《《一位台灣女信徒ê自述》》

 | | | 轉寄

第三章_19）Τī頭城共同開設綜合病院

作者 吳月娥, 台譯：Lîm Chùn-io̍k 2021.04.11

1959年，kah往常仝款，許嘉代、鍾啓芳、林再萬kah陳朝章chit四位好朋友醫生聚集做伙。Hit時，有人提議四人來共同開設一間大型病院，對頭城鎮做出大貢獻。四人lóng感覺有興趣，就繼續推進chit’ê構想，而且終其尾有kā它實現。病院ê場所是設tī頭城初中附近ê郊區，四人合資購買土地，了後起造一間現代化ê大病院；院長是由阮翁許嘉代擔任。開幕hit工，有來自宜蘭縣各地ê醫生kah首長來參加慶典，盛況空前。Chit間病院有設X光室、手術室kah檢查室，tī田庄來講，是一間設備齊全ê病院。四个醫生kā kakī ê診所關起來，lóng來病院診療病人。M̄koh，過無gōa久，in tútio̍h一个想bē到ê問題，to̍h是因為指定beb看某某醫生ê患者人數增加，致使有ê醫生tùi早到晚lóng真無閒，有ê卻kui工lóng無tāichì做。四人之間當然開始有bē爽快ê氣氛，結局tī兩年後病院to̍h解散，四人koh tńg去kakī ê診所；理想kah現實beh並行是行bē通ê。