《歷史上ê主耶穌》

 | | | 轉寄

第八章_一2 耶穌踏上傳道之路

作者 杜英助 台譯：Lîm Chùn-io̍k 2020.07.05

2）耶穌受魔鬼試探：照路加ê記載chit-ê學說，耶穌受洗ê時有聖神kah-ná粉鳥降tī祂身上（路加3：22），所以「耶穌hō͘ 聖神充滿，tùi約旦河tńg來，聖神kā祂引chhōa到曠野（m̄是hō͘魔鬼chhōa去曠野），四十工受魔鬼ê試探。」（路加4：1、2）；究竟耶穌禁食40暝日，後來to̍h餓ā，魔鬼用啥物問題（方法）來試探耶穌？主要ê問題to̍h是tī向耶穌質問：「你若是上帝ê Κiáⁿ，祢就ē-tàng用ka-kī ê能力á是自由意志來證明看māi！

a）耶穌tī曠野禁食祈禱ê所在位置，是tī耶利哥城北郊ê試探山（Quarantal意思是40暝日），tī山麓有幾nā个野獸tòa ê山洞；希臘東正教會tī其中ê一个khah大ê山洞起造一座頭一pái耶穌受魔鬼試探ê禮拜堂。位置是tī siōng西端ê小山洞內，有一塊天然 形ê盤石，根據研判：耶穌to̍h是tī chit塊 形ê盤石頂面跪leh，向天父上帝祈禱。

目前試探山ê修道院，是tī第19世紀ê時由希臘東正教會，tī一个早期教堂ê遺址頂面起造ê，耶穌tī chit所在禁食40工，過靈修祈禱禁食ê生活，kan-taⁿ靠洞口ê泉水飲用而已。所以禁食40工了後，因為無食任何食物，腹肚當然ē感覺真iau，真想beh食物件；魔鬼siōng知影人ê需要，牠kah-ná真體貼來對耶穌講：「你若是上帝ê Κiáⁿ，ē-tàng吩咐chiah-ê石頭變成食物。」人類身軀siōng基本ê需要to̍h是民生問題，解決民生問題siōng主要ê方法，mā是siōng重要ê一件tāi-chì to̍h是滿足食慾，食到飽！M̄-koh chit 時，耶穌竟然引用經句來回答魔鬼ê頭一个試探講：「人ê活命m̄是kan-taⁿ óa靠餅，是óa靠tùi上帝ê嘴所講出來ê每一句話。」（申8：3，太4：4）

魔鬼ài耶穌聽牠ê話，耶穌卻引用聖經ê話來回應牠。頭一个試探魔鬼叫耶穌重視肉體ê需要，對上帝無忠實；m̄-koh耶穌頭尾順從天父上帝ê話，對魔鬼教示講：上帝ê話是性命ê糧，比肉體ê食物koh khah重要！

Tī試探山ê曠野寸草不生，koh khah無野蜜樹，所以無草蜢koh無野蜜thang食，kan-taⁿ有一塊一塊ê石頭而已；其實來到試探山耶穌禁食祈禱靈修ê山洞內，連一塊石頭mā無，魔鬼叫耶穌聽牠ê話，kā石頭變成餅，若m̄是叫耶穌行神跡，明明to̍h是天方夜譚！

Ē記得上帝創造亞當ê時，魔鬼對亞當ê bó͘ 夏娃試探，mā是針對人食慾ê需要，魔鬼對夏娃指樹á頂hit粒看tio̍h to̍h kah意ê果子，講：「上帝kám真正講，m̄准lín食園中所有樹á頂ê果子？」夏娃明明知影上帝kā in講：「園中樹á頂ê果子，咱thang食，獨獨田園中hit欉（分別善惡之樹）樹á頂ê果子…bē-sái食，mā bē-tàng摸，免得lín死。」M̄-koh，魔鬼卻欺騙夏娃講：「Lín無一定ē死；因為上帝知影，lín食ê日子目chiu to̍h ē光起來，lín to̍h ē親親像上帝ē-tàng知影善惡。」

就án-ne，夏娃抵擋bē-tiâu魔鬼ê引誘，bē-tàng克制私慾kah食慾，「見hit欉樹ê果子thang做食物，mā看tio̍h to̍h kah意，而且是thang喜愛ê，ē-tàng hō͘人有智慧，就挽落來食，koh hō͘ 她ê丈夫，她丈夫mā食à。」（創世記3：1～6） 是án怎夏娃kah亞當m̄聽從上帝ê話？因為in聽信魔鬼甜言蜜語ê白賊話講：「Lín無一定ē死。」；「無一定」ê tāi-chì，無把握ê tāi-chì lóng ē引人失敗，行到「死」地！耶穌贏過魔鬼ê頭一个試探，to̍h是聽從、順服上帝ê話，koh引用上帝ê話來贏過魔鬼ê計謀！

b）魔鬼用一pái ê白賊話騙過夏娃kah亞當，hō͘人悖逆上帝ê話來犯罪；魔鬼用仝款對食慾上ê需要叫耶穌聽牠ê話卻失敗à！心內非常「m̄甘願」，就án-ne koh 再向耶穌進行第二pái試探，chhōa祂到耶路撒冷聖殿頂上，對耶穌講：「你若是上帝ê Κiáⁿ，thang跳落去去，因為經上有記載講：『上帝會命令祂ê天使來保護祢。In會用手kā祢扶teh，hō͘祢ê腳bē觸tio̍h石頭。』（詩篇91：11、12）」（馬太4：6），魔鬼知影耶穌引用聖經頂面上帝ê話來贏過牠ê試探。Chit時，牠mā引用聖經ê話來試探耶穌，有夠厲害！

