ê無花果 (Edible Figs)，lóng靠chit種義務性互利共生ê各種無花果專屬ê特別小蜂，比若加州出產、非常香甜ê Calimyrna Fig，需要靠Ficus carica 雄無花果中ê Blastophaga psenes Wasp 3來傳送花粉交配；而且無花果是熱帶雨林靠果實是生動物siōng重要ê食物來源，所以借機就kā這奇妙ê、tùi白堊紀 (Cretaceous Period, 70 到130 百萬年前) 就開始ê無花果kap小蜂之間，義務性「互利共生」ê情況，借愛玉果說明一下。
雄愛玉果內孵化ê愛玉小蜂，當然雌、雄lóng有。雄小蜂因為kui世人lóng tī烏暗ê雄愛玉果內，伊ê主要任務是交配生湠下一代。所以雄小蜂無目chiu或翅，但嗅覺、交配器官特別發達。成長ê雄小蜂會chhōe、並咬開雌小蜂成長ê虫癭，先行交配了後，koh再kā開嘴咬kah koh-khah大，hō͘雌小蜂ē-tàng爬出來 (雌小蜂無法度家己咬開虫癭)。雄小蜂tī交配數次了後就死亡了。雌小蜂則有翅，當伊爬過雄花區、粘tiâu花粉了後，tùi愛玉底部ê小孔鑽出，飛離雄愛玉果，chhōe新ê愛玉果產卵。