《歷史上ê主耶穌》

 | | | 轉寄

第七章_3.4 Τtī約旦河傳道ê行洗禮約翰

作者 杜英助 台譯：Lîm Chùn-io̍k 2020.06.07

三）行洗禮約翰ê出世經過

1）撒迦利亞照祭司輪班ê班次進入聖殿，tī上帝面前執行祭司ê職份。因為伊是祭司長，所以，伊有資格進入聖所，單獨tī香壇（tī金燈台kah陳設餅桌之間）燒香，為以色列人代禱，á是為ka-kī ê私事向上帝祈禱。當伊為人民祈禱ê時，有主ê使者khiā tī香壇ê正pêng對伊顯現，講：「撒迦利亞，m̄免驚，因為上帝已經聽tio̍h你ê祈禱。你ê bó͘以利沙白beh生kiáⁿ，你tio̍h kā伊號名叫做約翰。。」（《全民台語聖經》路加1：8-13）

天使koh對撒迦利亞講：「你ē歡喜koh快樂；真chē人mā ē為tio̍h伊ê出世來歡喜。因為伊tī主ê面前beh做大人物，葡萄酒kah一切ê酒lóng m̄-thang hō͘ 伊lim。伊tī母身就hō͘ 聖神充滿。伊會hō͘以色列kiáⁿ孫真chē人oa̍t tńg來歸向主，to̍h是in ê上帝。伊會用以利亞ê精神kah才能做主ê先鋒，hō͘父母kah kiáⁿ兒和好，hō͘ 悖逆ê人回心轉意來跟tòe義人ê智慧，hō͘人民準備心來迎接主。」（《全民台語聖經》路加1：14-17）

路加講：撒迦利亞kah伊利莎白in兩人tī上帝面前lóng是義人，遵行主ê一切誡命禮儀無thang指摘（chí-tek）ê；m̄-koh，in兩人年紀lóng老邁（ló-māi）à，一直lóng無gín-á，所以，當撒迦利亞聽tio̍h天使án-ne kā伊講，伊就向天使請教：「我憑啥物thang知影chit項事？我已經老ā，我ê bó͘ mā年紀老邁à。」

天使長加百列kā伊講：「我kā chit-ê好信息報hō͘你，到時chit-ê話一定ē應驗，只是因為你m̄信，你一定ē啞口，無法度講話，直到chit項事成就ê日子。」

路加續落來koh講：以色列人民tī聖所外面thèng候撒迦利亞，m̄-nā真奇怪伊是án怎tī殿裡真久lóng無出來，到伊出來beh問伊發生啥物tāi-chì，伊koh無法度kah in講話，kan-taⁿ向in比手勢，成做啞口！真奇怪ah!（路加1：8～23）

2）當伊利莎白有娠六個月ê時，天使長加百列koh到拿撒勒，去kā一位已經做hō͘ 約瑟ê在室女馬利亞講：「妳beh有娠生kiáⁿ，thang kā伊號名叫做耶穌，伊beh做大，稱做至koân者ê kiáⁿ，主上帝beh kā伊ê祖先Ta-bi̍t ê位hō͘ 伊，伊beh做雅各家ê王，直到永遠；伊ê國mā無窮盡。」

當馬利亞忽然聽tio̍h天使長加百列向她án-ne講，心內非常困惑koh驚，問天使講：「我無出嫁，án怎有chit項事？」何況…？對馬利亞ê疑問，天使回答她講：「聖神ē臨到你ê身上，至koân者ê能力ē致蔭你，所以，你beh生ê聖者，一定稱做上帝ê kiáⁿ。何況你ê親chiâⁿ（阿姨）伊利莎白，tī年老ê時，mā懷cha-po͘胎；to̍h是素來稱做bē生育ê，chit-má有孕六個月à。因為出tī上帝ê話，無一句bē帶能力ê。」 為tio̍h證實天使向馬利亞所講ê話是真實ê，馬利亞就起身趕緊tùi拿撒勒往耶路撒冷去到偤大ê一座城，名叫隱加琳（Ein Karem)ê祭司城，她自細漢長大ê阿姨伊利莎白kah撒迦利亞ê厝，去kā阿姨請安。Τī伊利莎白腹內ê cha-po͘嬰á聽tio̍h馬利亞ê請安，隨時tī腹肚內跳動，hō͘馬利亞知影她ê阿姨確實按照天使向她講ê話有娠六個月à。Chit時，伊利莎白mā知影馬利亞雖然未婚mā tùi聖神感孕有gín-á，to̍h hō͘聖神感動，大聲hoah講：「眾婦人人ê中間你得tio̍h福氣，你所懷孕ê胎兒mā得tio̍h福氣。…。」馬利亞mā謙卑相信講：「因為祂看顧女婢ê卑微。Tùi taⁿ以後，萬世代ê人lóng會講我有福氣。」（路加1：39～56）

3）行洗禮約翰tī伊ê老母伊利莎白ê產期到ê時就出世；hit時，馬利亞看見行洗禮約翰出世以後，心內充滿歡喜，就tńg來拿撒勒，thèng候tī她腹肚內ê嬰á ê出世；m̄-koh koh khah重要ê tāi-chì，to̍h是tī腹肚內ê嬰á iáu未出世chìn前，beh án怎hō͘未婚夫約瑟知影她腹肚內ê嬰á確實是tùi聖神感孕á是tùi上帝ê kiáⁿ投胎ê？

4）當行洗禮約翰出世ê時，伊ê老父撒迦利亞終其尾hō͘ 聖神充滿，開始講預言，而且確信上帝tī Ta-bi̍t厝內興起拯救ê角，伊講：「Chit-ê gín-á beh稱做至koân者ê先知，ài tī主ê面前，預備伊ê道路。」意思to̍h是beh做主ê先鋒，為主預備救恩ê道路。

