《疼你e5厝邊》

 | | | 轉寄

趁猶日時tio̍h做工──關懷視障一路行過來

作者 Lîm Chùn-io̍k 2005.12.04

(請用Holo台語來讀，若猶未學台灣羅馬字ê人，請參考後壁ê華語註解，括弧內底ê羅馬字是台語發音。)

踏頭話
盲人是弱勢中ê弱勢，所以是上需要關懷kap鼓勵ê一群朋友。聖經約翰福音第九章中耶穌講：「失明ê人m̄是伊或伊ê父母有罪，he是神beh tī伊身上顯明伊(神)ê作為。」這章聖經hō͘視障朋友上大ê安慰kap鼓舞，mā拍破失明是神ê懲(têng)罰ê傳統思想。

視障朋友雖然肉眼看無，心靈ê目睭卻是光亮ê,其他ê潛(chhiàm)能koh-khah豐富，咱只要伸出關懷kap鼓勵ê手，in ê成就bē輸hō͘明眼ê人，tī某一寡事工上koh-khah嬴人一等，海倫凱勒kap艾立克•魏恩梅爾就是真好ê例。

回顧1988年以來，tùi實踐基督教最基本ê信仰，也就是耶穌ê新誡命「疼你ê厝邊，親像我疼lín一樣。」我体會tio̍h kap神同工ê喜樂。人bē-sái只為自己來活，因為he是自私ê小我；若ē-tàng為「疼你ê厝邊」來活，he就是大我ê永生之道，也就是神ê國度降臨人間。

四周圍ê弱勢團体就是咱ê厝邊，當時教會中有二、三位盲朋友來參加主日崇拜，我就tùi關懷盲人開始。kap in深入接觸了後，我發現盲人是弱勢中ê弱勢，但神雖然關閉in肉体ê目睭，卻打開in koh-khah明亮ê心靈目睭。我深受慕光盲人重建中心創辦人陳五福醫師ê精神感召，tī 1988年tī雙連教會輔導成立跨教會ê「台北市盲朋友聯誼會」，我才真正開始盲人關懷事工。因為全精神投入，我講我是「不務正業」，但盲朋友講我是「不誤正業」。

感謝神ê帶領kap恩典，我有一個美滿ê家庭kap順利ê事業，1990年為tio̍h女兒ê教育，阮移居去波士頓。太太tī一間大學會計部門上班，女兒就讀麻省理工學院大學部，我則為了seng-lí及盲人事工á成做台美兩地ê空中飛人，koh-khah有機會將美國khah進步ê盲人福利措(chhò͘)施紹介hō͘國內參考。

1991年koh有機會參加由 “The Carroll Center for the Blind”舉辦ê國際盲人事工交換計畫，hō͘我學習真濟，koh認bat濟濟專家kap學者，今仔日才有機會邀請Dr. Rechel Rosenbaum, Mr. Rabih Dow and Mrs. Laurie Dow, 余月霞博士kap 林雪琴老師來參加這pái由無障礙科技發展協會主辦ê研討會。

一)信仰ê實踐
我tī雙連教會受洗一年後，先後被選做執事、長老、服務委員會主委及傳道委員會主委總共20年，hō͘我ê信仰kap服事同齊成長，mā hō͘我体會tio̍h實踐信仰ê充實人生。

教會ê會議室掛一幅書法匾(pián)á:「有禱告沒工作是偷懶，有工作沒禱告是驕傲。」這時時提醒我ài kā信仰tī日常生活中實踐出來，將榮耀歸hō͘神。「台北市盲朋友聯誼會」提供視障朋友行入社會ê管道，並關懷in ê日常生活kap心靈上ê重建。幾位愛好唱歌ê會友向我提議成立詩班，我鼓勵in並全力輔導來成立「西羅亞合唱團」(「西羅亞」ê意思是「奉差遣」)，in受邀請去各地ê教會、學校、監獄kap機關團体做詩歌見證，挽回真濟迷失ê靈魂。Kap西羅亞合唱團同齊事奉，hō͘我分享得tio̍h「kap神同工」ê喜樂。

