《Kah陳小小做伙讀台語》

| | | 轉寄

你koh khah ài談論衪ê聖潔, á是祂ê慈愛?

陳小小踏話頭:我信耶穌三十gōa年,聽過人講教會問題出tī無疼心,教會總是ài講罪、ài定別人ê罪。Mā聽過人講教會ê問題是有siuⁿ chē掛名ê基督徒,所信ê lóng是sio̍k價ê福音,信主後m̄讀經、m̄祈禱、m̄奉獻、m̄服事。親像信望愛chit篇主打文寫ê。

兩pêng講ê lóng總無m̄tio̍h。上帝是聖潔ê,信ê人mā tio̍h聖潔。上帝是疼,信ê人mā tio̍h彼此相疼。Chiahê評論了kui半工,往往to̍h是jú看教會jú討厭,kui氣換教會,á是就ánne m̄去教會。

M̄koh tòeleh年紀增長,jú感覺教會本來to̍h是一陣蒙恩ê罪人ê組合。眾罪人lóng iáu teh成長進步,行成聖ê路上,本來隨便to̍h ētàng被檢討出一大堆一籠á ê問題。

就ánne我jú歡喜做ê,to̍h是檢討kakī。是m̄是tī人生ê引誘試探中,靠主來選擇聖潔?活出聖潔?Tī人生ê各種衝突關係中,靠主來取得疼ê力量?Ta̍k工歡歡喜喜來感謝上帝ê恩典,因為有祂,hō͘我tī成長進步成聖ê路裡,享受福音ê力量。

【你koh khah ài談論衪ê聖潔, á是祂ê慈愛?】文/Virginia Yip

The real gospel gives us a God far more holy than a moralist can bear and far more loving than a relativist can imagine. —Timothy Keller

真正ê福音,咱看tio̍h ê是一位聖潔ê上帝,á衪ê聖潔大大超過道德主義者所ētàng承受ê;mā看tio̍h一位慈愛ê上帝,á祂ê慈愛大大超過相對主義者所ētàng想像ētio̍h。—Timothy Keller

「M̄ koh,上帝有顯明祂對咱ê疼,咱iáu是罪人ê時,基督有替咱死。」(《全民台語聖經》)羅馬書五章8節chit段經文,thang講是福音派基督徒siōng熟sāi ê經節之一,m̄koh有tang時á,咱對jú熟sāi ê經文顛倒jú少用心思去詳細思考。

#兩派福音

Timothy Keller chit句話to̍h是對chit節經文徹底ê詳細說明。今á日猶原願意承認kakī是福音派ê華人教會中,充滿兩派ê人,一派人想講今á日教會ê問題出tī無疼心,教會總是ài講罪、ài定別人ê罪,基督徒kui工面àu tu̍htu̍h,一屑á都無喜樂,欠缺恩典……,á解決ê方法to̍h是beh強調「福音」。若你問in福音是啥物?In往往ē回答:福音to̍h是上帝疼世間人,kā耶穌基督賜hō͘咱,基督拯救咱,照咱ê本相來接納咱。所以,咱既然lóng是蒙恩ê人,to̍h m̄thang彼此批評論斷,tio̍h彼此相疼chiah是。

另外一派ê人就ánne想講,今á日教會ê問題是有siuⁿ chē掛名ê基督徒,in所信ê lóng是sio̍k價ê福音,信主後m̄讀經、m̄祈禱、m̄奉獻、m̄服事、無參加團契,主日崇拜iáu tiāⁿtiāⁿ遲到早退,生活mā無見證,kha̍p bētio̍h to̍h發怨言……,á解決ê方法to̍h是ài強調「福音」。若你問in福音是啥物?In往往ē回答:福音to̍h是世間人lóng犯罪,虧缺上帝ê榮光,á上帝是公義ê、是聖潔ê,祂定tio̍h beh審判罪人。人只有接受耶穌基督做救主kah性命ê主,chiah ētàng bē滅亡,反tńg得tio̍h永生。所以,咱信主ê人, tio̍h過聖潔ê生活,凡若m̄ giâ起kakī ê十字架來跟tòe主ê人,to̍h m̄是真正ê基督徒。

