《綠色短評》

 | | | 轉寄

猶有人m̄知影侯友宜是草包！

作者 李南衡, ChoânTâijī/全台字 by Chng Hūi-phêng 2023.12.17





Choânbîn Tâioânjī pán/全民台灣字版簡稱ChoânTâiJī


《 Le̍ksek toánphêng 》　　 Lí Lâmhêng

　　　 Iáuū lâng m̄chai iáⁿ Hāu Iúgî sī chháupau!

Cha̍pjīgoe̍h chhesì, Tiongkok Kokbîntóng chiàⁿ, hù chóngthóng chhamsoánjîn Hāu Iúgî, Tiō Siáukhong kah kēngpān cho͘chitpō͘ hù tiàuchi̍pjîn Chiā Liôngkài, khì kàu Tâilâmchhī Chhitkó͘khu koansim kngtiān, lô͘cha būntê, jîchhiáⁿ chhiamsú "hoán puttong chèngtiān ê liânsúsu". Hāu Iúgî kóng, i khòaⁿtio̍h hóhó chhân, hîun lóng hông ēng lâi chèngtiān, Tâilâm bílē ê thó͘tē, sengthài lóng hông phòhoāi liáuliáu, oânchoân lóng bô khólī lônghîbîn ê seⁿkè, jîchhiáⁿ ē chōsêng Jia̍ttó Hāuèng, siàuliân lâng siūⁿ beh tńgkhì kò͘hiong phahpiàⁿ, lóng khòaⁿ bē tio̍h kihōe kah hibāng.

　　Hit àm, Tâilâm chhīchènghú tio̍h piáusī,"M̄thang ūitio̍h chèngtī bo̍ktek itchài hoānchhò jîchhiáⁿ chhò kah siuⁿ līphó͘!" 2019 nî saⁿgoe̍h, Môatāu bûntàn tngteh khuihoe iáu bōe kiatkó, Chiā Liôngkài bat loān kóng ū 200 bān kin bûntàn hông hiatsak tī Chanbûnkhe po͘ , koh ū phah iáⁿphìⁿ,"tiantò sīhui". Chit piàn kā iâmthoaⁿ tē kóng choh hîtiān kiōngseⁿ àn tiûⁿ,"lóng sī lāmsám kóng"! Tâilâm chhīchènghú mā ū chèchok"thàṳông kngtiān káⁿ ē chōsêng Jia̍ttó hāuèng?" "káⁿ ūiáⁿ chin chē hóhó chhân hông ēng lâi chèngtiān?" téng kngtiān sió chaibat tô͘khah,têngchheng iâugiân m̄ sī sūsi̍t, chhiáⁿ m̄thang thiaⁿ sìn!"Jia̍ttó hāuèng" sī chí to͘chhī pí chiuûi tēkhu untō͘ khah koân ê hiānsiōng, Tâioân thàṳông kngtiānpán bīnchek pēng bô ta̍tkàu to͘chhī kuibô͘, m̄ sī thôaⁿgiân só͘ kóng ê. Jîchhiáⁿ hóhó chhân mā bē hông ēng lâi chèngtiān, kinkì 2020 nî chhitgoe̍h siuchèng ê "lônggia̍p chúkoán kikoan tôngì lônggia̍p ēng tē piànkeng súiōng símcha chokgia̍p iàutiám" kuitēng, hānchè te̍ktēng lônggia̍pkhu kah ióngsi̍t hîgia̍p sengsán khu lāi, lóng bē sái piànkeng siattì kngtiān.

Iúkoan Tiongkok Kokbîntóng chóngthóng chhamsoánjîn Hāu Iúgî kóng "kngtiānpán ē chōsêng Jia̍ttó hāuèng", "phòhoāi sengthài". Cha̍pjīgoe̍h chhegō͘, Bînchìntóng chóngthóng chhamsoánjîn Lōa Chhengtek hoánkek kóng, kngtiān sángia̍p bô hun Nâ Le̍k chipchèng lóng sī kokka chèngchhek, kngtiān bē tòalâi Jia̍ttó hāuèng, bē énghióng kànghō͘ liōng, mā bē chōsêng thiankáujia̍t, che sī kipún ê khoha̍k siôngsek. Chi̍tê chóngthóng chhamsoánjîn "engkai ū kipún ê khoha̍k siôngsek", jīmhô hāusoánjîn to bē sái ūitio̍h soánkí līek thiaukang kā Tâilâmchhī, kngtiān sángia̍p " tah phiauthâu".

