《各各他e5目屎--苦難得安慰》

 | | | 轉寄

序一: 新ê台灣文字傳道應該有ê方向

作者 陳柏壽 2005.11.06

真歡喜對豐惠姊接著紀牧師chit本福音小品ê全文。讀了後我受tio̍h真大ê感動。Chit本用台語文寫ê「獄中書信」不但是伊心靈kún-kà ê結晶，表示伊tī獄中繼續teh傳福音ê成果，更加代表新ê台灣文字傳道應該有ê方向。

我bat為tio̍h紀牧師用台灣教會牧師ê名義，寫三張陳情ê批，要求美國監獄早釋放紀牧師，我mā向獄方保證紀牧師出獄以後ê行為、思想kap生活。經過鄭良光先生ê介紹，ia̍h經過伊tī<台文通訊>發表ê作品，hō͘我深信伊是一位真純潔、真熱情、真有深度ê牧師。

Tī紐約衛鄉教會作牧師ê時，我kap黃聲宏醫師kap眾長執共同設立「聰美姊記念基金會」。Tùi 1992年開始承接<台文通訊>發行人ê工作，一直到今á日。對hit-chūn開始，紀牧師就用台語文來發表伊信仰ê作品，一直到今á日。

我想人ê理性kap感情ê衝擊，正是表現出人性ê有限kap軟弱。紀牧師過去ê人生是人siōng典型ê寫照：伊不管時tī伊內心深ê所在，用伊ê理性來對付伊ê感性，ia̍h用伊ê感性來對付伊ê理性。Chit兩項極端tī伊ê心內互相kún-kà、互相鬥爭、互相妥協、互相歸一tī上帝ê所在。紀牧師每一個kún-kà ê腳步，ia̍h正是咱每人每日teh踏ê腳步。只有上帝ê憐憫kap引chhōa，chiah有法度chhōa咱去到上帝ê平安世界。

我祈禱紀牧師緊出來，緊緊加入咱台語文ê福音戰場，加入咱台灣社會文化重建ê戰場。台灣人beh出頭天tāi-seng tio̍h tī咱ê文化kap語言出頭天，第一步tio̍h勇敢「嘴講台語、手寫台文」。紀牧師chit本真有深度ê冊，一定hō͘讀者ê心靈有真好ê開展，伊ê傳道ê方式ia̍h真正是咱頭前應該繼續行落去ê路。
(本文作者是美國西阿圖第一台灣基督長老教會牧師、聰美姊記念基金會總幹事)