《Kah陳小小做伙讀台語》

 | | | 轉寄

提高女性地位免犧牲家庭

作者 陳小小，台譯：Lîm ChùnIo̍k 2024.08.25





提高女性地位免犧牲家庭

陳鳳翔

最近幾年，台灣ê少kiáⁿ化問題lóng受注目。Chûn-·年（2022），台灣ê出生率只有0.87%，是全世界siōng kē。Á 25歲到44歲適婚人口，未婚率koân到50.2 %。《今周刊》報導人口學家、中研院社會學研究所研究員鄭雁馨ê研究分析，指出台灣kē生育率問題「本質上是性別問題」。因為女性teh決定是m̄是beh生kiáⁿ ，tńg去厝裡為gín'á奉獻，往往tio̍h放棄過去2、30年ê專業kah努力。

1850年，歐美展開女性主義運動，西蒙波娃《第二性》主張：「女性m̄是男性ê附屬，ē tàng kah男性做仝款ê tāichì。」台灣tī 1970年tòe tio̍h女性主義運動ê腳步。同時期，政府推動九年國民義務教育，koh khah助成phah破性別無平等ê傳統心智。兩性平權ê觀念ē tàng普遍，女性ê角色koh khah多元、有chhunkiu。M̄ koh tī咱ê傳統文化中，女性iáu koh擔起自古以來生養gín'á ê責任，kahná kantaⁿ有做老母ê女性，chiah ē tàng得tio̍h榮光。

有看tio̍h chit點，台灣ê女性運動kā焦點轉向「釋放母職」，批判「老母是chabó͘人宿命」ê傳統觀念，phah破「傳統ê老母角色」ê神話，極力提倡女性無結婚m̄生mā有自我ê價值。鼓勵已經結婚ê女性行出家庭，委身tī工作。

真chē女性一個一個投入工作，有證明女性工作能力、thàn錢能力bē輸男性，大大提高女性ê地位。職業婦女成做對社會全體有貢獻ê新女性，m̄ koh tī厝裡做全職老母ê女性，hō͘人看bē起。主流文化lóng teh看輕tī厝裡ê全職老母，造成koh khah chē ê老母投入工作、犧牲家庭。

家庭裡無全職ê老母，gín'á被交hō͘其他óa靠ê對象，á是委請保姆、長輩來照顧，á是送去幼稚園、安親班。過去tī台灣ê小學，ta̍k年母親節感恩活動，台á頂khiā滿老母接受gín’á獻ê康乃馨，chitmá台á頂一目看去lóng是頭毛白siaksiak ê阿公、阿媽á是外公、外媽ê代表。因為老母大部分lóng成做職業婦女。

Chitmá台灣ê家庭結構是，男性kah女性lóng tī職場teh phah拚，下班了後兩人lóng ài分出時間kah氣力來處理家事。若加上有幼年gín'á tio̍h養育，夫妻兩人身心lóng siān tahtah，容易激發衝突kah誤會。惡性循環帶來結婚率連續peh koân，結婚率年年降kē。無結婚、m̄生、bē懷孕，成做社會ê新常態。

真正兩性平權ài轉向ê目標應該是，女性ē tàng照kakī ê意願，á是選擇進入工作場，á是tī厝裡做全職ê老母。事實上，chit份無受限制tī社會文化ê真自由，只有tī基督裡ē tàng存在。基督信仰ê核心價值是疼ê關係；罪hō͘人kah上主、人kah人之間ê關係破碎，耶穌是為tio̍h疼ê關係復合而來。基督信仰kah其他追求個體提升ê宗教（儒教成聖、佛教成佛、道教kah民間傳統宗教成仙）無仝，是重視群體（上主ê國度—耶穌ê身軀，to̍h是教會）得贖。