　　 Cha̍pjīgoe̍h chhegō͘, Tâilâm chhītiúⁿ N̂g Úitiat tùi chittiám ti̍t chhiàng, Hāu Iúgî "bô siôngsek koh m̄ tha̍kchheh", kinpún sī "chhiauoa̍t Hân Kokjû ê tōa chháupau". N̂g chhītiúⁿ kóng liáu chha chi̍ttiámá, bô kàu khùi. Lán thiaⁿ Lâu Kachhiong ánchóaⁿ kóng,

La̍kgoe̍h cha̍psì chákhí, ithiòng chichhî Tiongkok Kokbîntóng ê chuchhim imga̍k lâng Lâu Kachhiong tī bīnchheh hoat bûn piáusī, i kakī khòaⁿliáu Hāu Iúgî tī Chèngtī Tāiha̍k kah ha̍kseng ê tappiān liáuāu, chiah thiatté liáukái, Hāu Iúgî "M̄nā sī chi̍tê chháupau, i chháupau lāité liân chi̍t ki chháu to bô","lâng mn̄g tang i ìn sai, līphó͘ kàu chīnpōng, o͘pe̍h loān kóng". Lâu Kachhiong kóng, bīntùi tâikha Tāiha̍kseng ê the̍hmn̄g, Hāu Iúgî ê ìntap náchhiūⁿ "chho͘tiongseng" ê thêngtō͘, sūāu ha̍kseng kā Hāu Iúgî chù 56 pun bô ki̍pkeh. Lâu Kachhiong jīnûi ánne sǹg sī "chiok tionghō͘"ah.

　　 Chin chē lâng iáu m̄chai iáⁿ Hāu Iúgî sī chháupau! Koh khah m̄chai iáⁿ Hāu Iúgî sī chi̍tê lāité liân chi̍t ki chháu to bô ê chháupau! 　　　　(231208)



Pe̍h-ōe-jī-pán/白話字版



《 Le̍k-sek toán-phêng 》　　 Lí Lâm-hêng

　　　 Iáu-ū lâng m̄-chai iáⁿ Hāu Iú-gî sī chháu-pau!

Cha̍p-jī-goe̍h chhe-sì, Tiong-kok Kok-bîn-tóng chiàⁿ, hù chóng-thóng chham-soán-jîn Hāu Iú-gî, Tiō Siáu-khong kah kēng-pān cho͘-chit-pō͘ hù tiàu-chi̍p-jîn Chiā Liông-kài, khì kàu Tâi-lâm-chhī Chhit-kó͘-khu koan-sim kng-tiān, lô͘-cha būn-tê, jî-chhiáⁿ chhiam-sú "hoán put-tong chèng-tiān ê liân-sú-su". Hāu Iú-gî kóng, i khòaⁿ-tio̍h hó-hó chhân, hî-un lóng hông ēng lâi chèng-tiān, Tâi-lâm bí-lē ê thó͘-tē, seng-thài lóng hông phò-hoāi liáu-liáu, oân-choân lóng bô khó-lī lông-hî-bîn ê seⁿ-kè, jî-chhiáⁿ ē chō-sêng Jia̍t-tó Hāu-èng, siàu-liân lâng siūⁿ beh tńg-khì kò͘-hiong phah-piàⁿ, lóng khòaⁿ bē tio̍h ki-hōe kah hi-bāng.

