《Kah陳小小做伙讀台語》

 | | | 轉寄

什一奉獻，看見別人ê需要

作者 陳小小，台譯：Lîm ChùnIo̍k 2023.04.30





暗時，宿舍恬chihchih。我讀冊讀kah有kóa thiám à，伸勻一个，身軀靠tī椅á kha脊phiaⁿ，目chiu khehkheh teh思念親愛ê厝裡ê人、同學、團契ê兄弟姊妹。當感動浮chiūⁿ心頭，tùi盒á內the̍h出卡片，寫幾句á安慰á是鼓勵ê話，加上聖經經文。有時我iáu ē加上宵夜，了後送交去到對方ê手裡。我學生時代ê什一奉獻真無tapsap，這是siōng chia̍p利用ê方式。

回應上主ê疼

大學一年á ê暑假，我決志信主，當時ê輔導教導我基督徒ài做四件事：Ta̍k日讀經祈禱、參加主日崇拜、殷勤聚會、什一奉獻。頭前三件事聽起來iáu算簡單，第四點to̍h hō͘我壓力ná親像山。因為每個月kantaⁿ有5,000 kho͘ê生活費，十分之一出去，to̍h chhun 4,500 kho͘à。當時我一頓kantaⁿ需要20元，500 kho͘等於25頓neh！意思是我ta̍k日tio̍h禁食一頓？好lah！Ánne我to̍h學一kóa修道士ê禁食苦修。

Tú當我暗暗á phah算beh過中世紀修道士ê生活，thang來得tio̍h上主ê喜愛，輔導kahná知影阮chiahê初入教ê人容易困擾福音，向阮清楚説明：「咱得救是因信稱義，chit四件事lóng m̄是律法。無人是因為做到這四件事來得救，ta̍k人lóng是靠耶穌來得救。做chiahê是咱對上主ê疼ê回應。什一奉獻對偤太人是律法，m̄ koh基督徒ê什一奉獻是學亞伯拉罕、雅各ê精神，hit時iáu未頒布律法（創世記14：20；28：22；希伯來書7：2～6）。」

想看māi mā是ánne！若是有一个chapo͘人講愛一个chabó͘人，soah從來無為她開過錢，kā對方買一个á禮物，á是為她做一kóa事，he肯定是嘴裡講講leh，實際上並無teh愛她。愛ê道理我bat，m̄ koh十分之一真chē，學生kám ē tàng有學生價，phah一个á折leh，親像二十分之一？等我以後出社會thàn錢koh再實踐什一奉獻，kám好？

輔導kahná看透阮chiahê大學生心內ê按算，伊真有心koh誠懇勸阮講：「M̄ thang認為學生時代錢無chē to̍h無法度什一奉獻，出社會liáu每個月收入5萬kho͘、10萬kho͘to̍h ē奉獻。到hit時，lín ē因為beh奉獻5000 kho͘、1萬kho͘來感覺m̄甘。」

我àⁿ頭teh想，無m̄ tio̍h！Ài我the̍h出5,000 kho͘、1萬 kho͘，絕對有被割肉ê感覺。若是我thàn錢少ê時to̍h開始什一奉獻，未來m̄管thàn gōa chē錢應該也ē tàng做到。我嘴phóe講疼耶穌，若kantaⁿ是隨意the̍h一點á錢來奉獻，to̍h親像看tio̍h路邊乞食，出tī憐憫來hē一kóa lânsan錢，ánne我ê疼一定無chē。

奉獻ê由來

教會beh教導初信者ê事項siuⁿ chē，無教siuⁿ chē什一奉獻ê細節，m̄ koh我是前幾志願ê大學生，恩賜to̍h是讀冊，所以開始查考聖經，研究什一奉獻ê來由。利未記27：30～33；民數記18：21～24；申命記12：4～18、14：22～29、26：12～15是什一奉獻ê主要法源根據，chit幾所在ê經文重點只不過是什一奉獻thang hō͘咱來學習時常敬畏耶和華，上主一定賜福奉獻者。什一奉獻使用tī三方面：1）全家人，包括僕婢，tī上主ê厝lim食享用。2）神職人員（利未人）ê薪水。3）Hō͘神職人員（利未人）、寄腳ê、孤兒kah寡婦thang kah飽足。

Chiahni̍h簡單！Chiahni̍h快樂！聖經ê記載顛覆我chitê菜鳥á基督徒掠準宗教是苦修ê錯誤觀念。天父ǹg望祂ê kiáⁿ兒真gâu用所得ê十分之一，kah厝裡ê人、離鄉背井ê人、經濟狀況無好ê人做伙快樂。Koh khah重要ê是，bē tàng虧待神職人員。神職人員若sànchhiah ê、sàn giuhgiuh，to̍h無人ài做神職人員，無人beh宣教、講道、教導、傳福音hō͘未信者ah。

