《各各他e5目屎--苦難得安慰》

 | | | 轉寄

Sòng-hiong人有福氣mah？

作者 紀福讚 2006.04.23

耶穌講：「Lín sòng-hiong人有福氣，因為上帝國是lín ê」(路6：20），koh講：「Lín iau餓ê人有福氣，因為lín beh得tio̍h飽足」（路6：21）。耶穌講chit兩句話真正ê含意是啥物neh？這kap咱現在ê實際生活情況是m̄是有真大ê出入？

1995年1月17日，tī日本神戶發生7. 2級ê大地動，死5063人，受傷--ê有幾nā萬人，無家可歸--ê有kui十萬人。死傷ê人中間，大部分是sòng-hiong人。有錢人lóng tòa tī蘆屋市，lóng是khōng-ku-lí ê水泥厝，倒歹ê khah少。Sòng-hiong人tòa ê舊社區lóng是木造ê老厝，tī地動中差不多lóng倒歹去了。當sòng-hiong人teh無閒安排葬禮，傷心啼哭ê時，富裕ê人soah無閒teh安排渡假á是搬去另外一間新厝，khah無受tio̍h地動災害ê影響。

1994年美國ê總人口是二億六仟七十萬人，囚犯ê總人口是一百萬一萬八仟八百五十一個人。其中白人ê比率是每十萬人有二百零三人，烏人ê比率是每十萬人有一仟四百三十二人。烏人坐監ê比率是白人ê七倍，這kap in ê經濟收入tú-tú是顛倒péng ê比率。

每一年七月底，美國ê「Siáu人俱樂部」（Bohemians Club)tī舊金山北pêng大概一百公里外ê小鎮San ta Rosa聚集，參加ê會員大概有二仟人，但是chit二仟外人加起來ê權勢soah會tàng改變全世界ê命運，因為in ê財產加起來是佔全美國ê四分之一。

Án-ni來看，耶穌所講ê「sòng-hiong人有福氣，上帝國是in ê」，到底有幾分ê事實？今á日ê台灣人教會成員，大多數也是中產階級，tī教會中teh出入--ê，sòng-hiong人真少，因為sòng-hiong人一禮拜ài作工七日，無時間thang來教會禮拜，á是參與服事kap奉獻。教會成員裡sòng-hiong人ê比率實在真低。「Iau餓ê人有福氣，因為in beh得tio̍h飽足」，也kah-na是kap生活ê事實距離真遠。因為án聯合國ê記錄，每年全世界iau死ê人口是四仟萬，也有八億人經常是tī iau餓ê狀態中。

若是án-ni，耶穌所講ê應允到底有啥物意義？是m̄是咱tio̍h接受另外一種ê解說，親像馬太福音所做ê修改？馬太5：3講「心靈sòng-hiong ê人，有福氣」，5：6 koh講「Iau餓嘴乾欣慕義ê人有福氣」。這是m̄是耶穌ê原意？這咱會thang對耶穌當時ê歷史背景來瞭解。

真明顯，耶穌當時傳道ê對象kap伊所tòa ê所在lóng真散赤，甚至是犯罪纍纍。耶穌出身tī散赤ê家庭，連睏ê所在lóng無（參考路2：24；9：58），伊所生長ê城市是受看輕ê卑賤地區（約1：46；6：52），盜犯真濟（徒5：37；路22：58），耶穌ê門徒也大多數是散赤人（徒3：6，4：13；路8：3），後來也常常tī監獄teh出入（徒4：3，5：18，12：4）in所接觸ê人群，當然也是散赤人（加2：10；徒9：38，10：31）。所以，耶穌ê信息，應該是teh指「物質、經濟」上ê散赤kap「肉體」上ê枵餓，m̄是kan-taⁿ指心靈上ê sòng-hiongá是iau餓niā niā。

