《《一位台灣女信徒ê自述》》

 | | | 轉寄

第三章_17）鴻玉轉學去台北ê中山國小

作者 吳月娥, 台譯：Lîm Chùn-io̍k 2021.04.25

小學五年級ê鴻玉ta̍k禮拜六tio̍h去台北上鋼琴課，致使拜六一直tio̍h ài kā學校請假，所以，阮考慮beh kā她轉學去台北。有一工，當我去台北ê時，我kah朋友林明爵小姐參詳，她講：「我ê chabó͘ kiáⁿ和惠一向lóng是kakī一个人，若是lín chabó͘ kiáⁿ鴻玉轉學，來tòa阮tau，to̍h ē khah鬧熱，和惠ē真歡喜。」和惠hit時是台北第一高女ê四年級，大鴻玉四歲。明爵小姐是tùi宜蘭市去讀淡水高女，是koân我兩屆ê前輩。她ê家族mā是基督教徒，她ê老父是宜蘭教會ê長老，阿媽kah老母mā lóng是真熱心ê教徒。

明爵女士tùi淡水高女畢業了後，進入東京女子藥學專科學校，tī東京ê時，我有koh kah她做伙，阮lóng是台灣青年會ê成員，時常做伙活動。她tī熱烈ê戀愛了後，kah tī青年會熟sāi ê林和引先生結婚。1943年左右，和惠tī東京出世；了後無gōa久，in to̍h tńg來台灣，林先生就任台北基督教青年會ê總幹事。後來伊創立東元電機公司，m̄koh五十歲ê時to̍h因為破病來過往；伊是宗教界kah商業界ê大人物，伊ê過往hō͘ 人真m̄甘。和惠小姐tùi東京ê音樂學校畢業了後tńg來台灣，擔任台灣師範大學ê音樂教授到taⁿ。Chitmá台灣東元電機公司ê董事長黃茂雄先生是和惠女士ê翁婿。1993年，鴻玉tùi美國tńg來台灣，tī台北市ê國家音樂廳舉辦獨奏會ê時，mā得tio̍h和惠女士ê熱心協助。

感謝明爵女士ê好意，阮決定kā鴻玉託她看顧。其他ài辦ê是學校ê tāichì；郭馬西牧師娘chhōa我去拜訪馬偕病院ê前院長呂革令醫師ê夫人石邦雪女士，她koh chhōa阮去拜訪台北中山國民學校ê林正洲校長。林校長願意接受鴻玉ê轉學，koh決定hō͘ 她加入五年級吳瑞霞老師hit班。邦雪女士講，鴻玉tú來chit間學校，一定ē有無方便ê所在，所以她to̍h案內阮去tī第三分局對面ê中山北路開業ê邱新醫師夫婦in tau。邱醫師夫人to̍h是邦雪女士ê小妹，她ê第二chabó͘ kiáⁿ邱雅惠小姐mā是吳瑞霞老師ê學生。