我kah意瑪拉基書3：10講ê：「萬軍ê耶和華講：Lín tio̍h kā應當納ê十分之一完全送入倉庫，hō͘阮tau有糧食，用這來試看我是m̄是為lín phah開天頂ê窗á，kā福氣piàⁿ hō͘ lín，甚至無tè thang té。」Chit句經文對tú信主ê我是真大ê鼓勵，hō͘我願意試探來the̍h出十分之一ê奉獻，hō͘上主ê厝有糧食，hō͘主內ê厝裡ê人做伙蒙恩。

愛神mā疼父母

30幾年前，大多數ê大學生騎鐵馬，穿T恤kah牛á褲，ē tàng食飽lim飽to̍h是真大ê享受。為tio̍h beh省錢，我點自助餐lóng kantaⁿ點七分飽ê量，chiah ē tàng chhun落來一kóa錢，tī期末聚餐ê時食khah好一點á。一位中文系大四ê學姊是chhōa我信耶穌ê關鍵人物，她每個月請我tī學生餐廳食一頓自助餐，沿路食沿路關心我ê新鮮人生活。學姊hō͘我chitê sànchhiah學生真實地感受tio̍h上主ê疼，尤其嘴kah腹肚利益真chē。Á學姊mā m̄是有錢人ê小姐，她是用奉獻請我ê，tùi她身chiūⁿ，我領會tio̍h「上主疼世間人」一點á都m̄是抽象ê口號。

我開始學學姊，每個月無chē ê 500 kho͘奉獻，小部分請人食飯，買卡片kah請所關心人食宵夜，大部分投入學生團契ê奉獻箱。有一學期，因為擔任家教加5,000 kho͘ê收入，hit四個月每個月to̍h加500 kho͘thang用來奉獻。我ê教會無缺錢，m̄ koh看見教會冊櫃ê冊無chē koh真破古，我對牧師講我有感動beh捐新冊，牧師真歡喜，伊mā愛看冊。

畢業了後，我留tī系裡做助教，koh兼計畫案ê研究助理，每個月ê錢tùi 5,000變做3萬3,000 kho͘。輔導真正是先知講預言！Beh奉獻所得ê十分之一ê 3,300 kho͘出去，真正有心痛ê感覺。Kachài頭前三年已經建立「什一是上主ê、m̄是我ê」ánne ê觀念kah習慣。特別是，我mā kā所得ê第二个什一交hō͘父母。因為研讀什一奉獻相關經文ê時，福音書記載耶穌責備假為善ê法利賽人kah文士，講in用嘴脣尊敬上主，心卻遠離上主，藉口講kā孝親費the̍h去奉獻hō͘上主，to̍h無beh chhap養育kakī大漢ê父母。

耶穌koh講：「Lín用奇巧ê方法棄sak上帝ê誡命，來beh遵守lín ê傳統。 10 摩西bat講：『Tio̍h尊敬你ê老父kah你ê老母。』(註：出20：12；申5：16) koh講：『罵老父á是罵老母ê人一定tio̍h處死刑。』(註：出21：17；利20：9) 11 M̄ koh，lín講：『人若對伊ê老父á是老母講：你本底ē tàng tùi我得tio̍h ê扶養金已經獻hō͘上帝。』 12 Ánne，lín to̍h允准伊m̄免hō͘伊ê老父á是老母扶養金。 13 Lín是用lín所傳授ê傳統來廢除上帝ê話。Lín mā做真chē chit款ê tāichì。」（《全民台語聖經》馬可福音7：9～13）

基督徒若講kakī疼上主，卻無疼家己ê父母，chitê信仰絕對是假ê。疼父母mā bē tàng kantaⁿ是掛tī嘴頂面，每個月ài the̍h錢奉養父母。就我hit當時來講，所得ê兩个什一總共是6,600元，實踐起來真正chiâⁿ痛ah！M̄ koh，我ê父母前到taⁿ m̄ bat想過chabó͘ kiáⁿ一thàn錢to̍h hō͘ in孝親費，兩老非常驚喜。事實上，後來我每個月hō͘父母1萬元，已經超過什一，因為我擔心kakī以後嫁人生kiáⁿ，to̍h無法度hō͘ in siuⁿ chē。無想tio̍h老母kā錢全部khiām起來，兩年後我結婚，她to̍h歡歡喜喜全部用tī婚禮ê需要費用頂面—新娘、丈人、丈姆ê穿插裝飾以及送新郎ê禮物、厝裡ê布置……。

