《綠色短評》

 | | | 轉寄

Kā「中華民國」hit頂「ē變ân ê頭kho͘」pak掉！

作者 李南衡, ChoânTâijī/全台字 by Chng Hūiphêng 2021.05.02

Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》　　　　　　　　　　　　　　　 Lí Lâmhêng 　　　　　
Kā "Tionghôa Bînkok" hit téng "ē piàn ân ê thâukho͘" pak tiāu!

Bat khòaⁿkòe 《 Seiûkì 》chit pún chheh ê lâng, lóng ittēng tùi Sun Ngō͘khong thâukhak téng hit téng "ē piàn ân ê thâukho͘ " ìnsiōng chiâⁿ chhim. Hōngbēng chi̍tlō͘ póhō͘ Samchiōng khì Ìntō͘ chhú keng ê Sun Ngō͘khong búgē kokiông, tānsī nā siókhóa bô sūn Sanchōng ê ì, Sanchōng tio̍h ē sûisî liām "ân kho͘ chó͘", “omnibeimeihóng”, i jú liām thâukho͘ tio̍h ē jú ân, Sun Ngō͘khong ê thâu tio̍h ē jú thiàⁿ, thiàⁿ kah kiò m̄ káⁿ. Goânlâi Koanim Jûlâihu̍t chaiiáⁿ Sun Ngō͘khong ài súi, the̍h chi̍t téng hoe bōá siâⁿ i, Sun Ngō͘khong khòaⁿtio̍h sûisî the̍h khílâi tì, i tongjiân m̄chaiiáⁿ bōá lāité chhàng chi̍tê "ē piàn ân ê thâukho͘", tì lo̍hkhì ê sî bô te̍kpia̍t kámkak, ittàn tì lo̍hkhì tio̍h pak bē lo̍hlâi.

　　1971 nî cha̍pgoe̍h jīgō͘, tē 26 kài Liânha̍pkok tāihōe téngbīn, chiū Alupania téng 23 kok thêàn"hoeho̍k Tionghôa Jînbîn Kiōnghôkok tī Liânha̍pkok cho͘chit tiong ê ha̍phoat khoânlī būntê "chìnhêng piáukoat, Liânha̍pkok tāihōe tē 2758 hō koatgī, thongkòe ê koatgī lāṳông tiōngtiám sī, sêngjīn Tionghôa Jînbîn Kiōnghôkok chènghú sī Tiongkok tī Liânha̍pkok cho͘chit ê îit ha̍phoat tāipiáu, jîchhiáⁿ sûisî kā Chiúⁿ Κàichio̍h ê tāipiáu ùi i tī Liânha̍pkok cho͘chit kah só͘ sio̍k itchhè kikò͘ tiong só͘ huihoat chiàmniá ê se̍kūi kóaⁿ chhut khì. Chū ánne, Tiongkok tùi Tâioân kakī tì ê hit téng "Tionghôa Bînkok" "ē piàn ân ê thâukho͘"chiok hoaⁿhí, Tiongkok nā bēsóng, i tio̍h liām"ân kho͘ chó͘", “chi̍tê Tiongkok”, Tâioân thâukhak tio̍h thiàⁿ·sí, bētàng tī kokchè siāhōe chhunkha chhutchhiú, bētàng chhamka Liânha̍pkok siongkoan ê kokchè cho͘chit, chin chē kokka m̄káⁿ kah Tâioân kiànkau.