行洗禮約翰出世第8工，伊ê父母to̍h kā伊行割禮，按照伊ê老母ê意思kā伊號名叫做約翰；伊ê老父tī伊iáu未開嘴講話ê時，別人早to̍h問伊ài kā chit-ê gín-á叫啥物名？伊mā tī一塊板頂面寫講伊ê名是約翰，意思是講：Chit-ê gín-á是上帝ê恩典，上帝所賞賜ê。（路加1：57～66）

四、行洗禮約翰成長ê第二故鄉昆蘭

1）路加對有關行洗禮約翰ê成長輕描淡寫，kan-taⁿ講：「Hit-ê gín-á漸漸長大，心靈健壯，tòa tī曠野，直到伊顯明tī以色列人面前公開出現ê日子。」

根據史料所記載，行洗禮約翰早耶穌半年出世；tī耶穌出世ê時，希律王為tio̍h驚有一位新生王出世，將來ē代替伊作偤太人ê王，所以下令kā凡若出世tī伯利恆kah伊ê周圍城鄉2歲以下ê嬰á全部thâi死。撒迦利亞因為m̄肯向希律王透露chit位偤太人ê新生王出世tī啥物地方，soah遭遇希律王ê部下thâi死。所以，行洗禮約翰自細漢to̍h變成孤兒；tī真chē聖家庭ê畫圖中，mā kan-taⁿ見tio̍h馬利亞抱小耶穌ê時，小約翰tī小耶穌ê邊á陪伴sńg。有時tī畫圖中mā kan-taⁿ加小約翰ê老母伊利莎白在內，看bē-tio̍h小約翰ê老父撒迦利亞；tī畫圖中所看tio̍h ê cha-po͘人，to̍h是teh指養飼小耶穌ê約瑟。

因為小約翰出世以後父母to̍h kā伊獻hō͘上帝，koh遵照天使向in所講ê話kā伊養育，無hō͘伊lim淡酒á是厚酒，因為伊自細漢（tī老母ê腹肚裡）to̍h hō͘ 聖神充滿。雖然老父tī伊一歲ê時to̍h hō͘希律王ê侍衛兵殘害來死，m̄-koh tī伊ê成長中，身軀tī老母ê細膩照顧下猶原真強壯；長大成人（13歲）以後，伊無留tī耶路撒冷聖殿像in老父做祭司，m̄-koh tī伊身上有以利亞先知ê能力，學伊過簡單樸素ê生活，tī偤大曠野tòa（路加1：80）。直到伊公開tī以色列人面前出現ê日子（30歲），to̍h是羅馬皇帝提庇留在位第15年（公元26年）；hit時chūn上帝ê話臨到伊，伊chiah到約旦河一帶ê所在，宣講悔改ê洗禮，hō͘罪得赦（路加３：1～3）。

究竟行洗禮約翰tòa tī曠野做啥物？路加並無詳細描述，m̄-koh照伊所tòa ê曠野環境來看，當時tī偤大曠野ê死海附近有一个昆蘭（Qumran)社區，真chē虔誠ê偤太人lóng離開耶路撒冷ê城市，到chia生活來共同修道，過禁慾、清靜、簡單樸素ê靈修生活；平常日子ê工作，in除了自力更生、自給自足以外，lóng tī羊皮卷頂面抄寫經文。Tī抄寫以賽亞先知書ê時，thèng候彌賽亞ê日子來臨。Tī chit-ê社區內面有一个蓄水池（á是叫淨身池），提供住民ta̍k工tī排定ê時間到chia來做潔淨身軀ê禮儀（m̄是洗身軀、浸禮），chit種淨身禮儀tī耶路撒冷ê聖殿四kho͘ 圍，mā有幾个chit種潔身ê水池。

Toà tī昆蘭社區ê偤太教徒通稱愛色尼派ê人（Essenes)，凡若beh加入昆蘭社區生活者，一定tio̍h是cha-po͘人，而且tio̍h禁慾，無結婚，財產歸公，做伙生活，做伙食飯kah做伙工作。Chit-ê修道ê社群大約tī公元前200年ê時來chia定居，直到公元後70年，偤太人背叛羅馬政府，耶路撒冷被燒毀，á chia mā被羅馬兵拆毀，住民被殘殺，所有ê建設變成廢墟。M̄-koh tī 1947年，一位阿拉伯ê牧羊人因為chhōe迷羊，tī chit-ê社區ê山洞裡無意中發見tio̍h聖經古卷抄本（死海抄本聖卷）。此後，chit-ê所在to̍h成做考古學家chhōe聖經古抄本ê重要地點來出名，被發見ê聖經抄本成做神學家研究聖經ê寶藏。

話講tńg來，行洗禮約翰tī chit-ê社區內tòa kah生活，到30歲ê時伊to̍h離開去附近ê偤大曠野傳道，而且tī約旦河為人行洗禮，hō͘ 認罪悔改ê人因為淨身ê禮儀洗去身上ê罪ê污穢。Chit-ê禮儀咱稱做「洗禮」，有人譯做「浸禮」；tī信主ê時受洗是基督徒信仰告白ê聖禮典。

約翰tī曠野離群獨居，身上穿用駱駝毛織成ê衫褲，腰束皮帶，食ê是草蜢kah野蜜樹ê果子（m̄是野地蜜蜂ê蜂蜜），外表真親像以利亞先知ê款；因為以利亞先知mā是穿粗毛皮衫koh素食，無ài tòa tī鬧熱ê城市，歡喜田庄純樸幽靜ê逸境。以利亞是舊約時代ê先知，á行洗禮約翰chiah是舊約kah新約交接時代siōng尾ê一位先知。