《台语kah魔术》

 | | | 转寄

228ê台湾

作者 苏晏德 2020.02.23

228ê台湾(台语文) 228 ê Tâi-oân(Tâi-gí-bûn)

一九四七二二八 It-kiú-sù-chhit jī-jī-pat
国民党军大屠杀 Kok-bîn tóng-kun tōa-toó-sat
受难家属真毋值 Siū-lān ka-sio̍k chin m̄-ta̍t
悲惨历史咱爱捌 Pi-chhám le̍k-sú lán ài bat

一九四七二二八 It-kiú-sù-chhit jī-jī-pat
军队共咱当做贼 Kun-tūi kā lán tòng-chò chha̍t
手予铁线来拍结 Chhiú hoō thih-sòaⁿ lâi phah-kat
无地伸冤受铳杀 Bô-tè sin-oan siū chhèng-sat

一九四七二二八 It-kiú-sù-chhit jī-jī-pat
国民政府无站节 Kok-bîn chèng-hú bô chām-chat
军队攑铳来恐吓 Kun-tūi gia̍h-chhèng lâi khióng-hat
看你袂顺着开杀 Khòaⁿ lí bē sūn tio̍h khai-sat

一九四七二二八 It-kiú-sù-chhit jī-jī-pat
人民反抗无气力 Jîn-bîn hoán-khòng bô khùi-la̍t
政府冷血像墨贼 Chèng-hú léng-hiat chhiūⁿ ba̍k-cha̍t
死者冤魂罩密密 Sí-chiá oan-hûn tà ba̍t-ba̍t