《Kah陳小小做伙讀台語》

 | | | 轉寄

女主角ê選擇

作者 陳小小，台譯：Lîm ChùnIo̍k 2024.03.10




女主角ê選擇



陳鳳翔




當今ê愛情劇劇情，kantaⁿ設定一位男主角無夠，lóng ē安排幾位男配角。Chiahê chabó͘人ê夢幻男主角，互相拚勢teh追求女主角、kā她圍teh tńgse̍h。Á我每pái讀tio̍h申命記28章，總是感覺chit段經文帶有類似ê畫面，以色列人民kahná愛情劇中ê女主角，一堆ê福氣tī她身邊，kā她扶扶tháⁿtháⁿ。

申命記ê背景是tī以色列人khiā起ê摩押平原，to̍h是teh beh進入迦南應允之地。除了三个老人—摩西、約書亞、迦勒，其他lóng是60歲以下ê人（註），in是出埃及ê第二代。120歲ê摩西無法度tòe in進入應允之地，伊十分擔心後來若是chiahê後輩親像第一代hiahni̍h硬頷頸來悖逆，伊已經無法度成做上主kah in之間ê公親。摩西就ánne mînōa苦勸，好話、pháiⁿ話lóng講tī頭前，免得tāichì向bē tàng控制ê罪惡方向發展，to̍h有chit段大家lóng真熟ê「福氣追你」ê講法—申命記28:1-13。節錄前6節，請看下面：

「你若致意聽上主—你ê上帝ê話，守祂一切ê誡命來照ánne行，to̍h是我今á日所命令你ê，上主—你ê上帝ē hō͘你pôaⁿ過天下萬國。你若聽上主—你ê上帝ê話，chiahê所祝福ê to̍h ē jiok你，ē到tī你：「你tī城內ē得tio̍h福氣，tī田裡ē得tio̍h福氣。「你ê身軀所生ê，你ê土地所出ê，你ê chengseⁿ所出ê，以及牛ê牛á-kiáⁿ，羊ê羊á-kiáⁿ，lóngē得tio̍h福氣。「你ê筐á kah你chhiau麵ê器具，lóngē得tio̍h福氣。「你入來ē得tio̍h福氣，出去mā ē得tio̍h福氣。（《全民台語聖經》申命記28:1-6）

摩西向以色列人透露án怎成做女主角ê秘訣，所有ê福氣ē親像偶像劇中ê男主角kah男配角kā in圍teh linlong se̍h。用白話來講，秘訣to̍h是「上主án怎講，我án怎做」。上主ê子民確實聽從上主ê話，而且謹守遵行，就ē成做siōng好ê女主角。To̍h是hiahni̍h簡單！

先來紹介chiahê福氣。第一个福氣是群體之福。原文直譯做「耶和華一定hō͘你成做至koân，koân過全地所有國族之上」，也to̍h是以色列國成做「萬國之國、萬族之族」ê概念。身為世界第一強國，有啥好處？Bē少人lóng想beh領美國ê綠卡，持有美國公民ê身分。因為tī chitê國家ê社會福利下，sànchhiah人有飯食、有冊讀、有藥醫。若是出國旅遊mā有真chē保障，發生啥物tāichì，國家lóng ē派飛機來救援。

續接to̍h是kah個人有關ê福氣。原文ta̍k句ê第一个字lóng是בָּר֧וּךְ「受賜福」，被動分詞來表達動作「當teh進行á是一直teh進行」，liúlia̍h活出福氣滿滿ê模樣。希伯來文為tio̍h對上主表示尊重，chē用被動語態來掩蓋「上主」。M̄ koh，華語ê語法慣用主動語態，以下容允我kā主詞用上主，koh用白話來譯讀：

