《生活e5台語，台語e5生活》

 | | | 轉寄

公投

作者 Tân Chheng-chùn 2008.02.10

台灣tī今年(2008)三月22日有總統ê選舉，同時也有兩件「公投」ê案件。就是「入聯公投」kap 「返聯公投」。公投是全體「公民投票」，chit遍ê公投ê案件有特別ê意思，就是全民向世界ê人士來 “tâu”─阮ài入(á是倒tńg去)聯合國。

台灣話chit字 “tâu”字真有意思。當兩個gín-ná冤家、相爭、受冤屈，á是khah輸khah弱ê一方，就去向父母tâu，講出伊ê冤枉，委屈。父母用公平公道來判斷來處理。

台灣，以前是「亞西亞ê孤兒」，現在「進一步」成做「世界ê孤兒」，因為世界中只有chhun台灣受拒絕bōe-sái加入聯合國。為甚麼？因為有一個pháiⁿ厝邊─中國ê阻擋。台灣ê國際空間受束縛，beh入聯合國也受拒絕。受tio̍h chit種ê冤屈，咱beh去tó位講？beh去tó位tâu？向聯合國，人無ài chhap。所以就是tio̍h向世界所有ê人tâu。Án怎tâu？就是用「公投」。無管中國國民黨á是民主進步黨，lóng有提出beh入聯合國ê 「公投案」。真希望chiah-ê案lóng會通過。公投是表示咱台灣人所有ê人民全體ê意見，向全世界來表達咱ê意愛，也表達講出所受ê冤屈。希望世界ê人會伸出公義ê手來完成咱全體台灣人ê心意。

咱tī世界ê情形也是án-ni，受中國大大ê欺負，委屈無tè tháu，beh án怎？「入聯公投」á是「返聯公投」就是咱ê表示。咱所beh向世間人tâu ê表示。表示咱ê委屈。希望世界正義人士主持公道。特別ài每一個人lóng出來「公投」。親像中央選舉委員會所講：「北有北投，南有南投，公民ài公投。」。「入聯公投」kap 「返聯公投」lóng是表現台灣人民beh入聯合國ê心聲kap意願。拜託！拜託！大家出來tâu，「向全世界tâu」，hō͘ chit兩案lóng通過。因為台灣ê公投àn通過ê條件khah koân，需要大家努力。Chiah會達成。拜託！Tī 3月22日ài會記得出來公投。Án-ni咱ê心聲tī國際beh有聽tio̍h。Tùi台灣ê前途有幫助。Jú chōe贊成jú有力，贊成ê比率jú-koân，聲量就jū大，jú有力量。大家相鼓勵，相招來去「公投。」將咱ê冤屈tâu出來。世界正義人士會聽tio̍h，「人助天助」。上帝，á是天公也beh行動。「天佑台灣」！代價phah拚來達成。