《Kah陳小小做伙讀台語》

 | | | 轉寄

以耶穌做頭ê群體靈修

作者 陳小小，台譯：Lîm ChùnIo̍k 2024.12.15




以耶穌做頭ê群體靈修



陳鳳翔

一kóa追思禮拜裡ē看tio̍h悼念文「你是來超越眾人中ê天使……」、「你終其尾成做了天使……」背後顯現ê信念是：好人是天使下凡，á是是好人死了後ē成做比人類koh khah高等ê存在形式—天使。

Chit種觀念並m̄是現代人chiah有，早期教會to̍h存在。教會權力機構封hit kóa在世言行出眾ê基督徒，親像彼得、保羅、約翰……以及殉道者為「聖徒」，to̍h是認為好人死了後ē成做比人類koh khah高等ê存在形式—聖徒。

教會而且教導會眾ài敬拜聖徒，向聖徒祈禱，用蠟燭tī聖徒ê畫像á是塑像前獻祭，甚至tī聖徒ê記念日舉行集體彌撒（Missa，感恩祭）。歷史學家估計十六世紀hō͘咱人崇拜ê聖徒chē到一萬gōa人，á女性聖徒hông稱做「聖女」。聖經中ê抹大拉馬利亞，mā成做hông phak拜ê聖女。M̄ koh，tī新約聖經內面，ta̍k个基督徒lóng是聖徒：「我寫phoe hō͘ lín tī羅馬、為神所疼、奉召作聖徒ê眾人。」（羅1:7）「寫phoe hō͘ tī哥林多神ê教會，to̍h是tī基督耶穌內面成聖、蒙召作聖徒ê。」（林前1:2a）

「敬拜聖徒」發展到後來，各種階層kah職業lóng有伊ê「主保聖徒」（Patron Saint）。聖約瑟是木匠ê主保聖徒，聖路加是油漆匠ê主保聖徒，聖奧古斯丁是治疣聖徒……。馬丁路德傳記載伊tú tio̍h青狂雨sihnà，tio̍h驚ê làng縫是直接向聖亞拿祈禱，卻m̄是向上帝。而且siōng高等ê聖徒iáu有分身，thang分裂做幾nā个本地ê聖人。耶穌ê老母馬利亞，是聖徒中ê siōng高位，親像華人民間宗教ê媽祖，chit地區ê聖母若m̄顯靈幫忙，就ánne thang向另外一个地區ê聖母求幫贊。

「敬拜聖徒」ê信仰觀念前身to̍h是「敬拜天使」—偉大ê基督徒有chiūⁿ天堂，成做天使。Tī早期教會，to̍h有嚴重ê敬拜天使問題。保羅大聲hoah講：「Bē tàng hō͘人因為thiau故意謙卑kah敬拜天使，來搶lín ê報賞。」（歌羅西書2:18a）保羅對chiahê敬拜天使ê基督徒發出警告：Lín tio̍h謹慎，m̄ thang hō͘ chiahê虛空ê哲學迷去！Chit種講法m̄是根據基督，hit kóa是根據希臘羅馬ê宗教觀—影響人類運命ê宇宙星辰ê靈。

保羅指出正確ê靈修觀，to̍h是kah基督連結！M̄ thang去chhōe比耶穌khah kē等ê天使á是神靈。只有耶穌，kantaⁿ需要耶穌，因為上主完整ê神性具體tī基督裡，耶穌是元首，超越一切靈界ê執政者kah掌權者。（歌羅西書2:8-10）m̄ koh，基督宗教ê發展，因為無重視聖經，所以真chē民間信仰kah異教ê差繆進入教會，歌羅西書ê教導並無遍及普羅大眾。

