《主編e5話》

| | | 轉寄

信望愛FHL Taigi IME台語輸入法報導

信望愛FHL Taigi IME台語輸入法是由台語信望愛負責人林俊育先生發起募款,集合台語界有志ê奉獻,請磐石公司設計程式,陳柏中教授kap蕭平治老師整理詞庫。所以這套輸入法ê產生是台語界有志集結心力共同來完成ê,由此可見台語界人士團結一至ê超強向心力,為tio̍h台語文án-nē用心phah拚,chit份心力真使人感動。

FHL Taigi IME台語輸入法ē-sài講是目前siāng好用ê輸入法,以下tio̍h來紹介chit套輸入法ê優點。這套輸入法ē-tàng phah台羅版kap白話字(教羅版),只要ùi輸入法ê「設定」內底去勾選台羅版a̍h是白話字(教羅版),tio̍h ē-sài方便phah出你beh ài ê拼音版本,taⁿ chit點tio̍h是chit套軟體siōng大ê好處,過去ê輸入法lóng是單一套拼音版本,假使有慣習使用兩種拼音phah字ê人tio̍h必須ài灌兩種軟體,但是信望愛台語輸入法將chit個麻煩問題解決ah,安裝一套輸入法tio̍h hō͘你簡單tī兩種拼音之間轉換,實在是真利便。

而且chit套輸入法koh ē-sài hō͘你選擇全羅輸入法kap漢羅輸入法。若是選擇全羅輸入法,tī羅馬字後面直接phah數字調號,軟體tio̍h ē直接將數字調號轉做unicode調號,m̄免koh透過TP軟體轉調號。若是選擇漢羅輸入法,將beh ài ê詞ê羅馬字phah khí-khì,chhi̍h SPACE鍵,漢字tio̍h會走出來,漢字邊á koh有括弧標示chit個詞ê羅馬字,若是beh選擇ho͘羅馬字出現,真簡單一個動作tio̍h ē-tàng完成,仝時加chhi̍h SHIFT鍵tio̍h會走出已經轉做unicode調號ê羅馬字ah,整體設計tio̍h是hō͘人感覺chiok利便,將所有功能集結做夥,hō͘你自由選擇使用,用過ê人保證滿意。另外chit套輸入法mā結合林俊育先生進前開發ê輕鬆輸入法ê特色,三音節以上ê詞,phah音節首碼字母tio̍h ē走出字詞,chit點ē-sài解決大家phah字母ê時間,尤其對phah字速度khah慢ê人來講,真正是一大福音。

使用信望愛台語輸入法mā免驚你beh ài ê漢字走bē出來,若是輸出ê漢字顯示bē出來,代表電腦內底無chit-ê字,chit-ê輸入法有ùi越南漢字取得 Han-Nom_A kap Han-Nom_B字型,去信望愛網站download“ Han-Nom_AB字型 ”kap支援台語ê Unicode字型”,裝入去你ê電腦,kā無顯示出來ê字ê 字型換做 Han-Nom_A a̍h是 Han-nom_B,漢字就會顯示出來ah。此外,chit套輸入法koh有親像日語漢字頂面ē-sài標註假名ê功能,tī台語漢字頂頭ē-sài加註羅馬字,這是空前絕後ê創舉,目前所有輸入法lóng無chit種功能,信望愛台語輸入法做到ah,對編寫台語教材ê老師來講,kám m̄是一個福音leh。

信望愛台語輸入法好處不只頂面講ê hia,伊koh有一個高明ê所在,伊有設計「自訂詞庫」tī設定選項內底,若是原底詞庫無你ài ê詞,ē-sài家己加詞入去詞庫內底,建立一個屬於你家己ê個人詞庫,這是以前ê輸入法所做bē到ê所在。你若慣習 「也輕鬆(YKS)輸入法」,將也輕鬆ê“台語詞庫KKS_KauloV3.00.cin” kap“客語詞庫 KKS_Hakka.cin”複製入去 「自定詞庫」ê “% chardef begin” kap “% chardef begin”之間,就ē-tàng 「也輕鬆(YKS)輸入法」kap chit-ê新輸入法混合來phah字。所以信望愛FHL Taigi IME台語輸入法m̄-nā是設計hō͘ 台語使用者使用ê輸入法,客語族群也是chit套輸入法照顧ê對象。

Tī chia特別提起林俊育先生,伊無論人tī美國a̍h-sī台灣,總是盡心盡力為台語文phah拚,伊了解台語文ài電腦化chiah ē-sài向外界廣闊推銷咱台灣ê文化,所以自kúi冬前伊tio̍h全心投入台語電腦這個領域,開發台語、客語輸入法。伊秉持精益求精ê精神,一直有心來替大家開發新ê台語文輸入法,咱今á日chiah有chit套功能完備koh便利ê輸入法,台語界有親像俊育先生án-nē ê人才,實在是咱ê福氣。