《Tui3台語開始》

 | | | 轉寄

聖經百科全書─祭司‧先知

作者 張德麟 2008.10.05

祭司‧先知

撒母耳記上卷記載一個人，名叫撒母耳。細漢ê時chūn，伊tī一個叫以利ê人厝裡。伊非常乖，所以上主kap人lóng愛伊。有一工暗時，來以利tī家己ê房間teh睏。撒母耳tī另外一個房間睏，忽然有一個聲音叫撒母耳ê名字：「撒母耳，撒母耳！」

「是，師父」撒母耳認為是伊ê老師來以利teh叫伊，就án-ne回答，而且行來到以利hia講：「我tī chia，因為你叫我。」

以利tī夢中受叫醒，伊並無叫撒母耳，所以講：「我無叫你，你著去睡。」

當撒母耳去睡ê時，伊koh聽tio̍h這ê聲。Chit種代誌連續三pái。以利發覺這是上主teh叫chit-ê細漢gín-á。就kā撒母耳講：「你koh去睡，伊若koh再喊你，你就講：『耶和華ah！請你講，你ê奴僕聽。』」

到了第四次，當撒母耳koh聽tio̍h這ê聲ê時，伊就以利ê話講：「請你講，你ê奴僕聽。」上主就對撒母耳講話。

這故事ê以利是一位祭司，撒母耳是ㄧ位大先知。到底祭司、先知是什麼款人neh？自下面繼續說明。


祭司

Tī以色列人ê社會中，先知、祭司、君王是三種真要緊ê人物。其中祭司是一種向上帝獻祭ê人。Tī聖經中對祭司ê生活有khah清楚記載ê只有三位：撒督、以利kap以斯拉。

Tī猶太人中，祭司ㄧ定是男性來擔任，而且必須是亞倫ê後代，屬tī利未支派ê人。假使一個人伊無法度寫伊ê族譜連到亞倫。án-ne，伊著bē-tàng做祭司。以斯拉二章六一、六二節：「祭司ê後裔中，有哈巴雅ê後裔，哈哥斯ê後裔，巴西萊ê後裔。巴西萊娶基列人巴西萊ê查某kiáⁿ做某，所以用in ê名來稱伊，chiah ê家，tī族譜中尋in ê關係也尋無，所以算作無凊氣，m̄准in當祭司ê職。」對chia thang知猶太人相當重視血統ê純正，假使家譜中出現外邦人ê名字，就bē-sái作祭司。猶太人看輕撒瑪利亞人ê原因mā tī chia，因為撒瑪利亞人是猶太人kap外邦人thàu-lām ê後代。

當一個血統屬tī利未支派ê人當祭司了後，伊必須tī聖殿中侍奉上主，tī上主面前為民眾ê罪代求，siāng時mā替上主祝福民眾。


先知

祭司、先知、君主這三種人，先知siōng重要，先知是hō͘上帝呼召而且成做替上帝講話ê人。所以，中文翻Nabi chit字為「先知」是無妥當ê，chit-ê譯名容易hō͘人誤解作講預言ê人才是先知。事實上，先知siōng重要ê職責是教示伊ê時代ê人。

以色列史上，先知大活動ê時間tùi撒母耳開始。使徒行傳三章二十四節，彼得講：「從撒母耳到以後，所有傳信息ê先知，攏有講起chiah ê日子。」雖然tī伊以前mā有先知ê活動。

先知有真假。真先知就是真正hō͘上主呼召ê人，in敢tī in ê時代，就是忤逆皇帝mā照實講話，像先知拿單直接指出大衛王犯了姦淫罪。但假先知無上主ê呼召，in單單借上主ê名義向民眾發言。Mā有一kóa人本來是真先知，但後來貪愛錢財，專門替皇帝講好聽話，所以am-khàm良心tī民眾面前講白賊話。分別真假先知ê方法之一就是咱thang看in是m̄是致意tī，是m̄是致意tī正義、真裡等等。

以上對祭司、先知職責ê說明，咱發現chit兩種人ê職責今á日lóng落到牧師ê身上。一位牧師必須kap祭司相像替眾人ê罪代求，並代上帝祝福大家。siāng時，伊mā需要親像先知，tī伊居起ê時代，用愛心講誠實話。