《歷史上ê主耶穌》

 | | | 轉寄

第十一章_5 前往耶路撒冷ê路徑

作者 杜英助 台譯：Lîm Chùn-io̍k 2020.11.22

五）耶穌登koân山顯榮

離開拿因經過書念，耶穌chhōa門徒chiūⁿ加利利境內ê一座koân山—他泊山，這是離開凱撒利亞腓立比8天以後ê tāi-chì。Chit時，耶穌chhōa彼得、約翰kah雅各chiūⁿ山去祈禱，iáu有9个門徒kah其他ê跟tòe者留tī山kha；當teh祈禱ê時，耶穌ê面貌改變，衫褲潔白發光，忽然有摩西kah以利亞兩个人kah耶穌講話。In tī榮光裡顯現，談論耶穌teh beh往生ê tāi-chì，to̍h是祂tī耶路撒冷teh beh完成為罪人贖罪ê大事。當彼得看tio̍h摩西kah以利亞兩人teh beh kah耶穌分離ê時，伊對耶穌講：「主ah，咱tī chia真好！你若願意，我to̍͘h tī chia搭三座棚á，一座為你、一座為摩西、一座為以利亞。」當彼得講chiah-ê話ê時，有一朵雲彩來遮in，而且有聲音tùi雲彩裡出來講：「這是我所疼ê kiáⁿ，我所kah意ê，lín tio̍h聽祂ê話！」

是án怎耶穌chiūⁿ山變貌顯榮ê時ē出現摩西kah以利亞兩人，á無其他ê chìn前人物？因為摩西代表上帝ê誡命kah律法，以利亞代表眾先知ê教示。耶穌講：律法kah先知書ê總綱to̍h是「你tio̍h盡心、盡性、盡力，盡意疼主你ê上帝。Chit-ê siōng要緊，mā是頭一个誡命。，第二條mā仝款，tio̍h疼厝邊親像家己。」（馬太22：37～40、馬可12：28～34、路加10：27）

「律法」按照希伯來話ê字義to̍h是「教導」，是以色列人ê生活準則（申命記4：8、約書亞1：7、以斯拉7：10、耶利米31：33）；以色列人kah撒瑪利亞人承受舊約前五卷：創世記、出埃及記、利未記、民數記kah申命記當做是律法ê冊。 根據希伯來ê聖經分法，先知書thang分做前先知書kah後先知書。前者有：約書亞記、士師記、路得記、撒母耳記上下、列王記上下。後者koh分做大先知書，有：以賽亞書、耶利米書、以西結書等三本；小先知書有：何西阿書、約珥書、阿摩司書、俄巴底亞書、約拿冊、彌迦書、那鴻冊、哈巴谷書、西番雅書、哈該書、撒迦利亞書kah瑪拉基書。

耶穌講：「眾先知kah律法ê預言到約翰ê時為止。」（馬太11：13、路加16：16）M̄-koh耶穌來，祂講：「M̄-thang想講我來ê目的是beh廢除摩西ê律法á是先知ê教示。我來m̄是beh廢除，是beh成全。」（馬太5：17）究竟耶穌beh án怎成全？Chit-ê問題to̍h是摩西kah以利亞出現tī他泊山頂kah耶穌講話ê重點。

伊ê結論to̍h是耶穌chit pái去耶路撒冷，ē hō͘ 人出賣，受苦，被釘十字架，tī十字架頂成做上帝ê羊羔，流出寶血來為罪人贖罪。死去，被埋葬，三工了後koh活；當耶穌tī十字架頂斷氣chìn前，祂hoah一聲「Taⁿ一切lóng完成ā！」（約翰19：30），chit瞬間to̍h是祂來世chiūⁿ成全律法kah眾先知ê教示ê時。所以tī聖殿被羅馬兵拆毀了後，全部虔誠ê偤太人到chit-má，就lóng無人koh再thâi cheng牲獻祭，做人贖罪ê祭祀à。

耶穌變貌顯榮，停留tī山頂kan-taⁿ有一工，第二工早起時，祂to̍h chhōa門徒落山，醫好一个hō͘ 邪靈附身ê gín-á（馬太17：14～18、馬可9：14～27、路加9：37～43）。眾人對耶穌所行ê神跡善事驚kah gāng去ê時，祂koh對門徒預言祂tī山頂kah摩西、以利亞所談論ê tāi-chì，講：「Chiah-ê話lín tio̍h注意聽，因為人子teh beh hō͘人出賣交去hō͘人ê手頭ā。。」（馬太17：22～23、馬可9：30～32、路加9：44）