二)宗教信仰kap失明
殘障者心態上ê障礙，有其宗教信仰ê根thang尋(chhōe)、殘障界ê專業工作者有責任來處理其心態上ê變化，並提供促進這種變化ê專業知識。

人類對身体殘障ê心態，隨歷史文化ê演變，歷經消極ê可憐、同情kap保護，轉變做尊重koh積極ê教育kap重建，其間宗教信仰扮演重要ê角色。咱ài tùi宗教信仰來學習了解，殘障者需要ê是疼ê關懷，卻m̄是高姿態ê可憐kap同情。海倫凱樂講過:「失明m̄是痛苦ê代誌，只是khah無方便，上痛苦ê是社會ê歧視。」

根據我ê了解，一般神學教育真少重視殘障福音，台灣ê殘障福音也是由殘障神職人員推動，例如輪椅上ê前國大代表陳博文牧師，四界宣講殘障福音，但是跟隨伊ê腳步ê明眼神職人員猶是「鳳毛鱗角」。其實身体殘障者最需要福音來重建in ê心靈，尤其是視障者ê肉体目睭被關閉，心靈ê目睭卻是明亮ê,nā有機會接觸好ê宗教信仰，必可超越身体ê障礙，燃燒koh-khah輝煌ê生命，照亮黑暗ê社會。

輔導西羅亞盲人合唱團多來，我一直teh觀察團員為何有hiah-bih-á熱心服事神ê心志，tùi in ê詩歌見證中，我寫過一寡文章，也寫幾篇個人ê心路歷程。我發現神ê疼ē-tàng點to̍h每一個視障者ê生命蠟燭，尤其是「beh熄ê燈火，神bē吹熄。」視障者自細漢就無hō͘家人接納，koh-khah受社會大眾以異樣ê眼光對待，in嚐(tam)bē-tio̍h疼，koh-khah m̄知啥物叫做疼。

一寡有機會進入由基督教創辦ê台中惠明盲校之後，tī基督ê愛內底，in開始有歡笑kap喜樂，有真濟學生寒暑假ài留tī學校m̄願轉去厝裡。有濟濟學生tī惠明盲校受洗成做基督徒，但畢業一行出校門，殘酷ê社會又koh逼in自我鎖閉tī家中，甚至m̄敢koh再行入教堂。雙連教會成立台北市盲朋友聯誼會kap西羅亞合唱團以後，in koh再感覺tio̍h神ê恩典再度顯現，生命ê火花再度燃燒，甚至點to̍h生命ê光輝，四界為神ê疼做見證。

我感覺聖經是靈命ê糧食來源，我用五年的時間協助吳月雲做現代中文譯本聖經ê點譯工作，ti72002年三月完成ê點字版只用三塊磁碟片，盲朋友真方便就ē-tàng kap明眼人仝款讀聖經，這hō͘我足大ê成就感。

三) 讓音樂燃燒生命
Tī一群有心人士ê推動下，經過一年外ê籌備kap募款，財團法人台北市視障音樂文教基金會終於tī 1994年11月25日登記正式成立。 當時大力推展「視障音樂」理念ê張育豪，也當然被推舉來擔任基金會ê執行長。伊一開始就喊出「如果黑暗無盡頭，何不讓音樂燃燒生命？！」ê口號，因為伊認為：學習音樂對視障朋友來講上無障礙，顛倒因為目睭無看，聽覺特別靈敏，有ê koh-khah有絕對ê音感，像周煜開聽公車ê聲就知彼是幾號路ê公車。

為tio̍h提升視障音樂，我紹介GOODFEEL點字樂譜轉譯軟體hō͘淡大盲生資源教室，koh kap余月霞老師合譯《如何讀點字樂譜》、《新國際點字音樂記譜法》，希望大家多多利用。