　　Hit àm, Tâi-lâm chhī-chèng-hú tio̍h piáu-sī,"M̄-thang ūi-tio̍h chèng-tī bo̍k-tek it-chài hoān-chhò jî-chhiáⁿ chhò kah siuⁿ lī-phó͘!" 2019 nî saⁿ-goe̍h, Môa-tāu bûn-tàn tng-teh khui-hoe iáu bōe kiat-kó, Chiā Liông-kài bat loān kóng ū 200 bān kin bûn-tàn hông hiat-sak tī Chan-bûn-khe po͘ , koh ū phah iáⁿ-phìⁿ,"tian-tò sī-hui". Chit piàn kā iâm-thoaⁿ tē kóng choh hî-tiān kiōng-seⁿ àn tiûⁿ,"lóng sī lām-sám kóng"! Tâi-lâm chhī-chèng-hú mā ū chè-chok"thài-iông kng-tiān káⁿ ē chō-sêng Jia̍t-tó hāu-èng?" "káⁿ ū-iáⁿ chin chē hó-hó chhân hông ēng lâi chèng-tiān?" téng kng-tiān sió chai-bat tô͘-khah,têng-chheng iâu-giân m̄ sī sū-si̍t, chhiáⁿ m̄-thang thiaⁿ sìn!"Jia̍t-tó hāu-èng" sī chí to͘-chhī pí chiu-ûi tē-khu un-tō͘ khah koân ê hiān-siōng, Tâi-oân thài-iông kng-tiān-pán bīn-chek pēng bô ta̍t-kàu to͘-chhī kui-bô͘, m̄ sī thôaⁿ-giân só͘ kóng ê. Jî-chhiáⁿ hó-hó chhân mā bē hông ēng lâi chèng-tiān, kin-kì 2020 nî chhit-goe̍h siu-chèng ê "lông-gia̍p chú-koán ki-koan tông-ì lông-gia̍p ēng tē piàn-keng sú-iōng sím-cha chok-gia̍p iàu-tiám" kui-tēng, hān-chè te̍k-tēng lông-gia̍p-khu kah ióng-si̍t hî-gia̍p seng-sán khu lāi, lóng bē sái piàn-keng siat-tì kng-tiān.

Iú-koan Tiong-kok Kok-bîn-tóng chóng-thóng chham-soán-jîn Hāu Iú-gî kóng "kng-tiān-pán ē chō-sêng Jia̍t-tó hāu-èng", "phò-hoāi seng-thài". Cha̍p-jī-goe̍h chhe-gō͘, Bîn-chìn-tóng chóng-thóng chham-soán-jîn Lōa Chheng-tek hoán-kek kóng, kng-tiān sán-gia̍p bô hun Nâ Le̍k chip-chèng lóng sī kok-ka chèng-chhek, kng-tiān bē tòa-lâi Jia̍t-tó hāu-èng, bē éng-hióng kàng-hō͘ liōng, mā bē chō-sêng thian-káu-jia̍t, che sī ki-pún ê kho-ha̍k siông-sek. Chi̍t-ê chóng-thóng chham-soán-jîn "eng-kai ū ki-pún ê kho-ha̍k siông-sek", jīm-hô hāu-soán-jîn to bē sái ūi-tio̍h soán-kí lī-ek thiau-kang kā Tâi-lâm-chhī, kng-tiān sán-gia̍p " tah phiau-thâu".

　　 Cha̍p-jī-goe̍h chhe-gō͘, Tâi-lâm chhī-tiúⁿ N̂g Úi-tiat tùi chit-tiám ti̍t chhiàng, Hāu Iú-gî "bô siông-sek koh m̄ tha̍k-chheh", kin-pún sī "chhiau-oa̍t Hân Kok-jû ê tōa chháu-pau". N̂g chhī-tiúⁿ kóng liáu chha chi̍t-tiám-á, bô kàu khùi. Lán thiaⁿ Lâu Ka-chhiong án-chóaⁿ kóng,