耶穌講：「我hō͘ lín一條新ê誡命：Lín tio̍h相疼，親像我bat疼lín。Lín mā tio̍h照ánne相疼。」（約翰福音13:34）Chitê新律例已經超過本來ê「疼人親像kakī」舊律例，提高到tio̍h用上帝對世間人ê疼，卻m̄是人對kakī ê疼，來彼此相疼。耶穌koh講彼此相疼是門徒ê記號（約翰福音13:35），世界主流文化呼籲咱人追求個體成功，thang犧牲疼ê關聯。M̄ koh，上主ê道路卻是同時兼顧個體kah群體。Tī台灣，一kóa基督徒夫妻 ê職涯規劃kah家庭生活，ē tàng hō͘人看見兩人同行ê路雖然無好行（需要協調、參詳、互相退讓、彼此成全），比起一个人行khah慢，m̄ koh ē tàng行kah koh khah遠、koh khah闊。

有女性，結婚生kiáⁿ，辭掉工作成做全職ê老母，專心養育gín'á，thang hō͘先生ē tàng專心讀冊做醫學研究，無後顧之憂。Gín'á成長過程，她mā保持學習力；Gín'á大漢了後，去神學院修讀希臘文、希伯來文kah聖經等等ê相關課程。漸漸得tio̍h神學碩士、博士學位，成做聖經學者，而且透過翻譯聖經參與宣教工作。In翁chiah是得tio̍h博士了後，投入職業病、公共衛生kah健保永續ê研究，為tio̍h弱勢勞工ê健康盡心盡力。夫妻兩人ê工作內容kah性質無仝款，m̄ koh目標卻是仝款，lóng是為tio̍h服事上帝！

Ánne ê基督徒夫妻，m̄是kantaⁿ有chit對，iáu有真chē其他。有kóa是倒páiⁿ，由翁婿先為家庭、為gín'á來委身，hō͘牽手專心tī khangkhòe場。In to̍h親像雲彩見證，hō͘ 咱看見充滿性命力ê滾動式計畫，彼此支持來完成人生ê階段性任務。兩人tī地位平等、職分無仝ê合作關係上，做伙走chhōe上主tī兩人身chiūⁿ共同ê藍圖，hō͘兩人所起造ê家庭成做上主心意所實現ê所在。已經結婚ê女性thang選擇做職業婦女，mā thang安心自在來選擇tī厝裡做全職老母，兩者lóng盡忠上主ê委託。已經結婚ê男性thang選擇在職場奮鬥，mā thang選擇tī厝裡做全職老父，兩者lóng盡忠上主ê委託。男女兩性免致意主流價值ê眼光，kantaⁿ致意上主看做是好，有tùi天頂來、啥人mā奪bē走ê永遠榮光。

聖經中婚姻ê目的，m̄是一般人所認為，為tio̍h愛情ê婚姻，為tio̍h養兒防老ê婚姻，為tio̍h家庭家族ê婚姻；兩人一體卻是hō͘ 咱看一下á三一ê奧秘。維爾米（Geza Vermes）tī《神話á是歷史：koh活ê硬核事實》（Myth or History: The Hard Facts of the Resurrection）一文中論tio̍h三一奧秘ê時講：「Tī上帝內面ê三位彼此高舉、彼此尊重……神聖ê ta̍k位lóng ē kā另外兩位庇護tī kui个有存ê核心。Tī不斷ê互相提議kah接納ê運行中，ta̍k位lóng kā其他兩位遮蓋leh……上主ê內在性命充滿對彼此ê敬愛kah重視。」婚姻是上主所設立，兩人成做一體m̄ kantaⁿ是性，koh khah是思想、心靈、行動ê相融。生活ê大細事由兩人提議，彼此欣賞、接納，過程中互相服事、彼此尊榮。

生活本來to̍h無容易，m̄ koh基督徒夫妻，因為信耶穌，有天父上主隨時ê幫贊kah恩典，兩人ē tàng對彼此有信心，兩人同行ê ta̍k步lóng彼此參詳、互相成全。M̄nā個體tī上主賞賜ê畫布頂面畫色彩，同時兩人一體，有koh khah多元ê層次kah角度，做伙豐富而且陳列tī性命畫布頂面。上主帶領teh提升女性之路，m̄免犧牲家庭。