四) 寫出生命ê火花
自1993年八月擔任視障者福利協會顧問後，kap本身弱視ê執行秘書吳敏惠接觸漸濟，知影伊ài寫作，我舉「失明給我的挑戰」ê作者程文輝為例來勉勵伊，希望ē-tàng提供視障者一條寫作ê生涯路，「視障寫作班」真緊tō成立，由曹永洋老師指導。我也去美國波斯頓ê柏金斯盲校研究圖書館搜集六本盲人作家ê作品帶回台灣，譯做中文來hō͘ koh-khah濟人瞭解盲人ê心靈世界。

我發現文學kap音樂仝款是突破「明/盲」之牆ê力量，就開始編輯出版「慕光叢書」系列，有計畫來推動視障文學，總共出版(1)《生命在我手指尖》, (2)《光在隧道那一端》, (3)《黑暗中的光》, (4)《提心燈，走遠路》(5) 《超越雙重黑暗》, (6)《讓音樂燃亮生命》, (7)《迎接視茫茫世界》, (8)《重見光明》。我繼續翻譯由遠流出版ê有：《白袍•白杖》、《新世紀之聲─安德烈•波伽利》kap 《觸摸世界屋脊》。

我鼓勵視障朋友寫自傳，結果朱萬花親自用盲用電腦拍出伊ê《用心看世界》，這hō͘我真大ê安慰，希望其他ê視障朋友繼續寫出in ê心路歷程。

五) 僱用殘障人士做什麼?
有一擺kap一位教會長老teh談論殘障福利法規定私人企業員工應僱用百分之一以上殘障人士ê問題，伊一再質問「僱用殘障人士做啥物?」伊koh講：「我寧可hông罰萬幾kho͘,m̄願開兩萬kho͘來請殘障人士。」這句話刺痛我ê心一得醫bē好。 陳五福博士定定勉勵大家講：「漢字ê「人」是一長一短合作伙，互相支持才是「人」，長ê代表恩賜khah濟ê, 短ê代表恩賜khah少ê。殘障ê人tī人類互相幫助下ē-tàng繼續活--落-去，其他動物就無法度。

高爾夫球是有「差點」 (即優者禮讓) ê比賽，英文叫 “ handicap”，kap殘障ê “handicap”仝 字。咱明眼人若承認是受神特別祝福ê優者，就應該對殘障人士禮讓差點。台灣工商發達之後，視障者ê就業環境koh-khah悲慘，行出算命就是按摩，走出按摩就是碰壁。 我個人從事關懷視障工作，看to̍h視障朋友tī社會ê夾縫中求生存，想beh出寡力koh感覺「勢單力薄」ê無奈；只好tùi我自己ê小公司做起，1992年起僱用全盲ê呂文達，tī公司裡盡量hō͘伊工作ê機會。真濟人質疑盲人ê工作能力，我lóng回答說：「只要hō͘伊公平ê工作機會kap環境，盲人7-tàng kap明眼人仝款工作。」真歡喜陳世昌先生ê碩士論文中用呂文達ê個案做例，伊講：「呂文達很有理由自豪，伊是台灣少數能進入私人公司，靠工作表現得到老闆肯定ê盲人之一。」

高科技ê盲用電腦點字視窗突破，帶hō͘盲人公平ê工作機會；但價錢真貴，m̄是一般人負擔會起ê。我聽講公私立機關「不僱用殘障者而寧可被罰」累積大筆ê「殘障福利基金」，視障者可以申請就業輔助器材。探聽結果講我ê小公司m̄是被罰單位(員工5人，100人以上才罰)，無資格申請，真是天大ê笑話。幾位「殘障福利金專戶管理運用委員」為這件事「打抱不平」，修改辦法了後，我ê公司才申請tio̍h補助購置盲用電腦。但有盲用電腦ê硬体設備了後，猶ài有設計周全ê軟体才ē-tàng達到預期ê目標。我bat擬訂「視障電腦業訓練」計畫書，但無達到就業電腦化ê美夢。