　　 Bíkok sîkan sìgoe̍h cha̍pkáu, iû Bíkok Chiònggīīⁿ Gōakau Úigoânhōe Athài siócho͘ Bînchútóng chek chúse̍k Bela(Ami Bera) , Kiōnghôtóng chèng Gīoân Khòtisu(Joⁿh Curtis), Chiònggīīⁿ "Kokhōe Tâioân Liânsòaⁿ" sì ūi kiōngtông chúse̍k Siahpò(Steve Chabot), Silesu(Albio Sires), TiaPála̍t(Mario DiazBalart) kah Konnoli(Gerald Connolly) kiōngtông thêchhut "Tâioân Kokchè Thoânkiat Hoatàn", hoatàn chíchhut, Liânha̍pkok tē 2758 hō koatgī pēng bô chhúlí Tâioân kah Tâioân jînbîn tī Liânha̍pkok ah sī chiupiⁿ cho͘chit tāipiáu koân ê būntê, mā bô tī Tionghôa Jînbîn Kiōnghôkok kah Tâioân koanhē téngbīn chháichhú siáⁿ khoán ê li̍ptiûⁿ, ah sī pauhâm jīmhô iúkoan Tâioân chúkoân ê sengbêng. Hoatàn piáusī, Bíhong hoántùi jīmhô bô Tâioân jînbîn tôngì hē, siūⁿ beh káipiàn Tâioân tēūi ê chhiònggī; hoatàn í "Kokhōe ìkiàn" piáusī, Bíkok chènghú engkai kó͘lē bêngiú tângphōaⁿ, hoántùi Tiongkok siahjio̍k Tâioân kah pangkaukok, hui pangkaukok ê koanhē. Hoatàn iaukiû Bíkok Kokbūkheng tī nîtō͘ pòkò tiong, siôngsè kóng Tiongkok kòekhì, hiānchāi tī kokchè cho͘chit tiong, ū chò siáⁿmi̍h siahjio̍k Tâioân hōeoân ahsī koanchhatoân sinhūn ê chokûi.

　　 Liânha̍pkok tē 2758 hō koatgī jī thâu jībóe lóng bô kóngtio̍h Tâioân kah Tâioân jînbîn, lán engkai kóaⁿkín kakī pak tiāu"Tionghôa Bînkok" hit téng "ē piàn ân ê thâukho͘". Tiongkok nā koh liām "ân kho͘ chó͘ " : “chi̍tê Tiongkok”, kah lán Tâioân, Tâioân lâng bô koanhē, thâukhak bē thiàⁿ, Tâioân ē chiok khinsang.

　　 Lán cháchá tio̍h engkai kā "Tionghôa Bînkok" hit téng "ē piàn ân ê thâukho͘" pak tiāu! (210423)
Chù, Bíkok kokhōe gīoân () lāi ê goânmiâ bián liām

Pe̍h-ōe-jī-pán/白話字版
　　　Kā "Tiong-hôa Bîn-kok" hit téng "ē piàn ân ê thâu-kho͘" pak tiāu!

Bat khòaⁿ-kòe 《 Se-iû-kì 》chit pún chheh ê lâng, lóng it-tēng tùi Sun Ngō͘-khong thâu-khak téng hit téng "ē piàn ân ê thâu-kho͘ " ìn-siōng chiâⁿ chhim. Hōng-bēng chi̍t-lō͘ pó-hō͘ Sam-chiōng khì Ìn-tō͘ chhú keng ê Sun Ngō͘-khong bú-gē ko-kiông, tān-sī nā sió-khóa bô sūn San-chōng ê ì, San-chōng tio̍h ē sûi-sî liām "ân kho͘ chó͘", “om-ni-bei-mei-hóng”, i jú liām thâu-kho͘ tio̍h ē jú ân, Sun Ngō͘-khong ê thâu tio̍h ē jú thiàⁿ, thiàⁿ kah kiò m̄ káⁿ. Goân-lâi Koan-im Jû-lâi-hu̍t chai-iáⁿ Sun Ngō͘-khong ài súi, the̍h chi̍t téng hoe bō-á siâⁿ i, Sun Ngō͘-khong khòaⁿ-tio̍h sûi-sî the̍h khí-lâi tì, i tong-jiân m̄-chai-iáⁿ bō-á lāi-té chhàng chi̍t-ê "ē piàn ân ê thâu-kho͘", tì lo̍h-khì ê sî bô te̍k-pia̍t kám-kak, it-tàn tì lo̍h-khì tio̍h pak bē lo̍h-lâi.