La̍k-goe̍h cha̍p-sì chá-khí, it-hiòng chi-chhî Tiong-kok Kok-bîn-tóng ê chu-chhim im-ga̍k lâng Lâu Ka-chhiong tī bīn-chheh hoat bûn piáu-sī, i ka-kī khòaⁿ-liáu Hāu Iú-gî tī Chèng-tī Tāi-ha̍k kah ha̍k-seng ê tap-piān liáu-āu, chiah thiat-té liáu-kái, Hāu Iú-gî "M̄-nā sī chi̍t-ê chháu-pau, i chháu-pau lāi-té liân chi̍t ki chháu to bô","lâng mn̄g tang i ìn sai, lī-phó͘ kàu chīn-pōng, o͘-pe̍h loān kóng". Lâu Ka-chhiong kóng, bīn-tùi tâi-kha Tāi-ha̍k-seng ê the̍h-mn̄g, Hāu Iú-gî ê ìn-tap ná-chhiūⁿ "chho͘-tiong-seng" ê thêng-tō͘, sū-āu ha̍k-seng kā Hāu Iú-gî chù 56 pun bô ki̍p-keh. Lâu Ka-chhiong jīn-ûi án-ne sǹg sī "chiok tiong-hō͘"ah.

　　 Chin chē lâng iáu m̄-chai iáⁿ Hāu Iú-gî sī chháu-pau! Koh khah m̄-chai iáⁿ Hāu Iú-gî sī chi̍t-ê lāi-té liân chi̍t ki chháu to bô ê chháu-pau! 　　　　(231208)




十二月初四，中國國民黨正、副總統參選人侯友宜、趙少康kah競辦組織部副召集人謝龍介，去到台南市七股區關心光電、爐碴問題，而且簽署「反不當種電ê連署書」。侯友宜講，伊看tio̍h好好田、魚塭lóng hông用來種電，台南美麗ê土地、生態lóng hông破壞了了，完全lóng無考慮農漁民ê生計，而且ē造成熱島效應，少年人想beh轉去故鄉拍拚，lóng看bē tio̍h機會kah希望。

　　Hit暗，台南市政府tio̍h表示，「M̄-thang為tio̍h政治目的一再犯錯而且錯kahsiuⁿ離譜！」2019年三月，麻豆文旦當teh開花猶未結果，謝龍介bat亂講有200萬斤文旦hông hiat-saktī曾文溪埔、koh有拍影片，「顚倒是非」。Chit遍kā鹽灘地講作漁電共生案場，「lóng是濫糝講」！台南市政府mā有製作「太陽光電敢ē造成熱島效應？」「敢有影真chē好好田hông用來種電？」等光電小知識圖卡，澄清謠言m̄是事實，請m̄-thang聽信！「熱島效應」是指都市比周圍地區溫度khah koânê現象，台灣太陽光電板面積並無達到都市規模，m̄是傳言所講ê。而且好好田mā bē hông用來種電，根據2020年七月修正ê「農業主管機關同意農業用地變更使用審查作業要點」規定，限制特定農業區kah養殖漁業生產區内，lóng bē使變更設置光電。

有關中國國民黨總統參選人侯友宜講「光電板ē造成熱島效應」、「破壞生態」。十二月初五，民進黨總統參選人賴清德反擊講，光電產業無分藍綠執政lóng是國家政策，光電bē帶來熱島效應、bē影響降雨量，mā bē造成天狗熱，che是基本ê科學常識。一個總統參選人「應該有基本ê科學常識」，任何候選人都bē使為tio̍h選舉利益刁工kā台南市、光電產業「貼標頭」。

　　十二月初五，台南市長黃偉哲對chit點直唱，侯友宜「無常識koh m̄讀冊」，根本是「超越韓國瑜ê大草包」。黃市長講了差一點á、無夠氣。咱聽劉家昌按怎講：

六月十四早起，一向支持中國國民黨ê資深音樂人劉家昌tī面冊發文表示，伊家己看了侯友宜tī政治大學kah學生ê答辯了後，才徹底瞭解，侯友宜「M̄-nā是一個草包，伊草包內底連一枝草都無」、「人問東伊應西、離譜到盡磅，烏白亂講」。劉家昌講，面對台腳大學生ê提問，侯友宜ê應答那像「初中生」ê程度，事後學生kā侯友宜注56分無及格。劉家昌認為án-ne算是「足忠厚」ah。

　　真chē人猶m̄知影侯友宜是草包！Koh khah m̄知影侯友宜是一個內底連一枝草都無ê草包！　　　　(231208)