六) 導/倒盲磚
1991年初，我發見台北市開始鋪設導盲磚，因事先無做好宣導，真少人知影he是啥物物件，莫怪導盲磚上照停汽機車，結果變成「倒」盲磚，盲朋友也就大罵政府浪費公帑；何況導盲磚是鋪tī走廊外，視障朋友tio̍h ài忍受日曬雨淋，真無公平。

Tú好hit年ê行憲紀念日，台北市政府tī李登輝總統ê「讓宗教潔淨民心」指示下，邀請西羅亞合唱團去國父紀念館ê行憲紀念會中演唱。最後，黃大洲市長上台帶領全体會眾合唱「平安夜」，領隊兼串場ê彭德貴牧師把握良機，向在場ê市政官員透露盲人ê心聲，請做好宣導並禁止tī導盲磚頂面停汽機車。

過無外久，人行道上畫了白線格á來hō͘機車停，倒盲磚ê暢通有小可改進：但是，汽車照常爬上人行道，大大方方停tī導盲磚頂面；盲朋友行tī導盲磚頂，盲杖碰tio̍h汽車ài hō͘車主chhoh罵，實在真衰，啥人敢koh行「倒」盲磚neh?

台灣大量鋪設導盲磚，普及率ē-sái講是世界第一。先進國家注重個人ê定向行動訓練，á落後國家無hiah濟錢thang鋪設導盲磚，只有「錢淹腳目」有錢bē曉用ê「窮」台灣，造成目前ê街道「滿目瘡痍」，有點á「慘不忍睹」。

專收盲多障ê台中私立惠明盲校內面看bē-tio̍h導盲磚，hông尊稱做盲人之母ê陳淑靜校長講：「阮ê學生接受真好ê定向行動訓練，無需要開錢鋪設無路用ê導盲磚，in bē碰壁lah。」這對盲目鋪設導盲磚ê政府官員是一個大諷刺。

結論─ 蠟燭無心 bē to̍h
海倫凱勒講過：「請將蠟燭提 khah 高一點--á, thang 好來照光 koh khah濟人。」

Ē 記得 tī 1995年五月中，我 chhōa 台籍德裔 ê 盲人音樂家韓義明去 台中，參加由視障音樂文教基金會主辦 ê 「關懷視障慈善音樂會」，承蒙惠明盲校陳淑靜校長 ê 好意安排住 tī in tau. 我 tī 客廳 ê 桌á 頂看 tio̍h 台中啟明學校張自強校長 kap 夫人 ê 書法國畫集，我上合意內底一幅畫 ê 註解講：「蠟燭無心 bē to̍h, 點to̍h 雖然流目屎，卻發光照 tio̍h 真濟 人。」

有一種高人一等卻自以為了不起 ê 同情施捨，是無「心」點 bē to̍h ê 蠟燭，hō͘ 受施者真大 ê 傷害。所以弱勢團体常常要求 ê 是尊重，卻m̄是同情，he 是指無「心」 ê 同情；有「心」 ê 同情是關懷 kap 尊重，無「心」 ê 施捨是歧視 kap 高傲。(1/10/2003)

註解: Holo=福佬, ê=的, kap=和、與、及, m̄=不, he=那, beh=欲, tī=在, hō͘=給、讓, mā=也, koh-khah=更加, in=他們, lín=你們, bē=不會, bē-sái=不可以, seng-lí=生意, tio̍h=著、對、到, 為tio̍h=為了, tùi=從、由, koh=又再, thang=可以, ài=要、必須, nā=若, hiah-nih-á=那麼、如此, khah=較, ē-tàng=能夠, tō=就, chhōa=帶領, tau=家, to̍h=燃, á=仔, hông=被人, chhoh=臭罵, neh=呢, lóng= 都、全部, kho͘=元(台幣)。 (台灣羅馬字線頂免費教學: chuniok@fhl.net)