《歷史上ê主耶穌》

 | | | 轉寄

第六章_一5　耶穌ê早年生活

作者 杜英助 台譯：Lîm Chùn-io̍k 2020.05.03

5）東方博士向聖嬰獻禮祝賀（馬太2：1～12）：關係耶穌降生ê故事，路加漏記ê tāi-chì，tú好馬太kā chiah-ê事寫落來à。伊講：Τī希律做王ê時，耶穌生tī偤太ê伯利恆；有幾个博學之士tùi東方來到耶路撒冷，講：「Hit-ê生落來beh做偤太人ê王ê tī tó位？阮tī東方看見祂ê星，特別beh來拜祂。」希律王聽見了後，就心內不安；耶路撒冷全城ê人mā lóng不安。希律王to̍h召集祭司長kah民間ê文士，問in:「基督應該出世tī tó位？」Ιn講：「Τī偤太ê伯利恆。」因為有先知記載講：

「猶太地區ê伯利恆城，
你tī猶太ê眾城中m̄是siōng微細ê，
因為有一个領袖會tùi你hia出來，
祂beh牧養我ê子民—以色列人。」（馬太2：6）

就án-ne，希律王偷偷á召博學之士來，查問hit粒星是啥物時chūn出現ê，to̍h派in往伯利恆去，講：「Lín去詳細chhōe hit-ê細漢嬰á，chhōe-tio̍h就來報信，我mā thang好去拜祂。」

In聽希律王ê話to̍h去，忽然，tī東方所看tio̍h ê hit粒星tī頭前teh引chhōa in，一直行到細漢嬰á所tiàm ê所在就停落來，in看見hit粒星就非常意愛；進去厝內，看見細漢嬰á kah祂ê老母馬利亞，就phak落去拜hit-ê細漢嬰á，phah開寶盒，the̍h出黃金、乳香、沒藥，當做禮物獻hō͘ 祂。In因為tī眠夢中得tio̍h主ê指示，叫in mài tńg去見希律，所以，in to̍h tùi別ê路tńg去ka-kī ê家鄉。

Tī chit段故事中，馬太所講ê「東方博學之士」，tùi第5世紀tī伯利恆主誕堂ê壁堵頂有用彩色馬賽克鑲嵌一幅東方三博士來伯利恆朝拜聖嬰ê圖像，in ê形像kah-ná波斯人；有kóa學者to̍h認為in是tī公元前605年被巴比倫王尼布甲尼撒俘掠去巴比倫ê偤大國ê貴族後代。了後，巴比倫hō͘ 波斯王居魯士消滅ê時，koh再遷徙到波斯ê偤太人餘民。雖然in無kah以斯拉á是尼希米tńg來到耶路撒冷起造城牆、重建聖殿；m̄-koh，in ê kiáⁿ孫留tī波斯，為tio̍h研究以賽亞先知所預言ê偤太人ê新王彌賽亞之來臨，in就tiāⁿ-tiāⁿ做伙研究歷史、預言、詩歌kah星象天文等等學問。

Tī公元前5年3月中間，in忽然發見ta̍k工天光ê時，有一粒特別光iàⁿ-iàⁿ燦爛ê星tī空中發光；經過in研究ê結果，其中有三位星象家確信chit粒明星一定是teh顯示，tī世上已經有一位新生王降生à。就án-ne，in ta̍k人各準備一件極珍貴ê禮物：黃金、乳香kah沒藥beh來向chit位新生王獻禮。

Chit三位東方博士tùi波斯騎駱駝，ta̍k工暗時趁明星出現引路，約行16公里，穿過阿拉伯沙漠，經過一個gōa月chiah行到耶路撒冷；in推測chit-ê新生王一定ē出世tī希律王ê王宮內，所以就帶in所準備ê禮物來晉見希律王，問伊：「Hit位生落來beh做偤太人ê王ê tī tó位？阮tī東方看見祂ê星，特別來拜祂！」Chit時，希律王聽tio̍h chit-ê消息，心內真大tio̍h驚；因為伊tú kā伊親生ê三个想奪伊王位ê 嬰á thâi死，án怎ē有一位新生王koh再出現？就án-ne，伊to̍h召集偤太人ê祭司長kah文士（聖經老師）來問，究竟chit位新生王beh出世tī tó位？In用心詳細查考聖經，查到彌迦書第5章2節講：

「伯利恆以法他，
你tī猶大chiah-ê庄頭中做微細ê，
會有一个tùi你hia出來，
tī以色列中間kā我做掌權ê；
伊ê根源tùi古早，tùi極起頭to̍h有。。」

祭司長kah文士查出chit節彌迦先知預言ê話，心內tháu一口氣；因為tī耶路撒冷通城ê人lóng真驚chit位新生王，若是已經tī聖城出世，通城出世ê嬰á一定ē受災！佳哉，彌迦先知預言講：Ē出世tī伯利恆！就án-ne kā希律王講：「Τī伯利恆城。」