魔鬼真正是聰明，第二pái試探，牠chhōa耶穌chiūⁿ到上帝聖殿ê殿頂koân，真詳細引用聖經ê話來試探耶穌到底kám bē聽從牠ê話。耶穌知影天父上帝tī祂受洗ê時已經tùi天頂向人證實：「Chit-ê是我所疼ê Kiáⁿ，祂是我真正kah意ê。」（馬太3：17），所以，祂m̄免koh再聽從魔鬼ê建議kah試探，來tī聖殿ê頂koân跳落去hō͘ tī殿下ê群眾看，來證實祂to̍h是上帝ê Κiáⁿ！天父上帝ê證言已經夠額，何必koh再用其它ê方法，自作聰明來證明ka-kī是m̄是上帝ê Κiáⁿ。魔鬼引用chit句聖經ê話，ài耶穌ka-kī來向人證明祂是上帝ê Κiáⁿ，可見牠引用ê經文用m̄-tio̍h所在à。

詳細查考詩篇91篇ê原意，寫chit句話ê作者是講：上帝tòa tī至koân ê隱密kah敵人看bē-tio̍h ê所在，一定保護凡若投靠祂ê人，tī伊被敵人包圍ê時，祂ē命令祂ê使者tī伊所行ê一切道路裡保護伊，m̄是tùi殿頂跳落去；祂koh ài tī伊所行ê一切道路裡，若是tú-tio̍h崎嶇不平ê路面，tio̍h用手kā伊托tiâu-.leh，免得hō͘ 伊ê腳tú-tio̍h石頭soah來跋倒受傷。

耶穌知影魔鬼真正錯用上帝ê話來試探祂，所以，耶穌直言回答魔鬼講：「M̄-thang試探主—你ê上帝。」（馬太4：7）耶穌所回答ê chit句話mā是引用申命記6：16「Lín m̄-thang試探上主—lín ê上帝。」因為án-ne，可見引用聖經ê話bē-tàng斷章取義，一定tio̍h明白經文前後句ê原意。

關係聖殿ê殿頂，一般解經家大多數lóng認定位置是tī西牆頂端，祭司teh過年過節ê時所khiā ê一塊pûn號筒之石磐；chit塊祭司pûn號筒所khiā ê大石磐，tī公元70年被羅馬兵攻佔耶路撒冷聖殿ê時，聖殿被拆毀，á chit塊石磐mā被sak落去聖殿西牆（哭牆）外ê路邊，留到taⁿ。

c）魔鬼對耶穌所做ê第三pái試探是chhōa祂到一座koân山頂（馬太講「koân ê山」，路加講「kôan ê所在」），「Nih一下目to̍h kā天下ê萬國lóng指hō͘ 祂看，對祂講：『Chiah-ê一切ê權勢kah榮光我lóng beh hō͘祢，因為chiah-ê一切已經lóng交hō͘我，chhut-chāi我beh hō͘啥人。所以，祢若跪落來拜我，chiah-ê一切lóng beh hō͘祢。」（路加4：5、馬太4：8、9）

聖殿ê siōng kôan所在（殿頂）kah世間siōng kôan ê山，這是teh指世間siōng頂層ê人所khiā ê位置：權威、權力、榮華、富貴kah財寶lóng la̍k tī手頭，而且有掌握人民ê生死大權；m̄-koh khiā tī siōng kôan所在ê人，伊ê性命mā是siōng危險，所以，當伊出門ê時lóng tio̍h有真chē經過嚴格訓練ê侍衛tī伊ê前後左右層層保護。因為án-ne，有一句話講：「高處不勝寒。」雖然kôan ê所在有bē堪得ê寒，m̄-koh，ta̍k ê政治家lóng野心勃勃，想出所有ê辦法來爭奪kôan ê所在ê siōng kôan位。

魔鬼向耶穌講：「祢若仆落來拜我，chiah-ê一切我lóng beh hō͘祢。」（馬太4：9）Chiah-ni̍h簡單！只要向魔鬼拜一下to̍h ē-tàng得tio̍h世間萬國kah萬國ê榮華。做全世界ê霸王啥人無想beh ài？M̄-koh，耶穌知影祂本來to̍h是「萬王之王、萬主之主、和平ê君王」，祂tó位需要koh再向魔鬼仆落來拜，做牠ê傀儡？就án-ne，耶穌對魔鬼責備講：「撒旦，閃開！有記載：Tio̍h拜主—你ê上帝，獨獨服事祂。』（申命記6：13）」（馬太4：10） 　　
魔鬼第三pái試探耶穌ê kôan ê所在，根據聖經學者認定，是tńg來到試探山ê山峯，tī山頂ē-tàng àⁿ看耶哥城ê榮景，以及耶利哥城附近希律王建設ê豪華ê夏宮ê美景。 路加講，耶穌tī曠野，tī聖殿ê siōng kôan所在（殿頂）kah世間ê koân山，接受「魔鬼所有ê試探lóng用完，就暫時離開耶穌。」（路加4：13），因為án-ne，可見魔鬼試探耶穌三試三敗，心內非常「m̄甘願」，事後，iáu ē chhōe時機koh來試探耶穌，無kā耶穌謀害，牠ê心內絕對不服！Kám有可能？