《疼你e5厝邊》

 | | | 轉寄

HANDICAP ＝差點

作者 Chuniok 2005.07.08

1930年代咱台灣人叫做「山球」ê運動是我ê最愛，因為chit-ê現此時外來語叫做go-lu-huh(高爾夫)是上文明koh上合聖經教示ê運動。比賽規則ê差點(＝HANDICAP)，就是tùi上帝領受khah濟ê人tio̍h-ài讓點hō͘領受khah少ê人。

1990年為tio̍h cha-bó͘囝讀冊，阮移居來美國Boston郊外ê Newton,離厝三公里就有一個市立ê山球場。我排隊六年了才the̍h-tio̍h會員證，每工透早鬥陣phah球ê鮑比因為癌症ê治療，有六個月久無來phah球，阮每工lóng siàu念伊，為伊祈禱。

今仔日鮑比照平常發球ê時間出現tī球場，阮非常歡喜kā伊攬(lám)來歡迎伊轉來。七十五歲ê鮑比平時活跳跳，現此時看起來非常衰弱，心內感覺真m̄甘。伊講伊只有ē-tàng phah切球杆kap推杆，阮就約好hō͘伊「差點」。
鮑比kap我一組，約翰kap查理一組，各組每洞選上好ê杆數來比賽。鮑比無phah發球杆kap球道杆，接近果嶺ê時，伊才選擇阮三人中間上好ê球位來切球起lih果嶺來推杆。第一洞，鮑比選查理phah出接近果嶺約十公尺ê球位切球，伊無力但勻勻仔切球出去，小小ê白球就liàn入去球洞，伊得tio̍h比標準杆低一杆ê「博蒂」(Birdie)，大家phah pho̍k仔歡呼，鮑比笑kah嘴合bē倚來。無人贏過鮑比，伊為阮chit組贏一點；十八洞結果我kap鮑比chit組贏三點。今仔日是阮鬥陣phah球五六年來上歡喜ê日，鮑比無因為破病來失去以前ê威風，kap阮恢復原來phah球ê友誼趣味。 殘障者(HANDICAPED)親像鮑比，需要社會大眾來hō͘ in「差點」來鼓勵in,hō͘ in ē-tàng發揮上帝所賞賜in ê恩典；絕對m̄是同情ê施捨，koh khah m̄是無了解ê歧視。我tī台灣ê時tùi教會開始推動「關懷視障」ê工作十幾年來，上艱苦心ê就是台灣政府實施「殘障就業福利法」了後，一位長老講：「我寧可hông罰萬幾kho͘,m̄願用兩萬kho͘倩(chhiàⁿ)殘障人士。」這實在m̄是咱做基督徒應該有ê心態。英語字典內底 “ Christian” ê解釋是1)基督徒，2)文明人。文明ê最新定義是「對殘障福利ê關懷深度」，這是咱ê信仰追求。

聽講台灣目前因為無照員工人數比例倩殘障人士ê罰金累積有幾若十億，chit種叫做「殘障福利基金」有用來做殘障人士ê福利路用，但並m̄是真健康社會應該有ê現象。大家tio̍h-ài有「HANDICAP=差點」ê精神，咱ê社會才會祥和、文明。