真奇怪kám m̄是！約瑟kah馬利亞tī東方三博士來耶路撒冷chìn前，已經kā聖嬰chhōa來到耶路撒冷二pái：頭一pái是耶穌出世後第8工，chhōa到聖殿行割禮，為耶穌行割禮ê祭司長竟然看bē出來！第二pái是嬰á出世後第40工，耶穌ê父母chhōa祂到聖殿來獻hō͘ 上帝。當時mā有二个老人知影，kiám-chhái希律王á是祭司長認為in兩人lóng真老ā，已經超過80歲ā，講話無路用ê款！

東方三博士照希律王轉告in ê話，夜間看見hit粒明星koh出現tī in ê頭殼頂面，in就tòe hit粒明星ê引chhōa koh再起身；伯利恆tī耶路撒冷ê南方，兩城相離約7公里，所以，東方三博士駱駝騎leh，真緊to̍h來到伯利恆，看見hit粒明星停落來à，in就落駱駝，先問旅店ê老店主，店主講：嬰á ê父母已經去tòa tī另外一个所在ê厝；chit-ê厝是一个岩石洞穴，tī旅店ê附近（行路約4分鐘to̍h到）。所以，tī in chhōe-tio̍h chit-ê岩洞（chit-má當做奶洞聖堂）ê時，就入去朝拜chit位新生王，kā in所帶來ê黃金、乳香kah沒藥獻hō͘ 嬰á耶穌做賀禮。

東方三博士向嬰á耶穌獻禮了後，lio̍h-á歇睏一下，因為in tī夢中得tio̍h主ê指示知影：若是in tńg來到耶路撒冷向希律王報信，希律王一定ē隨時派兵來殺害聖嬰耶穌，所以，hit暗in就tùi別條路tńg來ka-kī ê家鄉。

仝一个暗時，東方三博士走了後，主ê天使kā約瑟託夢，講：「起來，chhōa嬰á kah祂ê老母逃走去埃及，tòa hia到我koh kā你通知，因為希律teh chhōe嬰á beh來kā祂thâi死。」（馬太2：13），約瑟驚醒起來，to̍透暝chhōa 嬰á kah祂ê老母往埃及去，tòa tī hia。

Hit一工暗時，已經beh 69歲ê老希律王一直無睏，tī耶路撒冷王宮守候，等bē-tio̍h hit三位東方博士tńg來向伊報信，心內緊張koh tio̍h急；一到天光koh無看tio̍h in ê影跡，無法度知影hit位出世beh做偤太人ê王究竟出世tī tó位？就án-ne及時命令伊ê衛兵，趕緊tùi王宮kah希律堡兩地出發，去包圍伯利恆，kā伯利恆kah附近田庄兩歲以下ê cha-po͘ 嬰á lóng總thâi盡。這就應驗耶利米先知所講ê話：

「Tī 拉瑪（to̍h是伯利恆）聽tio̍h聲，啼哭koh大悲傷，
拉結（雅各ê愛妻）為她ê kiáⁿ兒teh哭；
m̄肯受安慰，因為in lóng死去à。」（馬太2：18）

根據偤太人歷史家約瑟夫講：希律王年老kāu病，m̄-koh，伊生sêng好色koh生活放蕩，chiah患tio̍h無藥thang治ê性病，無法度親自騎馬，親自去殺害聖嬰耶穌；koh khah khau洗ê是，伊既然驚伊ê親生kiáⁿ繼承伊ê王位，ka-kī ê性命因為疾病纏身，年老臨死chìn前，iáu親手thâi死ka-kī親生ê三个kiáⁿ kah愛妻。總是，hit位稱做「偤太人ê王」ê嬰á耶穌，祂ê父母已經二pái抱祂到耶路撒冷ê聖殿去；近tī目chiu前，m̄-koh駐在安東尼亞堡，暝日監視偤太人聖殿ê羅馬兵竟然不知情；希律王ê王宮tú tī聖殿附近，伊mā m̄知影！Τī聖殿內服事ê祭司長—義人西面kah亞拿女先知看tio̍h、知影，經過約50天koh無向希律王報告。若是希律王早知影，伊mā bē hō͘ 東方三博士欺騙，soah心情受拖磨；á耶路撒冷ê人m̄免驚，伯利恆城kah它ê周圍田庄兩歲以下ê cha-po͘ 嬰á koh khah bē受thâi盡！Κám m̄是？

若是大希律王有學問、有智識koh有智慧，伊是以東人koh是半个偤太人，被羅馬皇帝封做「偤太人ê王」，統治偤太全地。伊若有用心讀經典，而且認bat經典中先知ê預言，一定知影偤太人ê彌賽亞，in所期待ê Ta-bi̍t ê kiáⁿ孫—主基督耶穌ê降生，至少ē有下列5種預兆顯現：

