《各各他e5目屎--苦難得安慰》

 | | | 轉寄

啥物是上帝ê物？

作者 紀福讚 2006.05.07

啥物是上帝ê物？

「該撒ê物tio̍h歸hō͘該撒，上帝ê物tio̍h歸hō͘上帝」。耶穌chit句話，常常hō͘人引用做「政教分離」ê根據。事實上，耶穌講chit句話ê時，語氣是充滿受氣、khau-sé。Kiám-chhái tī chit句話ê頭前，tio̍h加上「你這個猶奸！」才會當表達伊當時真正ê感情。因為chiah-ê來問「kám應該納稅hō͘該撒」ê希律黨（tī政治kap意識上，依附外來政權koh耀武揚威ê人），in主要ê目的，beh掠耶穌ê話柄，thang來陷害伊（可12：13；太22：15）。In tī耶穌ê面前，o-ló耶穌ê誠實，in講：「阮知影你誠誠實實teh傳上帝ê道」（可12：14），期待耶穌會照實講出心腹內ê話，thang將伊掠來交hō͘外來政權。但是，耶穌看出in ê「惡意」、「假意」、「詭詐」（可12：15；太22：18；路20：23），無客氣稱in是「假冒偽善ê人」（太22：18）。伊問講：「這個銀á頂koân所刻--ê，是啥物人ê像kap年號neh？」in回答：「是該撒ê」，耶穌受氣講：「該撒ê物本tio̍h歸hō͘該撒，這是加問--ê。納稅hō͘執政者，kiám-chhái是bē當避免--ê，但是lín m̄-thang bē記得，lín本身是希伯來人，是屬上帝ê子民，lín m̄-thang依附外來ê政權，欺壓家己ê骨肉，lín m̄-thang koh詐取幾nā倍ê稅金（參考路19：8）；tio̍h記得，lín本身是有上帝ê形象ê上帝子民，tio̍h摸家己ê心肝來做代誌；lín本身是屬上帝，tio̍h將上帝ê物歸hō͘上帝。」若對照台灣今á日ê情景，耶穌這句話，主要beh表達--ê，就是「M̄-thang koh做台奸，m̄-thang koh依附外來政權欺壓台灣人，因為lín tio̍h會記得lín是台灣人」。

耶穌講chit句話，完全無hit款「政教分離」ê意思。伊是為tio̍h hiah-ê受欺壓ê人teh講話。耶穌出身tī加利利ê拿撒勒，是一個散赤ê小城市，是一個受看輕ê所在（約1：46；6：52；徒5：37；太4：12－16）。Tī耶穌ê一生中，伊所接觸ê人，大部分是散赤人，是受壓迫ê弱勢群體。伊同情in ê iau餓（可6：34），伊也欣賞稅吏撒該ê轉變（將所有ê一半分hō͘ sòng-hiong人，以前伊kā人詐欺、歪ko--ê，四倍賠人。路19：8）。伊對該撒kap眾人講：「今á日，救恩臨到tī這個家」。另外一方面，伊也真痛恨hiah-ê依附外來政權欺詐散赤人ê希律黨。伊討厭in hit款假冒偽善ê鼻嘴（太22：18）。伊誠誠實實講出心腹內ê話：「Lín m̄-thang koh做外來政權ê走狗，tio̍h將上帝ê物歸hō͘上帝」。 Tī耶穌ê講話，常常將信息ê重點khǹg tī一句話ê結尾（參考2：17，27－28；3：34－35，路10：37，12：15，21，18：14，19：10）。「該撒ê物歸hō͘該撒」，這是希律黨beh ài ê答案，是in已經知影ê道理，in所m̄知、所忽略ê真理，乃是「上帝ê物tio̍h歸hō͘上帝」。親像馬可2：17「康健ê人m̄免醫生，破病ê人才需要」，這是淺白ê道理，大家lóng知，但是卻忽略耶穌來世間「m̄是beh召義人，乃是beh召罪人」，á是忽略「世間無義人，只有罪人」。Tī馬2:17內，耶穌話語ê重點：「我來本是beh召罪人，請問你是m̄是罪人？若是，就會當kap我作伙享受彌賽亞ê筵席」（參考太22：1－14；路14：15－24）。Kāng款tī馬可12：13－17內，耶穌信息ê重點乃是「上帝ê物tio̍h歸hō͘上帝」。啥物是上帝ê物？就是chiah-ê teh剝削散赤人，teh剝削骨肉之親ê希律黨，in親像富人teh積聚地面上ê財寶，soah bë記得「家己ê性命是屬上帝」（路12：16－21）。In依附外來政權剝削同鄉，khiā tī in ê頭殼頂放屎，歡喜做羅馬外來政權ê走狗，這是耶穌所厭惡--ê。

今á日tī台灣，啥物人teh誤用這段經文，來攻擊hiah-ê為台灣鄉土teh phah拚ê人？Kiám m̄是就是hiah-ê「台灣ê希律黨」？In依附外來ê中國政權，欺壓本土教會，享受長期ê特權kap資源，soah m̄肯認同這塊土地kap百姓，桌頂食飯，桌腳放屎，久長做參謀總長ê人，竟然講「m̄-thang刺激beh kā咱吞食入腹ê敵人，咱ê軍備不堪一擊」；久長做司法院長、內政部長ê人，竟然kan-taⁿ teh怨嘆社會選舉道德風氣敗壞。Án-ni，in久長坐tī高位，是teh創啥貨？這是台灣人最大ê悲哀－－容允這款台奸久長創治剝削，到今iáu未覺醒。誤用聖經，來擁護外來ê政權，講啥物「政教分離」ê「痟話」－－教會m̄-thang關心鄉土，tio̍h kan-taⁿ會使關心「傳福音」、「天頂ê事」，tio̍h支持執政者。這款ê解釋聖經是歪曲耶穌ê話語。Kiám-chhái耶穌今á日也teh對in講：「該撒ê物tio̍h歸hō͘該撒，上帝ê物tio̍h歸hō͘上帝」－－－M̄-thang koh做台奸。