《台语kah魔术》

 | | | 转寄

五月节0505

作者 苏晏德 2023.06.18

五月节(台语文) Goō-goe̍h-cheh

五月初五肉粽节 Goō-goe̍h chhe-goō Bah-chàng-cheh
阿妈缚粽来送礼 A-má pa̍k-chàng lâi sàng-lé
肉粽毋通食伤济 Bah-chàng m̄-thang chia̍h siuⁿ-chē
若无嘛会伤身体 Nā-bô mā-ē siong sin-thé

五月初五缚肉粽 Goō-goe̍h chhe-goō pa̍k bah-chàng
相招做伙挂香芳 Sio-chio chò-hóe kòa hiuⁿ-phang
香芳会当赶蠓虫 Hiuⁿ-phang ē-tàng kóaⁿ báng-thâng
予咱丰收好年冬 Hoō lán hong-siu hó-nî-tang

五月初五扒龙船 Goō goe̍h chhe-goō pê-lêng-chûn
锣鼓齐响有气氛 Lô-koó chê-hiáng ū khì-hun
拚看啥人着冠军 piàⁿ khòaⁿ siáⁿ-lâng tio̍h koan-kun
祝咱风调阁雨顺 Chiok lán hong-tiâu koh ú-sūn

五月初五来插艾 Goō-goe̍h chhe-goō lâi chhah-hiāⁿ
保咱身体较勇健 Pó lán sin-thé khah ióng-kiāⁿ
逐家插艾伫门埕 Ta̍k-ke chhah-hiāⁿ tī mn̂g-tiâⁿ
台湾平安向前行 Tâi-oân pêng-an hiòng-chêng-kiâⁿ