「敬拜天使」kah「敬拜聖徒」ê錯誤，造成kakī oló德行出眾、信仰層次高超ê基督徒進行各種苦修、苦行，thang hō͘ kakī成做聖徒。中世紀晚期tī歐洲普遍流傳ê聖徒傳記集《黃金傳奇》（Legenda Aurea），記載抹大拉馬利亞遠行到法國南pêng ê山頂隱居，沉靜修道，一个柴十字架、一个骷髏頭、一本聖經、一條鞭á，teh過苦修、守齋戒ê日子。Georges de La Tour ê《燭光前ê抹大拉馬利亞》（Magdalen with the Smoking Flame），衫褲半褪/thǹg、赤theh ê雙肩，隨時用鞭á抽phah kakī。Donatello ê《懺悔ê抹大拉》木雕，是一个雙手合十、ta樹á冷火huê老chabó͘人，用盡kakī ê氣力刻苦靜修，成做聖女。

民間信仰、世界宗教ê靈修之道，lóng是神秘bē tàng講ê道，kantaⁿ屬tī少數特定人士。M̄ koh基督信仰ê靈修之道卻是顛倒，to̍h是獨獨kah元首耶穌基督連結，屬tī每一个信祂ê人，而且基督kanta有責任kā這hông iah露ê十字架之道—kah耶穌同死同koh活ê奧秘去四kè宣揚。

「人成做天使á是聖徒」ê錯誤觀，到taⁿ iáu thang看見。FB面冊kah LINE頂面tútn̄g thang看見chit類靈修課程kah講座，吸引kah意追求神秘經驗ê信徒。M̄ koh，保羅指出無持定元首、想beh苦待己身ê靈修，ē「無緣無故來自高hiâupai」（歌羅西書2:18-19）。這to̍h親像有kóa人驕傲kakī做到ta̍k工靈修幾nā點鐘、ta̍k禮拜禁食幾nā餐、聖經有讀幾百遍。M̄是講m̄ thang靈修、禁食、讀聖經，á是beh lòng清楚，並m̄是做到chiahê，to̍h ē tàng hō͘基督徒靈命進入深度，關鍵kantaⁿ在tī連tī元首基督。

「In無繼續kah做頭ê基督結聯。全身軀tio̍h tùi chitê頭得tio̍h營養，chiahê節kah筋tio̍h結聯起來，照上帝ê旨意來長成。」（歌羅西書2: 19）Ánne ē tàng看出基督信仰ê靈修是群體性，kah其他宗教大無仝。佛道教á是民間信仰tio̍h孤ta̍k khiā起，thang好斷開七情六慾，個人成佛、成仙、成神靈。M̄ koh，基督徒是群體—神國（上帝國度、天國），君王是耶穌，咱靈修是tī群體互動中結出聖靈ê果chí。

以色列人hō͘上帝tùi埃及chhōa出來，成做國家。上主tī西奈山頒佈神聖ê律法，to̍h是一種群體ê生活準則，hō͘祂ê子民有遵照，thang hō͘其他民族欣羨講：「Chit國ê人真正是有智慧，有聰明！」欣羨講：「Chit國ê人，in ê神ná ē hiahni̍h kah in親近？」欣羨講：「Chit國ê人，in ê律法ná ē hiahni̍h公義？」（申命記4:5-8）因為其他民族，無群體共同生活ê智慧，無顧kah社會底層ê公義律法，kah in ê神明距離真遠，定定無清楚神明ê旨意。就ánne，外邦民族mā想beh成做耶和華ê子民。

耶穌帶來ê國度，hō͘ 咱外邦人mā ē tàng入來。教會群體ê存在kah幸福，仝款是beh hō͘其他人欣羨，渴望mā成做耶穌ê子民。咱有群體共同生活ê智慧，有上主賞賜ê疼彼此接納，咱繼承顧tio̍h社會kē層ê公義律法，因為耶穌，聖靈內住tī咱中間，咱kah上主ê距離是hiahni̍h’á近。

咱免去學其它異教靈修之道。保羅早to̍h講過，hit kóa看起來ná有智慧，自表謙卑，苦待己身，tī克服肉體ê情慾上是一屑á都無功效。只有以耶穌為元首ê群體靈修，以祂做中心，兄弟姊妹團契中有疼ê實踐，一定ē tàng得tio̍h豐盛ê性命。