什一奉獻用途chē

因為什一奉獻額度提高到3,300元，我ē tàng關心ê人kah項目變kah koh khah chē。Hit時tútú to̍h是電腦科技快速成長ê時代，我送過神職人員PDA（掌上型電腦）、電子冊，hō͘ in真實感受tio̍h電腦科技對傳道事工ê幫贊kah影響。我幫慕道友繳過福音營會ê費用；中秋節請來台灣寄腳ê新加坡僑生食飯，傳達溫暖家庭ê感覺；捐款hō͘社福機構，親像台灣世界展望會......真正用途真chē！

我siōng歡喜ê是用什一奉獻買聖經送慕道友。國小三年á ê時，同學邀請我去教會，父母lóng m̄是基督徒ê我kantaⁿ有基甸會免費贈送ê新約聖經。Hit年高雄中會舉辦兒童比賽，項目有詩歌、聖經、白話字、畫圖。聖經考士師記1～4章，我借教會公用ê聖經，嘴齒根咬leh，kā全部硬死背落來。我做到一字無漏背完頭前兩章，後面兩章mā真熟，比賽ê時the̍h tio̍h全高雄市聖經組第一名。牧師問我beh啥物獎品，100元以內lóng thang；我無經過大腦to̍h隨時講beh ài一本有舊約ê聖經。牧師露出pháiⁿ看面，因為聖經超過預算。Hit時我chiah知影有舊約ê聖經無sio̍k，m̄ koh真chē上主ê智識lóng tī舊約ah！

結婚了後，搬到新竹，電腦科技進入網際網路ê V世代，BBS（電子布告欄系統）to̍h親像chitmá ê「批踢踢」，各種宗教論爭。阮夫婦領受tio̍h網路福音事工ê呼召，kah交通大學信望愛團契兄弟姊妹做伙籌備成立聖經網站；我進入信義神學院攻讀道學碩士，tùi BBS知影一kóa牧師教導什一奉獻全部lóng tio̍h hō͘所屬ê教會。瑪拉基書3：8～10成做恐嚇，無什一奉獻ê人，咒詛to̍h ē臨到in ê身chiūⁿ。Chit三小節ê經文竟然成做什一奉獻ê「唯一」根據！

Chit種觀點hō͘我真tio̍h驚。摩西五經是律法冊，先知引用來當做法源ê根據，濃縮成做律法冊ê經文對人民講話，細節ài tńg去到利未記、民數記、申命記查看。所以什一奉獻mā tio̍h用tī所有邊緣人—親像孤兒、寡婦、sànchhiah人ê身chiūⁿ，ná ē全部kantaⁿ ē tàng到某間教會去？另外，上主ê厝hiahni̍h’á廣闊，教會、機構lóng是上主ê厝ê一部分，單一教會ná ē tàng自稱是「唯一」ê聖殿á是上主ê厝？什一奉獻無應該kantaⁿ限tī某間教會內部使用，koh khah無應該kantaⁿ使用tī堂會ê人事費。

有kóa信徒tùi聖經知影單一教會bē tàng完全講to̍h是上主ê厝，m̄ koh iáu kā什一奉獻全部hō͘教會，理由是牧師kah長老ē tàng統籌眾人ê什一奉獻，開會了後分配到其它機構kah需要ê sànchhiah人。講起來mā有理，m̄ koh若是kantaⁿ有chit種奉獻方式，信徒to̍h ē失去真chē kah需要ê人ê疼ê交流、互動ê溫馨。律法書記載，什一奉獻iáu thang hō͘全家人、僕婢（員工）、利未人（神職人員）、寄腳ê人（外地人、外國人）、孤兒寡婦lim食快樂。刪除chiahê，什一奉獻容易變成「教會稅」，本來是對上主疼ê回應，卻成做律法ê要求。尤其是初信者，容易誤解福音，掠做無繳納教會稅，to̍h ē失去救恩。

什一奉獻全部kantaⁿ hō͘所屬教會iáu有另外一个缺點，to̍h是當信徒看tio̍h tó位有需要，to̍h tio̍h先回報hō͘教會，一切關懷事工lóng透過教會撥款。M̄ koh有kóa需要ê人無ài被公開討論，chhòng到全教會眾人lóng知，kantaⁿ ǹg望暗暗á接受幫贊。Mā有kóa新興事工，ná親像電視、電影、網路等等ê影音媒體，早期bat hō͘某一kóa教會掠準是撒旦ê工具，無beh支持chit類ê事工。Ánne，倡導什一奉獻全部kantaⁿ ē tàng hō͘教會ê一派人，為tio̍h解決chiahê缺點，to̍h提出什一奉獻以外koh再額外奉獻ê講法。M̄ koh，這標準實在siuⁿ koân，顛倒造成大多數ê信徒kui氣無ài什一奉獻。M̄ thang bē記得，ta̍k个信徒ê所得，iáu tio̍h繳hō͘政府ê所得稅，iáu tio̍h孝養父母、照顧家庭。

