《《一位台灣女信徒ê自述》》

 | | | 轉寄

第三章_23）李登輝先生一家來訪

作者 吳月娥, 台譯：Lîm Chùn-io̍k 2021.05.16

有一工，一个婦人chhōa一个九歲ê chabó͘ gín’á來病院，阮翁診斷她是得tio̍h感冒。完成治療，beh離開診療室ê時，hit’ê婦人看tio̍h齒科治療室，to̍h講：「後日，我chhōa阮kiáⁿ來，chiah請你kā伊檢查一下á嘴齒。」Chit位ná親像日本夫人hiahnih有禮貌ê女士，我聽她講她有一个十一歲ê chapo͘ gín’á kah兩个chabó͘ kiáⁿ。隔tńg工，chit位婦人chhōa in kiáⁿ koh來病院，講in chabó͘ kiáⁿ ê病情有khah好勢，她想beh koh再the̍h一工份ê藥á。講soah，她看in kiáⁿ，用真優雅ê語氣講：「Chit’ê gín’á若是食冷á是食燒ê物件，to̍h講伊嘴齒ē疼。請你kā伊檢查一下。」Hit’ê gín’á坐起lih治療椅了後，我問講：「你叫啥物名？」伊真有元氣回答講：「李憲文，十一歲，tòa tī民生東路226巷。」我kā伊檢查，結果是下排倒pêng ê後chan蛀齒；chit齒嘴齒是六歲ê時發ê永久性嘴齒，需要治療；到第三pái治療ê時，to̍h kā它補好勢。

Tī治療ê期間，我kah chit位曾文惠夫人有各方面ê交談；她是台北第三高等女學校ê畢業生，in翁李登輝先生是農復會ê職員。她真有氣質koh真明理，阮隨時to̍h講話真投機；阮無koh再是患者kah醫生ê關係，卻開始變成朋友ê交陪。

一段時間了後，她chhōa身體koh樣ê翁婿來看病。李登輝博士bat去東京留學，所以阮to̍h談起tī東京ê共同記憶；伊kantaⁿ比阮翁少三歲，所以感覺kahná真熟sāi。Hit時，頭一pái ê台北市長選舉當teh進行，高玉樹kah周百鍊兩人是候選人。候選人ê演講tī台北市四界teh舉行，阮翁kah李登輝先生時常相招去聽暗時ê演講會。In通常ē約tī九點鐘做伙去，m̄koh，阮翁患者chē，tiāⁿtiāⁿ bē赴；tī chit種情形下，李先生有時tio̍h tī二樓聽鴻玉彈鋼琴。

後來我知影李登輝先生是淡水中學ê畢業生，而且kah我ê小弟吳光輝tī宿舍tòa仝房。我mā是淡水高女ê畢業生，若是阮hit時to̍h相bat，chitmákiámchhái ē有koh khah chē共同記憶ê話題。因為阮是李先生ê厝邊，所以後來tiāⁿtiāⁿ ài去往診。無gōa久，夫人kā我講李先生已經去美國留學，她mā最近beh去美國kah伊會合。

李登輝先生ê tāichì暫時按下，tī chia先來講khah以後ê tāichì。 1972年，我ê chabó͘ kiáⁿ鴻玉beh kah王旭昭舉行婚禮，我to̍h去美國。He是一个四界lóng真súi koh清氣ê國家，我kui个人hō͘ 她迷去；結果，四、五年後，阮全家移民到美國，tī紐約定居。

阮就ánne無koh有機會kah李登輝先生厝裡ê人見面，m̄koh tī美國ê時，當我聽講李先生當選台北市長ê時，我起初感覺是不可思議，m̄koh阮翁隨時寫一封祝賀ê phoe hō͘ 伊，李市長mā有回函hō͘ 阮。當阮全家當teh歡喜，koh聽講伊被任命做台灣省主席ê時，阮koh一pái感覺大歡喜。有一工，紐約ê《世界日報》刊登一篇有關「李登輝省主席訪問紐約」ê記事，講伊beh tī唐人街ê第一酒店，kah紐約ê華僑舉行座談。Hit時，阮翁tī一間日本病院（靜岡縣御殿場ê駿東第一病院）工作，bētàng去參加，所以我to̍h chhōa tī Flushing外科病院teh培訓ê志靖kah simpū婉容去見省主席。阮去到第一酒店，m̄koh因為當teh餐宴，阮soah無法度入去內底，所以阮to̍h tī外面等餐會結束。當阮tī門口teh se̍h來se̍h去ê時，附近出現一對青年男女，而且hit’ê女ê手裡the̍h一包物件。「Khah sèjī leh，kám準備好勢à？」In ê chit句話hō͘我感覺不安；in kám ē是台灣獨立運動人士？Chìn前，獨立運動人士tī蔣經國先生來到紐約ê時，bah引起問題。

Τī酒店內面ê李登輝先生kahná是發生啥物tāichì，因為忽然tī阮頭前有五台真有派頭ê烏頭á車駛óa來，一陣身穿燕尾服koh漢草真好ê chapo͘人大腳步行，坐入去車內；李先生mā tī hit中間。阮chông óa去，m̄koh伊已經入去車內，車就ánne駛離開去。阮bē明白in ná ē hiahnih倉pōng離開；若是阮有機會tútio̍h李先生，to̍h ētàng kā伊問一下。李登輝先生chitmá是台灣ê總統，我想，beh kah伊見面ê機會是jú困難ā。 李登輝先生被任命做副總統來協助蔣經國總統；有人講伊是蔣經國tī山球（golf）場ê好球友，chiah ē受提拔。M̄koh，蔣經國往生了後，伊升任總統，這是伊ê好字運，mā是天註定ê。

李登輝先生熱愛台灣人民，為台灣付出真大ê努力；台灣人民mā疼伊。自國民黨統治台灣以來to̍h有ê戒嚴法已經tī伊ê任內廢除；tī廢除chìn前，m̄知有gōa chē台灣人無辜被關入去火燒島ê政治監獄，甚至被thâi。這以外，久長ê一黨政治已經消失，政府mā許可組織新政黨。今á日；台灣有國民黨、民主進步黨kah新黨。1996年三月，台灣mā有實現頭一pái ê全民總統選舉，李登輝先生得tio̍h絕大多數ê選票，當選台灣四百年來頭一位民選ê總統。我想beh hoah出：「李登輝總統，萬歲！」

伊是一个熱心ê基督徒；請謙卑仰望上帝ê慈愛kah真理，做上帝ê忠實奴僕，來治理國家。