《疼你e5厝邊》

 | | | 轉寄

當生命進入倒算計時——李長興ê故事

作者 陳鳳翔 2005.09.11

新正年頭初一，寒流冷氣團來襲，陣陣寒風對面吹來，hō͘人一直起ka-lún-sún。外出ê民眾，無m̄是大衣、厚外套、圍巾、毛手套全副武裝。但是高雄美術館ê伊莉羅伊咖啡露天廣場，卻勁力四射，熱情滾滾。台下lim咖啡、食點心ê遊客，跟tòe台頂「羔羊創意事工音樂團隊」ê表演者，teh揮舞雙手phah動，teh唱帶有福音氣味ê流行歌曲《phah-phah手》：「來握握手，你是我ê好朋友。來phah-phah手，快樂就會koh-khah chē。……」。

除了動聽ê詩歌，一身烏西裝、短頭毛夾雜金染、年輕有勁ê主持人李長興，koh-khah是關鍵ê靈魂人物。幽默開朗笑詼，tī台頂講講唱唱、koh叫koh跳，伊個人獨有特殊魅力，真有技巧來掌握氣氛，或溫婉柔順，或激昂澎湃，hō͘整個現場氣氛thang講是tùi冰點High到最高點；所有上台表演ê人lóng tī伊ê引導下，phah開心房來暢所欲言，台下觀眾koh-khah是不知不覺中用心注意聽。詳細聽其話語，基督信仰ê元素：信、望、愛不時會出現neh！但是台下ê人絕對看bē出來，hiah-nih活跳跳、外表健康ê李長興，實際上患tio̍h癌症，醫生宣布伊只chhun十八個月ê時間thang活。

李長興ê正職是壽險業，伊目前是安泰人壽ê業務主任kap訓練講師，bat榮幸得tio̍h IDA國際龍獎，並擁有全球壽險行銷人員最高殿堂——百萬圓桌會議MDRT資格，這是全球壽險行銷人員ê頭一名chiah ē-tàng取得ê資格，可見伊ê表現傑出。但是，就tī前年（二○○三年）年底，李長興ê身體開始出現警訊，因為本身從事保險業ê敏感度，hō͘伊ê心中隱隱有不祥ê預感。

Chit-ê時chūn，tī夜闌人靜、獨自一人ê時，伊禁bē-tiâu回想起過去。伊tī大學時代就信耶穌，卻無好好把握機會認識上帝。什麼lóng無閒，無閒功課、無閒社團，無閒一切家己認為重要ê事情，就是m̄開時間去教會、讀聖經、禱告，親近上帝。現在ê伊特別感受tio̍h信仰是hiah-nih-á重要、hiah-nih-á迫切，因為家己若是早一點á進入基督信仰ê中間，無tī外面徘徊，人生就會koh-khah早掠tiâu方向。

但是，上帝照常thèng候，用獨有特殊ê方式帶領。Chit三年來，上帝藉tio̍h詩歌hō͘李長興ê靈魂醒起來，重新tńg來到上帝面前，享受tio̍h信仰ê寶貴。面對懷疑是癌症ê醫檢報告，李長興內心感覺非常驚惶，但是伊禁bē-tiâu想tio̍h上帝時間安排是hiah-nih tú好，伊已經先被耶穌得tio̍h，所以tī面對疾病苦痛、死亡威脅ê時，ē-tàng學習無用家己ê角度看生命，卻ē-tàng以上帝ê角度看生命。

耶穌被釘十字架chìn前，tī客西馬尼園向天父祈禱：「阿爸，我ê父親ah，你凡事lóng能。求你kā這苦杯移去；但是，boài照我ê意思，只ài照你ê旨意。」（馬可福音十四章36節）Chit段經文深深打動了李長興，也帶hō͘伊真大ê安慰，幫助伊化對死亡ê驚惶為積極向前ê力量。伊向上帝禱告，若所chhun日子無chē，伊希望能將上帝所交託ê事情做好，伊願意將chhun落來ê生命，獻hō͘上帝，為主燃燒。

伊暗暗á teh想，家己能獻什麼hō͘上帝neh？聖經iáu無tùi頭到尾讀過一遍，基督道理也真淺薄，家己siōng gâu ê只有財務分析、過人ê口才，iáu有對詩歌ê喜愛。左想右想，伊chhōe-tio̍h家己ē-tàng為上帝做ê事，就是kap蔡耀慶、唐士弘兩位好友合組「羔羊創意事工音樂團隊」，將in所創作ê福音詩歌傳播出去，hō͘非基督徒lóng能認識耶穌基督寶貴ê救贖。

第二次切片檢查報告出來，確定是胰臟癌，同時，「羔羊創意事工音樂團隊」也正式成立。In多次前往教會kap民間企業團體，用音樂為上帝做見證，真自然用音樂kap基督徒或非基督徒分享信仰。

因為胰臟癌ê關係，每工ê beh暗á時五點到七點，是李長興身體siōng虛弱ê時刻。Jú來jú bái ê健康狀況bat hō͘伊幾nā-pái想beh辭去工作，只ài專心做音樂佈道。但是伊發現從事壽險業，ē-tàng kap人有第一線接觸，tùi án-ne得tio̍h真chē機會，進入非基督徒ê企業或單位去分享福音。羔羊團隊舊年辦了八十gōa pái ê音樂佈道會，四分之三ê場次lóng是tī非基督徒khah chē ê機構演出，好比講高雄醫學院、安泰人壽、百立建設……，甚至壽宴、喜宴也有人chhōe in去；tī高雄市立美術館前ê伊莉羅伊咖啡廣場表演，koh-khah是得tio̍h真chē好評。
除了tī每pái演唱會ê現場，接觸tio̍h成千上百位非基督徒之外，李長興kap羔羊團隊koh-khah將chiah-ê演出以實況錄音、錄影ê方式，透過中廣電台、東森電視台等大眾媒體，放送hō͘ koh-khah chē iáu未認識上帝ê人。Chiah-ê音樂宣教事工，令疲憊ê李長興再次得tio̍h上帝賞賜ê能力kap熱情，會得thang挺起下垂ê手、發酸ê腿，繼續前進。

面對疾病、面對人生ê苦難，ē-tàng有真chē種態度。但是李長興，chit-ê生命進入倒算計時ê基督徒，卻每工lóng能活出耶穌復活ê生命，這也正是伊面對死亡ê得勝秘訣。Tī台下注意聽李長興侃侃而談，耶穌基督siōng細膩ê貼心關懷也恬恬á進入心中。死亡kap苦難有可能ná親像冷冽ê寒冬，但是耶穌基督ê死kap復活，帶hō͘咱新ê ǹg望kap生命；上帝所注入ê chit股強大暖意，kā咱講，春天，就beh來臨。轉載自《耕心週刊》