標準siōng koân ê教導tiāⁿtiāⁿ使用sànchhiah寡婦ê兩个小錢（馬可福音12：41～44；路加福音21：1～4），ài信徒學習sànchhiah寡婦kā一切養生ê lóng投落去。試問chit種教導ê牧者，kakī kám做ē到？事實上，chit種教導真可能是胡亂解釋，因為馬可福音裡，耶穌tī頭前講：「Tio̍h提防hiahê經學教師，in ài穿長衫四界行，ài tī大路口hō͘人請安，koh tī會堂內ài坐高位，tī宴席坐大位。In侵佔寡婦ê家伙，thiau故意祈禱真長。In ē受koh khah重ê刑罰。」（12章38～40節） 文士án怎侵吞寡婦ê家產，to̍h發生tī聖殿內。Sànchhiah寡婦kiámchhái to̍h是hō͘文士誤導，chiah ē kā奉獻tùi十分之一變成百分之百！大大超過了聖經ê要求。

看見需要ê好目chiu

信主到taⁿ，我每個月lóng有什一奉獻，用這來敬畏上主，mā學tio̍h信心ê功課，koh khah練習慷慨hō͘ in。當我成做聖經老師，注意tio̍h箴言22：9，和合本聖經譯做：「眼神慈善ê，to̍h一定受賜福，因為伊kā食物pun hō͘ sànchhiah人。」現代華語譯本2019版已改翻譯做：「慷慨kā食物pun hō͘ sànchhiah人ê，一定受賜福。」箴言23：6，和合本譯做：「M̄ thang食惡眼神者ê飯，mā m̄ thang貪伊ê好味。」現代華語譯本2019版已經改翻譯做：「M̄ thang食凍霜人ê飯，貪圖伊ê好料。」我to̍h開始思考，是án怎「好眼神」（טוֹב-עַיִן）是慷慨，「pháiⁿ眼神」是凍霜？有一工，我終其尾想通ah！

慷慨，to̍h是意愛kah人分享，á tī分享發生chìn前，先ài有慈善ê眼神，chiah ē tàng看見別人ê需要；凍霜，是無願意kah人分享，意思講是伊kantaⁿ專心斟酌tī kakī，kantaⁿ看見kakī ê需要，目神狹chiⁿchiⁿ ê。ánne比較起來，ē tàng看tio̍h別人，表示心存良善，眼界廣闊，當然是好目chiu！

感謝上主，hō͘我初信ê時to̍h遵照聖經ê教導來實行什一奉獻，m̄管是卡片、宵夜、各種事工，到taⁿ信主32年，千次、萬次ê大細奉獻，lóng是出tī聖靈hō͘我一對好目chiu，看tio̍h上主國度ê各種需要。我原本ê目chiu是kantaⁿ看ē tio̍h kakī需要ê無肚量，看koân無看kē，chitmá就ánne有看見萬千世界裡一般人辛苦病疼ê好目chiu。

什一奉獻，hō͘上主ê kiáⁿ兒看kah koh khah koân、koh khah遠。阮翁the̍h tio̍h博士學位了後，有三pái機會受邀請進入高薪ê科技業。其中一个頭家甚至表示，只要伊去上班，to̍h先hō͘伊市值3億元ê公司持股，koh khah免講每個月ê高薪、年尾獎金kah紅利。M̄ koh，阮知影上主ê網路福音kah聖經事工koh khah有永遠ê價值。

20 gōa年來，天父興起一波sòa一波ê志工委身排出，hō͘信望愛聖經網站開發jú來jú chē免費、好用koh專業ê聖經工具，ta̍k位信徒m̄免開錢買價值數萬kho͘ ê光碟軟體to̍h ē tàng研讀聖經。Jú chē人用信望愛來好好á讀聖經，阮to̍h感覺tī天頂累積jú chē財寶。

若照人性來講，我kantaⁿ ē tàng看tio̍h kakī ê利益，m̄ koh什一奉獻hō͘我有上主ê好眼光，眼界koh khah廣闊，ē tàng tio̍k眼tī án怎hō͘各方利益lóng siōng大化，á短暫ê一己得失看做無要緊。Án怎看khah遠？咱來tùi什一奉獻開始！這m̄是律法，卻是恩典，是對上主ê疼來做回應。