一下看起來,兩派所講ê lóng真有道理,真符合聖經,m̄koh神學性ê問題往往to̍h是出tī chia──m̄是在tī你講ê是啥物,á是在tī你無講啥物。J. I. Packer bat講過一話句,真少有異端是公然反對某一項正統ê教義,異端往往lóng是單一、片面、選擇性來強調某一項á是幾項正統ê教義,來thiau故意忽略其它方面ê教義。

Chit點,相信大家lóng真清楚à。M̄koh tī chia,咱發見Keller並m̄是用一種平衡左右 ê方法來糾正chit兩派人ê錯誤,卻是用一種「用他人ê矛攻他ê人ê盾」ê方式來kā左右兩派ê人講,in其實lóng無正確認bat福音。

#兩个矛盾

道德主義者ê問題是啥物?M̄是in強調上帝ê聖潔,卻是在tī in潛意識裡總感覺人ētàng做好,人ê敬虔ētàng hō͘聖潔ê上帝滿意。你若是追問in是m̄是真正啥物lóng做夠額à,是m̄是真正想講kakī ētàng滿足上帝聖潔ê標準,in kiámchhái ē承認in做kah無夠好。M̄koh,in往往ē想講kakī起碼是盡力teh做好,這比hiahê「屬世、屬肉體ê、掛名ê」基督徒khah好真chē。換句話來講,上帝起碼ē看重in ê「心」。當然,當一个人ê行為做bē到ê時,伊有意願總算是好!

這to̍h是道德主義者、律法主義者kah敬虔派khau洗ê所在à。In本來是siōng強調上帝至koân無上ê聖潔標準,m̄koh teh實踐信仰ê時,koh不得不kā上帝聖潔ê標準降到in ētàng達到ê位置。對chiahê人,Keller講:「Lín kám想講強調上帝ê聖潔to̍h是解救ê方法?上帝ê聖潔大大超過lín想像ê ánne,世chiūⁿ kantaⁿ有一个人ētàng滿足上帝聖潔ê要求,he to̍h是基督。所以,若lín想講蒙基督ê拯救了後,iáu koh ài靠tio̍h lín個人ê敬虔來蒙歡喜接納(tio̍h講是靠一粒有心ê『心』mā好),ánne lín iáu是bē明白福音ê人。」

無ài講罪,kantaⁿ講疼心、反對批評論斷ê人,chiahê人最後淪做相對主義者。In ê問題是啥物?M̄是在tī in強調上帝ê疼,卻是在tī in ê觀念中,上帝疼人是應當ê。祂kám是上帝,咱人lóng是無完美ê,既然「疼」是上帝ê屬性,ánne chit位完美koh有疼心ê上帝疼人類,kám m̄是一件真自然ê tāichì?既然連上帝mā意愛疼咱chiahê無完美ê人,ánne咱siōng好mā m̄thang彼此批評論斷,應該用疼心來互相包容lah!

這to̍h是相對主義者siōng khau洗ê所在。In本來是siōng講疼kah包容ê,in聲聲句句tio̍h疼、tio̍h會接納、tio̍h包容所有ê罪人,m̄koh,in對hiahê反對in chit種觀點、hiahê堅持真理、責備罪惡ê人,卻是一屑á都bētàng容忍。

對chiahê人,Keller講:「Lín kám想講強調上帝ê疼to̍h是解救ê方法?Lín根本bē明白上帝ê疼究竟有gōa深!Lín所理解上帝ê疼,是基於上帝本性ê疼,是一種天然ê行動。M̄koh ,lín遠遠看bētio̍h,上帝為tio̍h疼罪人,祂有做出gōa大ê犧牲!祂ê疼是tī咱iáu做罪人ê時,叫祂ê獨生kiáⁿ為咱死chit項tāichì頂面顯明出來。上帝是chit款恨罪惡,為tio̍h解決罪惡,祂有付出hiahni̍h沉重ê代價,á lín chitmá既然是上帝所疼ê人,卻hiahni̍h輕視上帝為tio̍h疼lín所做出犧牲ê疼,可見你iáu是bē明白福音ê人。」