(1) 有一粒明星會出現tī空中，有70天ê暗時伊lóng ē看見；若是伊聰明像東方博士通曉天文星象，伊老早to̍h知影tī偤太地有一位新生王teh beh出世，á是已經出世à。

(2) Chit-ê新生王，chit位嬰á一定會按照先知ê預言出世tī伯利恆。M̄-koh，希律王ka-kī m̄知，koh叫祭司長kah文士來問，可見伊做偤太人ê王，根本都無讀偤太人ê經典，m̄知先知ê預言teh講啥物？

(3) 先知預言：Chit位出世beh做「偤太人ê王」ê 嬰á，一定是Ta-bi̍t王ê kiáⁿ孫。Chit點tī羅馬皇帝奧古斯都下令全國ê人lóng ài tńg去故鄉做戶籍登記ê時，真容易to̍͘h ē-tàng查tio̍h。辦理戶籍ê官員mā知影，卻無向伊報告；可見掌理戶籍ê官員mā無讀經典！

(4) 有星象天文博學之士，ē tùi遠遠ê所在來向chit位嬰á朝拜。

(5) 照以賽亞先知ê預言，chit位嬰á是tùi在室女所生。登記戶籍ê時，約瑟是一个義人，是Ta-bi̍t ê kiáⁿ孫，伊一定ē照實hō͘ 登記戶籍ê官員知影，約瑟是馬利亞所生ê嬰á ê養父！嬰á ê老母是馬利亞！

Tùi以上五項經典常識來看，若是希律王lóng m̄知影，koh向偤太人ê祭司長kah文士請教，可見伊是一位「無知」koh殘暴ê偤太人ê統治者（暴君）。為tio̍h堅固伊ê威權kah王位，kan-taⁿ知影扶tháⁿ羅馬ê皇帝凱撒奧古斯都（屋大維），偤太人非常反感。所以，當伊在位ê時，偤太人bat發動幾nā pái造反。想beh搶伊王位ê人被掠tio̍h ê時，一律用非常殘忍ê方法，下令部下kā in吊死、勒死、石刑、火刑、用劍鑿死，á是hiat hō͘ 毒蛇猛獸咬死，有時強迫in tùi山頂á是高樓跳落來摔死；唯一無用ê方法，to̍h是kan-taⁿ有羅馬總督chiah ē-tàng允准罪人脫掉衫褲，赤身露體受鞭phah了後koh再釘十字架ê酷刑。

希律王chit種處決伊ê反對者，羅馬皇帝既然無kā伊干涉，何況為tio̍h beh除掉一位teh beh接替伊做「偤太人ê王」ê嬰á，羅馬皇帝á是總督當然mā bē chhap，不聞不問。希律王向偤太人課徵重稅，真有錢，伊kan-taⁿ ē開錢用tī大工程ê建設，bē利用錢來「化敵為友」，真正是一个「大戇獃」！一生為tio̍h驚別人造反來搶去伊ê王位，內心受拖磨、精神痛苦、百病纏身來死，有夠可憐！其實，一代暴君往生，大希律王ka-kī mā知無人ē為伊哀哭、傷心、痛惜。 創世記第三章記載亞當kah夏娃被魔鬼化身（偽裝）做一條蛇欺騙，soah食禁果，違背天父上帝ê命令，所以上帝對蛇宣判：「我beh hō͘你kah cha-bó͘人結冤仇，你ê kiáⁿ孫kah她ê kiáⁿ孫mā結冤仇，伊會傷你ê頭殼，你beh傷她ê腳後teⁿ。」（創世記3：15），chia ê cha-bó͘人，照一般聖經學者解說是teh指童貞女馬利亞；蛇（魔鬼）ê kiáⁿ孫是teh指敵基督ê人。Tī耶穌降生以後，敵基督耶穌ê人有真chē，希律王to̍h是其中ê第一个；馬利亞無傷tio̍h希律王（王位），希律王卻想beh傷害馬利亞ê腳後teⁿ，連聖嬰耶穌—偤太人ê王mā無hō͘ 伊傷到；因為約瑟受tio̍h主ê使者ê指示，chhōa聖母kah Κiáⁿ透暝逃到埃及去à。

M̄-koh，魔鬼ê kiáⁿ孫（暗指m̄相信耶穌是上帝ê Κiáⁿ ê偤太人）iáu ē hō͘魔鬼利用，想beh繼續傷害耶穌；所以，當亞拿女先知一下見tio̍h馬利亞抱聖嬰耶穌到聖殿獻hō͘上帝歸聖ê時，一面祝福「chit-ê 嬰á被立（做偤太人ê王）」，另外一个面koh預言：「你（馬利亞）ka-kī ê心mā tio̍h被劍刺透（暗指她kā看tio̍h她ê kiáⁿ耶穌hō͘ 人釘十字架á哀痛）。」蛇（魔鬼）kah cha-bó͘人（馬利亞）善惡之爭，彼此結冤仇，它ê結果是gōa-ni̍h-á驚人！