《生活e5台語，台語e5生活》

 | | | 轉寄

台灣宣教新世紀ê來臨

作者 張楊宜宜 2011.01.09

感謝上帝奇異恩典，「台灣宣教基金會(TMF)」創立一年了後，第一份通訊出版了！誠心願意將伊當作禮物獻hō͘恩主。基金會ê呼召是beh突破台灣基督教歷史近一百五十年基督徒比例一直khā-tiâu無向前ê 3%難關。因為使命沉重，上帝採取kap撒母耳、彼得仝款ê模式，「呼召三pái」，分由三地五人向我發出「你tio̍h家己設立台灣宣教組織」ê仝款呼聲。回應到taⁿ,無日無用雙腳chhōe求上帝ê引chhōa。「One Thousand One Team(千元支持一隊)」to̍h是上帝事(tāi)先啟示、mā是基金會起家第一項支持台灣短宣隊ê事工。

十九世紀中旬以後，西方宣教師分批kā福音帶hō͘台灣chit-ê美麗之島。日後加上本土台灣基督長老教會倍加運動ê努力，得救ê基督徒增長到3%左右，可惜久長無koh進展。一個半世紀了後ê二十一世紀，宣教燒熱潮koh再起，全球眼光集中tī人口siōng chē ê中國kap所謂基督徒siōng少ê回教國，想bē到台灣基督徒比例比真chē回教國koh-khah低。台灣soah成做一個hō͘人bē記得ê角落。今á日台灣基督徒需要起來接棒！「台灣宣教基金會」mā適時被呼召出來，並聚焦tī兩件事：贊助宣教kap建立管道。目的是人人宣教、福音遍傳。

第一階段目標是「十年基督徒達百分之十」，並切切ǹg望kap眾教會團體合力來達成。

阮堅信上帝會對祂ê呼召負責，我ê回應果然帶來上帝ê供應，包括同工、事工kap基金。全能ê上帝配上同心ê同工，kám有難成ê事？Chit時你kám無看tio̍h，聖靈已經開始tī海外教會興起「台灣宣教」ê波波浪潮？油價飆高，一隊一隊ê短宣隊iáu奮勇向台灣出發。看起來，台灣宣教新世紀已經然來臨loh！朋友，咱來趕快phah拚全力拚落去！

歡迎上網瀏覽台灣宣教基金會(TMF)ê網址
http://taiwanmissionfoundation.org/ （原載台灣宣教基金會通訊第一期,2008.12）