　　1971 nî cha̍p-goe̍h jī-gō͘, tē 26 kài Liân-ha̍p-kok tāi-hōe téng-bīn, chiū Alupania téng 23 kok thê-àn"hoe-ho̍k Tiong-hôa Jîn-bîn Kiōng-hô-kok tī Liân-ha̍p-kok cho͘-chit tiong ê ha̍p-hoat khoân-lī būn-tê "chìn-hêng piáu-koat, Liân-ha̍p-kok tāi-hōe tē 2758 hō koat-gī, thong-kòe ê koat-gī lāi-iông tiōng-tiám sī, sêng-jīn Tiong-hôa Jîn-bîn Kiōng-hô-kok chèng-hú sī Tiong-kok tī Liân-ha̍p-kok cho͘-chit ê î-it ha̍p-hoat tāi-piáu, jî-chhiáⁿ sûi-sî kā Chiúⁿ Κài-chio̍h ê tāi-piáu ùi i tī Liân-ha̍p-kok cho͘-chit kah só͘ sio̍k it-chhè ki-kò͘ tiong só͘ hui-hoat chiàm-niá ê se̍k-ūi kóaⁿ chhut khì. Chū án-ne, Tiong-kok tùi Tâi-oân ka-kī tì ê hit téng "Tiong-hôa Bîn-kok" "ē piàn ân ê thâu-kho͘"chiok hoaⁿ-hí, Tiong-kok nā bē-sóng, i tio̍h liām"ân kho͘ chó͘", “chi̍t-ê Tiong-kok”, Tâi-oân thâu-khak tio̍h thiàⁿ-·sí, bē-tàng tī kok-chè siā-hōe chhun-kha chhut-chhiú, bē-tàng chham-ka Liân-ha̍p-kok siong-koan ê kok-chè cho͘-chit, chin chē kok-ka m̄-káⁿ kah Tâi-oân kiàn-kau.

　　 Bí-kok sî-kan sì-goe̍h cha̍p-káu, iû Bí-kok Chiòng-gī-īⁿ Gōa-kau Úi-goân-hōe A-thài sió-cho͘ Bîn-chú-tóng chek chú-se̍k Bela(Ami Bera) , Kiōng-hô-tóng chèng Gī-oân Khò-ti-su(Joⁿh Curtis), Chiòng-gī-īⁿ "Kok-hōe Tâi-oân Liân-sòaⁿ" sì ūi kiōng-tông chú-se̍k Siah-pò(Steve Chabot), Silesu(Albio Sires), Tia-Pá-la̍t(Mario Diaz-Balart) kah Kon-no-li(Gerald Connolly) kiōng-tông thê-chhut "Tâi-oân Kok-chè Thoân-kiat Hoat-àn", hoat-àn chí-chhut, Liân-ha̍p-kok tē 2758 hō koat-gī pēng bô chhú-lí Tâi-oân kah Tâi-oân jîn-bîn tī Liân-ha̍p-kok ah sī chiu-piⁿ cho͘-chit tāi-piáu koân ê būn-tê, mā bô tī Tiong-hôa Jîn-bîn Kiōng-hô-kok kah Tâi-oân koan-hē téng-bīn chhái-chhú siáⁿ khoán ê li̍p-tiûⁿ, ah sī pau-hâm jīm-hô iú-koan Tâi-oân chú-koân ê seng-bêng. Hoat-àn piáu-sī, Bí-hong hoán-tùi jīm-hô bô Tâi-oân jîn-bîn tông-ì hē, siūⁿ beh kái-piàn Tâi-oân tē-ūi ê chhiòng-gī; hoat-àn í "Kok-hōe ì-kiàn" piáu-sī, Bí-kok chèng-hú eng-kai kó͘-lē bêng-iú tâng-phōaⁿ, hoán-tùi Tiong-kok siah-jio̍k Tâi-oân kah pang-kau-kok, hui pang-kau-kok ê koan-hē. Hoat-àn iau-kiû Bí-kok Kok-bū-kheng tī nî-tō͘ pò-kò tiong, siông-sè kóng Tiong-kok kòe-khì, hiān-chāi tī kok-chè cho͘-chit tiong, ū chò siáⁿ-mi̍h siah-jio̍k Tâi-oân hōe-oân ah-sī koan-chhat-oân sin-hūn ê chok-ûi.

