《台语kah魔术》

 | | | 转寄

元宵节0115

作者 苏晏德 2024.02.18

元宵节(台语文) 苏晏德

正月十五元宵节
Chiaⁿ-goe̍h cha̍p-goō Goân-siau-cheh
庙口搬戏人真济
Biō-kháu poaⁿ-hì lâng chin-chē
全家备办圆仔粞
Choân-ke pī-pān îⁿ-á-chhè
手攑鼓灯来游街
Chhiú gia̍h kóo-teng lâi iû-ke

正月十五是上元
Chiaⁿ-goe̍h cha̍p-goō sī Siōng-goân
全家团圆真温暖
Choân-ke thoân-îⁿ chin un-loán
大大细细来下愿
Tōa-tōa-sè-sè lâi hē-goān
祈求上帝佑台湾
Kî-kiû Siōng-tè iū Tâi-oân

正月十五来平溪
Chiaⁿ-goe̍h cha̍p-goō lâi Pêng-khe
十分老街有够kheh
Cha̍p-hun-lāu-ke ū-kàu kheh
下愿天灯四界飞
Hē-goān thian-teng sì-kè pe
平安喜乐元宵暝
Pêng-an hí-lo̍k Goân-siau-mê

正月十五来盐水
Chiaⁿ-goe̍h cha̍p-goō lâi Kiâm-chúi
盐水蜂炮像霆雷
Kiâm-chúi phang-phàu chhiūⁿ tân-lûi
元宵暗暝有够媠
Goân-siau àm-mê ū-kàu súi
亲像大开的花蕊
Chhin-chhiūⁿ tōa-khui ê hoe-lúi