耶和華—你ê上主祝福你，m̄管你tī tó一个城裡，
耶和華—你ê上主祝福你，m̄管你tī tó一个田裡；
耶和華—你ê上主祝福你子宮中ê產出—你ê孩兒滿堂，
耶和華—你ê上主祝福你土地ê產出—你ê農作、穀物、果chí滿滿是，
耶和華—你ê上主祝福你chengseⁿê產出—你ê細隻牛kah羊ákiáⁿ kui陣；
耶和華—你ê上主祝福滿滿kah你ê揉麵盆—你ê料理ta̍k出lóng好食、健康koh營養；
耶和華—你ê上主祝福你tńg去厝裡—好好á歇睏，
耶和華—你ê上主祝福你出門—去上班á是去學校讀冊。

另外נָשַׂג是「追」，若翻譯做「追隨」，chiahê福氣ê跑步速度比女主角khah慢，感覺to̍h khah弱kóa。M̄ koh事實上，chitê字是「jiok tio̍h、掠tio̍h」，in ta̍k个lóng是馬拉松健將，lóng ē tàng jiok tio̍h女主角。Ánne ê幸福，kantaⁿ有阿西chiah bē注意聽，m̄遵守上主ê話。

M̄ koh，摩西話柄一tńg，kā「福氣」換做 「咒詛」。伊警告以色列人若kā耶和華上主ê話當做耳孔風，左耳進、正耳出，各種ê咒詛kā in 圍teh linlong se̍h。按照篇幅來計算，「咒詛」經文（55節）是「福氣」經文（13節）ê四倍有chhun。癆病、燒熱病、火症、寒熱症、刀劍、旱風、霉爛；埃及人ê瘡、痔瘡、牛皮癬kah疥；siáu狂、chheⁿmê、驚惶，一波koh一波ê「咒詛」teh jiok ê畫面，顯見摩西老大人ê面憂結結。Kui章ê兩个關鍵句：
% 上主ē命令福氣hō͘你，tī你ê粟倉kah你ê手所做一切ê tāichì，mā ē kā你賜福tī上主—你ê上帝所賞賜hō͘你ê地。（申命記28:8）

因為你所行ê pháiⁿ來棄sak我，上主ē tī你ê手所做一切ê tāichì，hō͘咒詛、擾亂、責罰到tī你，一直到你受毀滅，緊緊滅亡。。（申命記28:20）

前句描述你手所伸展達ē到ê所有tāichì頂面，上主mā伸手賞賜各種恩典祝福。後句就ánne指出，你手所伸展達ē到ê所有tāichì頂面，上主mā伸手賞賜各種災禍災厄。簡單來講，前句to̍h是你做啥物，上主to̍h幫啥物。後者是你做啥物，上主to̍͘h反啥物。主要原因在tī「你行pháiⁿ來棄sak祂」（申命記28:20），chitê譯文khah無法度傳神來表現出上主ê傷痛。מִפְּנֵי רֹעַ מַעֲלָלֶיךָ אֲשֶׁר עֲזַבְתָּנִי׃應該翻譯做「因為你做pháiⁿto̍h是你棄sak我！」，意思是：「你做諸般pháiⁿ事，siōng大ê pháiⁿ事to̍h是棄sak我！」

因為上主本來是善，離棄祂to̍h是kah pháiⁿ相lám。羅馬書陳述chitê驚人ê事實：

In既然無beh真正認bat上帝，上帝to̍h chhut-chāi in用敗壞ê心思，去做無應該做ê tāichì。In充滿ta̍k款ê不義、邪惡、貪心、惡毒、怨妒、兇殺、鬥爭、奸詐、陰謀，講人ê尻脊後話，譭謗人，怨恨上帝，侮辱人，驕傲，誇口，製造是非，忤逆父母，無良心，無守約，無親情，無憐憫。（羅馬書1:28-31）

摩西對beh進入應允ê迦南地ê人民講：「你看，我今á日有用活kah福氣，死kah災禍，排列tī你ê面前。」（申命記30:15）Chitê問題mā tī你我面前，女主角ài做啥物選擇？Siōng尾，讀者應該明白真正男主角m̄是chiahê福氣，卻是上主。有真愛ê女主角，自然m̄是tī「福氣／生kah福」kah「咒詛／死kah禍」之間做選擇，卻是選擇疼咱到底ê上主！



註：出埃及當時20歲以上ê人lóng死tī曠野，而且經過40年。