但是，「經濟散赤ê人」beh án-chóaⁿ才算做有福氣neh？「經濟散赤」kap「肉體iau餓」這lóng是bē當改變ê事實kap現象，也無可能因為信耶穌就變做富有á是飽足。信耶穌了後所改變ê，m̄是客觀外在看會tio̍h ê物件，是內在主觀ê感覺kap觀念。信耶穌會hō͘人心靈上得tio̍h飽足，這是事實。耶穌kap門徒是經濟上真正散赤ê人，但是in soah活出心靈富足ê款式，無因為散赤ê緣故來犯罪、來怨嘆、鬱卒、掛慮，這lóng是因為in深深相信，也bat親身tam過上帝國（上帝掌權ê實存關係狀態）ê向望kap飽足。所以，耶穌講「看ah，空中ê飛鳥，野地ê百合花.... . . . 無得為食啥物，穿啥物掛慮，先求上帝ê國kap伊ê義，就chiah-ê lóng beh賜hō͘你。」（太6：26）所以耶穌講：「上帝國是in ê」。

Sòng-hiong人有福氣，m̄是因為in信耶穌了會變做khah富有，是因為信耶穌了後就無koh受散赤ê不幸來束縛in ê心靈，也就無koh致意tī世上ê榮華、虛浮、地位、名聲、死失等等，開始願意注神tī上帝ê心意kap世間人整體ê幸福，雖bóng in ê經濟散赤，肉體iau餓，但心靈卻因為khiā tī上帝國ê內面，hō͘上帝掌權來歡喜快樂。（台灣教會ê成員有對散赤變做khah富有ê中產階級ê原因，是因為in比其他ê人khah早接觸tio̍h西方ê文明、生活方式kap教育觀念ê關係）。

親像耶穌ê老母馬利亞，被稱做是有福氣ê婦人人（路1：42），但實際上，伊ê家庭散赤，年輕ê時因為未嫁尪就生子來受恥笑，年老ê時koh來看所疼ê子hō͘人釘死tī十字架頂，親像賊ê款式。伊ê一生實在會堪得稱做地面上散赤ê人，但是聖靈卻稱伊做真有福氣ê女子。伊尊上帝做大，伊ê kiáⁿ雖bóng死，伊ê懷胎雖bóng見笑，但伊看見將來ê結局就歡喜。這個結局就是「伊所生ê kiáⁿ，hō͘有權柄ê失位，hō͘卑微ê昇高，hō͘ iau餓ê得tio̍h飽，hō͘富足ê空手轉去」，這是整體群眾ê幸福，是上帝súi ê心意（路1：46∼55）。

另外一種「有福氣」ê意義，是今á日ê教會所忽略--ê，也是今á日ê教會tio̍h ài努力去促成ê。初代ê教會，是一個「分享ê團契」 （Koinonia)，sòng-hiong人加入這個團契，會tàng得tio̍h物質上ê幫助，iáu得tio̍h飽。這個分享ê團契，是上帝國實現ê一部份，iau餓ê人會得tio̍h飽足，是上帝國應允實現ê一部份（路4：18），親像舊約中安息年，免去借貸ê利息、拾穗.... . . . 等等律例ê規定，lóng是beh hō͘ iau餓ê人會得tio̍h飽足ê實際制度，所以耶穌講「sòng-hiong ê人有福氣，因為上帝國是in ê」（原文會當翻譯做「上帝國是為in準備ê」）；koh講「Iau餓ê人有福氣，因為in beh得tio̍h飽足」，tī上帝國內面，in beh受邀請tī彌賽亞ê筵席（路14：21）。

今á日教會ê增長，是m̄是有上帝國實現kap擴闊ê本質？今á日ê散赤人是無福氣ê人，iau餓ê人bē當得tio̍h飽足，這是m̄是因為教會無按照耶穌ê教示去實行kap努力neh？á是咱tio̍h親像馬太福音作者ê做法，來修正耶穌ê信息，hō͘伊變做「針對富有ê教會」ê信息，m̄是「針對sòng-hiong人」ê好消息。今á日ê教會khah愛強調這段信息ê「靈性上」ê意義，khah無ài回復耶穌信息ê原意，特別是hiah-ê專心注神tī成員數目 kap金錢奉獻增長ê教會，常常忽略這款教會信仰ê社會責任。

「Sòng-hiong人有福氣，因為上帝國是in--ê」，這kiám是真--ê mah？「Iau餓ê人有福氣，因為in beh得tio̍h飽」，這kiám有可能呢？親像馬利亞受祝福ê款式，今á日ê教會，kiám是受祝福ê教會？