《Tui3台語開始》

 | | | 轉寄

聖經百科全書─士師、主禱文

作者 張德麟 2008.09.07

士師

士師是指約書亞死後，掃羅iáu bōe受封作王以前，chit段時chūn hō͘上帝特別揀召為拯救以色列人ê英雄人物。希伯來文士師ê原意是審判者，士師有時確實處理民間ê訴訟。但是士師siōng主要ê任務是解救。當以色列人互對敵苦楚ê時，士師拯救in並且治理in。

當以色列人做了上帝眼中看做báu ê代誌了後，上帝就向in大大受氣，將in交hō͘ in ê對敵。以色列人tī in對敵ê手食了一切ê苦了後就向上帝呼籲，求上帝幫助in。上帝就tī chit-ê時差派士師拯救in。士師記中記載了十二位士師，所以咱知影士師記中記載了十二擺以色列人背逆後koh求助上主ê故事。

Tī十二位士師中，主日學學生比較khah熟ê是參孫ê故事。士師記講伊ê頭毛是伊氣力ê來源。後來參孫貪愛女色，頭毛hō͘人偷偷ka掉，所以失去氣力，後來參孫tī上帝面前懺悔，上帝就koh hō͘伊能力。另外，iáu有一位士師mā真特別，士師記三章三一節記有一位士師，名叫珊迦，伊是亞拿 ê kiáⁿ兒，亞拿是迦南人ê神，所以珊迦chit-ê士師是「外邦人」。

主禱文

真chē教會tī主日崇拜時ài唸「主禱文」。主禱文是主耶穌親自教示咱ê祈禱，天主教稱伊做「天主經」。

Chit段經文分別記tī馬太福音六章九到十三節kap路加福音十一章二到四節。假使你現在掀開中文和合本聖經詳細比較一下，你會發現馬太福音ê形式khah長。有一kóa學者kā咱講，這是因為馬太福音是寫hō͘猶太人看ê，猶太人習慣「七」ê數目，所以馬太福音ê作者就kā祈禱ê形式整理做七種。所以馬太福音ê主禱文就看起來khah長、khah整齊lah。

馬太福音所記ê七項祈求中，前三項ê祈求kap上帝、上帝ê榮光有關。續落來ê三是則kap咱ê需要有關。這就是講，tāi先咱ài kā siōng崇高ê地位獻hō͘上帝。然後咱chiah ē-tàng提出家己ê願望。換一句話講，當人將特殊ê地位hō͘上帝了後，萬物chiah ē-tàng有適當ê地位。

教父特土良講主禱文是全部福音ê總綱，chit句話講了真好，因為咱發現，「祢ê國臨到」chit種ê話，tio̍h是福音ê中心。