《各各他e5目屎--苦難得安慰》

 | | | 轉寄

會lim牛奶ê菩薩

作者 紀福讚 2006.07.30

1995年ê熱天，印度新德里傳說，印度教ê象頭神加內撒會lim信徒hē tī供桌頂ê牛奶，致到新德里ê牛奶供應欠貨，濟濟人相爭搶買牛奶轉去供獻，飼菩薩牛奶，親像teh飼gín-á，bē當siuⁿ大嘴，若無，會溢奶。信徒也傳說講，「這是誠心ê問題，你若有誠心，你ê目睭就看會tio̍h」。

美國新澤西州ê El Santuario de Chimayo教堂ni̍h，有一個小土坑，每年復活節lóng會有幾若萬ê人來朝聖，求取hit款對這個土坑所挖出來ê爛糊糜。照傳說，這款爛糊糜會醫治久年ê病疼。今年（1995年）教堂估計有六萬人來朝聖。對1816年Chimayo教堂建堂以來，這款信念lóng無改變。雖然in知影chiah-ê土糊糜是對這間教堂後山提來填補ê，但是求取ê人猶是人山人海。天主教ê領袖講，「教會並無故意瞞騙群眾，因為彰顯神蹟ê，m̄是chiah-ê爛糊糜，乃是群眾ê信心」。

這款講法聽起來，若kah是真有靈性，但是事實上，是一款愚憨ê信心。會lim牛奶ê菩薩hō͘大家震驚，這表示過去所供獻ê態度，lóng是欺人欺神、欺騙家己。會lim牛奶ê菩薩，對真理、公義、仁義，是完全無意義。醫病ê爛糊糜，社會性ê經濟利益比宗教性ê感化khah有意義。但是，今á日教會（宗教）領袖常常鼓勵信徒建立這款非理性ê信心，常常暗示信徒放棄理性ê信仰，致到信徒缺乏理性ê訓練，tī智慧上漸漸變做憨憨ê信徒，無能力分辨真假、分辨公義kap不義、分辨好歹，只是有憨信kap熱狂，tī抵擋社會惡ê頂koân，變做軟腳蝦。

耶穌講：「Lín tio̍h知影真理，真理beh hō͘ lín得tio̍h自由」（約八34）。信仰tio̍h建立tī真理ê頂koân，才有永久性，m̄是建立tī非理性ê愚憨頂。耶穌koh講：「Lín ê話，是就講是，m̄是就講m̄是，加講，就是出tī歹」（太五37）。