　　 Liân-ha̍p-kok tē 2758 hō koat-gī jī thâu jī-bóe lóng bô kóng-tio̍h Tâi-oân kah Tâi-oân jîn-bîn, lán eng-kai kóaⁿ-kín ka-kī pak tiāu"Tiong-hôa Bîn-kok" hit téng "ē piàn ân ê thâu-kho͘". Tiong-kok nā koh liām "ân kho͘ chó͘ " : “chi̍t-ê Tiong-kok”, kah lán Tâi-oân, Tâi-oân lâng bô koan-hē, thâu-khak bē thiàⁿ, Tâi-oân ē chiok khin-sang.

　　 Lán chá-chá tio̍h eng-kai kā "Tiong-hôa Bîn-kok" hit téng "ē piàn ân ê thâu-kho͘" pak tiāu! (210423)
Chù, Bí-kok kok-hōe gī-oân () lāi ê goân-miâ bián liām

　　　　　Kā「中華民國」hit頂「ē變ân ê頭kho͘」pak掉！

Bat看過《西遊記》chit本冊ê人，lóng一定對孫悟空頭殼頂hit頂「ē變ân ê頭kho͘」印象誠深。奉命一路保護三藏去印度取經ê孫悟空武藝高強，但是nā小khóa無順三藏ê意，三藏tio̍hē隨時唸「ân kho͘咒」：“om-ni-bei-mei-hóng”，伊jú唸頭kho͘ tio̍hējú ân，孫悟空ê頭tio̍hējú疼，疼kah叫m̄敢。原來觀音如來佛知影孫悟空愛súi，the̍h一頂花帽á siâⁿ伊，孫悟空看tio̍h隨時the̍h起來戴，伊當然m̄知影帽á內底藏一個「ē變ân ê頭kho͘」，戴落去ê時無特別感覺，一旦戴落去tio̍h pak bē落來。

　　1971年十月二五，第26屆聯合國大會頂面，就Alupania等23國提案「恢復中華人民共和國tī聯合國組織中ê合法權利問題」進行表決，聯合國大會第2758號決議，通過ê決議內容重點是：承認中華人民共和國政府是中國tī聯合國組織ê唯一合法代表，而且隨時kā蔣介石ê代表ùi伊tī聯合國組織kah所屬一切機構中所非法佔領ê席位趕出去。自按呢，中國對台灣家己戴êhit頂「中華民國」「ē變ân ê頭kho͘」足歡喜，中國nābē爽，伊tio̍h唸「ân kho͘咒」：“chi̍t-ê Tiong-kok”，台灣頭殼tio̍h疼死，bē-tàngtī國際社會伸腳出手，bē-tàng參加聯合國相關ê國際組織，真chē國家m̄敢kah台灣建交。

　　美國時間四月十九，由美國眾議院外交委員會亞太小組民主黨籍主席Bela（Ami Bera）、共和黨眾議員Khò-ti-su（John Curtis）、眾議院「國會台灣連線」四位共同主席Siah-pò（Steve Chabot）、Silesu（Albio Sires）、Tia-Pá-la̍t（Mario Diaz-Balart）kah Kon-no-li（Gerald Connolly）共同提出「台灣國際團結法案」，法案指出，聯合國第2758號決議並無處理台灣kah台灣人民tī聯合國ah是周邊組織代表權ê問題，mā無tī中華人民共和國kah台灣關係頂面採取啥款ê立場，ah是包含任何有關台灣主權ê聲明。法案表示，美方反對任何無台灣人民同意下，想beh改變台灣地位ê倡議；法案以「國會意見」表示，美國政府應該鼓勵盟友同伴，反對中國削弱台灣kah邦交國、非邦交國ê關係。法案要求美國國務卿tī年度報告中，詳細講中國過去、現在tī國際組織中，有做啥物削弱台灣會員ah是觀察員身分ê作為。

　　聯合國第2758號決議字頭字尾lóng無講tio̍h台灣kah台灣人民，咱應該趕緊家己pak掉「中華民國」hit頂「ē變ân ê頭kho͘」。中國nākoh唸「ân kho͘咒」:“chi̍t-ê Tiong-kok”，kah咱台灣、台灣人無關係，頭殼bē疼，台灣ē足輕鬆。

　　咱早早tio̍h應該kā「中華民國」hit頂「ē變ân ê頭kho͘」pak掉！ (210423)
註：美國國會議員（）內ê原名免唸