《歷史上ê主耶穌》

 | | | 轉寄

第十四章_三1 耶穌受難kah最後ê晚餐

作者 杜英助 台譯：Lîm Chùn-io̍k 2021.03.21

三）Poâⁿ過節最後ê晚餐（公元30年四月4日禮拜三暗時）

Chit工暗時，日時頭過去，日頭落山，自下晡點起to̍h是偤太人ê Poâⁿ過節；耶穌chhōa門徒tńg來耶路撒冷ê錫安山途中，發落彼得kah約翰先入去城內，為in預備Poâⁿ過節ê宴席；in由一个the̍h一罐水ê人chhōa路，kah伊進入去一个厝裡，就對hit家ê主人（大家lóng認定伊to̍h是馬可，所以chit間厝就叫做馬可樓）講：「老師講：我ê時到（ài做上帝ê羊羔，為世間人贖罪），我beh kah我ê門徒tī你ê厝裡守Poâⁿ過節。」伊to̍h ē chhōa lín去看一間排設齊全ê樓頂大廳，lín to̍h tī hia預備Poâⁿ過節ê宴席。

是án怎偤太人ê一工是tùi日落算起到隔工ê日落chìn前為止？因為in認為上帝創造天地ê時，先有烏暗之夜了後chiah有光照tī暗時，出現日時；所以，Poâⁿ過節是tùi日落（下晡五點）開始算。Poâⁿ過節ê宴席，耶穌kah門徒最後ê晚餐照偤太人所準備ê食物是：無酵餅（出埃及記12：15、18、19）、羊羔肉、酒（葡萄酒）kah苦菜等等，koh tio̍h準備一瓶洗手á是洗腳ê水。

食無酵餅是為tio̍h beh記念上帝hō͘ in永遠無bē記得in tī倉倉pōng-pōng中出埃及ê hit暝，無時間等麵粉發酵chiah做餅來食；所以，tī麵粉iáu未發酵所做出來ê餅，叫做無酵餅。當in全家ê人做伙食Poâⁿ過節ê宴席ê時，家長（老父）tio̍h對厝裡ê人koh再傳述一遍in ê祖先án怎行出埃及做奴隸之地ê故事，hō͘大家知影！

Tī食Poâⁿ過節宴席chìn前，偤太人一定tio̍h先洗塵，耶穌以主人ê身分mā為門徒一一洗腳，並用束腰ê手巾擦ta；輪到洗彼得ê腳ê時，彼得對主耶穌講：「你絕對bē-tàng洗我ê腳！」耶穌回答伊講：「我若無kā你洗，你kah我to̍h無關係à。」就án-ne，彼得講：「主ah，m̄-nā是我ê腳，連手kah頭mā tio̍h洗！」耶穌kā伊解說講：「凡若洗過身軀ê人無需要koh再洗，只要kā腳一洗，kui身軀to̍h ē清氣à。Lín是清氣ê，m̄-koh無lóng是清氣ê。」因為chit時，耶穌早to̍h知影，tī門徒中beh出賣祂ê是tó一位。所以，耶穌雖然mā照常彎腰為伊（偤大）洗腳，m̄-koh洗清氣外表ê身軀，tī伊心內ê意念（惡念）却洗bē清氣。是án怎？因為tī hit時，「魔鬼已經kā出賣耶穌ê意思hē tī加略人西門ê kiáⁿ猶大ê心。。」（約翰13：2）

是án怎耶穌beh為門徒洗腳？祂對門徒解說講：「我對lín所做chiah-ê tāi-chì，lín kám有明白？Lín稱呼我『老師』，mā稱呼我『主』，lín án-ne稱呼無m̄-tio̍h，因為我to̍h是。 14 我做『主』，做『老師』，都teh kā lín洗腳，lín mā tio̍h互相洗腳。我有留好模樣hō͘ lín，是beh hō͘ lín thang照我對lín所做ê去做。m̄-koh，tī lín中間，有一个hō͘我洗腳ê人（偤大）koh kah我做伙食飯ê人會悖逆我！」（約翰13：12-18），真正是可惡！Chit時，偤大雖然聽tio̍h耶穌暗示ê話，iáu m̄知好悔悟，因為魔鬼已經進入伊ê心內。

食暗頓ê時，耶穌知影天父已經kā萬物交tī祂ê手內底，而且知影祂是tùi天父上帝出來ê，koh beh tńg去到天父上帝hia。M̄-koh，祂心內卻憂愁，擔心偤大無法度回頭是岸；就án-ne，第三pái koh再明確向門徒宣布：「我實實在在kā lín講，lín中間有一个人beh出賣我。」此時此刻，偤大iáu假做伊m̄知耶穌teh指伊？門徒mā彼此相看，看bē出耶穌teh講ê人是啥人？一个一个問耶穌講：「主，應該m̄是我ho͘ⁿh？」耶穌所疼ê一个門徒（約翰）mā緊靠óa耶穌ê胸坎問祂：「主ah，是啥人？」Chit時，耶穌並無指名是啥人？Iáu teh期待偤大ē-tàng改過自新。M̄-koh，撒旦既然進入伊ê心內，牙齒根咬leh，to̍h是m̄悔改！所以，耶穌不得不kā伊ê身分透露出來，講：「我ùn一塊餅hō͘ 啥人，to̍h是啥人。」就kā餅tāi先the̍h hō͘ 加略人西門ê kiáⁿ偤大，而且kā伊講（並無指責伊）講：「你ài做ê，緊去做！」眾門徒chit時iáu bē明白耶穌ê意思，認為祂是叫管錢袋ê偤大帶手裡ê錢去買過節所需要ê物件，來賑濟sàn-chhiah人！（約翰13：1-30）

偤大出去了後，耶穌the̍h起餅來祝福，就peh開，the̍h hō͘門徒講：「Lín the̍h去食，這是我ê身軀。」koh the̍h起杯來祝謝，koh再the̍h hō͘門徒，講：「Lín lóng lim chit-ê，因為這是我立約ê血，為真chē人流來ê血，hō͘ 罪得赦。」（象徵耶穌是tī Poâⁿ過節被宰殺ê上帝ê羊羔），「Lín tio̍h án-ne行，來記念我。」食暗頓ê時，耶穌koh賜hō͘ 門徒一條新ê誡命：「Lín tio̍h相疼，親像我bat疼lín。Lín mā tio̍h照án-ne相疼。 35 Lín若相疼，眾人會就án-ne來知lín是我ê門徒。」（約翰13：34-35）。Chit條新ê誡命，通稱「新約」。

話講mā真奇怪！當耶穌kā門徒講偤大beh出賣祂，而且已經出去à，門徒iáu不知情，猜想偤大是beh出去做善事，á是為主做王鋪路，soah爭論當耶穌做王ê時，看in中間啥人算siōng大？（路加22：24）耶穌to̍h是kā in講：「Lín中間做大ê tio̍h親像序細，做頭人ê tio̍h親像差用ê。啥物人khah大？是坐桌ê人客á是走桌ê人？Kám m̄是坐桌ê人客？M̄-koh，我tī lín中間親像teh做走桌ê人。」耶穌koh應允講：「我tī試煉中，tiāⁿ-tiāⁿ kah我同在ê to̍h是lín。」所以「Hō͘ lín thang tī我ê國度kah我做伙坐桌lim食，koh坐tòa寶座來審判以色列十二个支族。」（馬太19：28）