《現代台語新約聖經 讀經日記》

 | | | 轉寄

第九篇 是“kang”，呣是“kang-chok”

作者 李南衡 2013.01.06

　 讀經版本：羅馬字版《現代台語譯本新約聖經》，2007，台北：台灣聖經公會
進　　度：使徒行傳第十三章

第2節尾句：“Tio̍h ūi-tio̍h góa chí-phài Pa-ná-pa kap Sò-lô khì chòe Góa ho͘-tiàu in chòe ê kang-chok.”25節頭一句：“Iok-hān teh beh kiat-sok i ê kang-chok ê sî, ” Chit兩個所在寫作“kang-chok”是錯誤的，因為“kang-chok”佇台語是動詞，chit兩個所在應該是名詞，正確的寫法是“kang”。mā會使講另外一個名詞「工課」“khang-khòe”。是按怎會佇chia發生chit種錯誤？可能是因為佇華語中，「工作」會使作名語使用mā會使作動詞使用。

第7節：“I kap chóng-tok Sū-kiû Pó-lô ū kau-pôe, chit-ê chóng-tok sī hiân-bêng ê lâng, i chhiáⁿ Pa-na-pa kap Sò-lô lâi, beh tùi in thiaⁿ Siōng-tè ê tō.”Chit節聖經有一位o-ló有一位嫌。o-ló的是“kau-pôe”chit-ê詞，巴克禮譯作“saⁿ-kap tiàm”、紅皮譯作「隨員」（事實上並呣是）、現代中文譯作「頗有交情」算是譯了足好ah、和合本譯作「同在」（kap巴克禮仝款，呣知啥意思！）、日文聖書譯了mā誠好：「と交際していた」。阮認為“kau-pôe”譯了上súi-khùi！o-ló了，咱會使小嫌一下：“beh tùi in thiaⁿ Siōng-tè ê tō.”若改作：“beh thiaⁿ in kóng Siōng-tè ê tō.”敢呣是加真清楚？

第19節後半句：“chiong hit-ê thó͘-tōe hō͘ in chòe sán-gia̍p,”第32節：“Goán chiong Siōng-tè èng-ún hō͘ chó͘-sian ê hok-im thoân hō͘ lín.”第34節後半：“Góa beh chiong tùi Tāi-pit só͘ èng-ún hit-ê sîn-sèng khó-khò ê un-tián sù hō͘ lín.”第47節後半：“Góa í-keng chí-tēng lí chòe Gōa-pang-lâng ê kng, thang hō͘ lí chiong góa ê chin-kiù tòa kàu thiⁿ-piⁿ hái-kak.” 第50節尾句：“chiong in kóaⁿ chhut-kéng.”阮感覺真奇怪，是按怎會直直用chit字“chiong”（漢字寫作「將」）？照阮所知，佇台語中「將」字khah濟是用佇俗語話，意思是「用來作‧‧‧」像講「將錯就錯」、「將功補罪」、「將心比心」，其他用法是「將近」、「將來」、「將就」等等，真少人會親像頂面五節經文的用法。可能khah濟人會用“kā”字、khah少人用“chiong”字。若kā頂面五節經文的“chiong”字改換作“kā”：第19節後半句變作：“kā hit-ê thó͘-tōe hō͘ in chòe sán-gia̍p,”第32節變作：“Goán kā Siōng-tè èng-ún hō͘ chó͘-sian ê hok-im thoân hō͘ lín.”第34節後半變作：“Góa beh kā tùi Tāi-pit só͘ èng-ún hit-ê sîn-sèng khó-khò ê un-tián sù hō͘ lín.”第47節後半：“Góa í-keng chí-tēng lí chòe Gōa-pang-lâng ê kng, thang hō͘ lí kā góa ê chin-kiù tòa kàu thiⁿ-piⁿ hái-kak.”第50節尾句變作：“kā in kóaⁿ chhut-kéng.”按呢讀起來敢呣是khah順？

第41節：Biáu-sī Siōng-tè ê lâng ah, tio̍h khòaⁿ, tio̍h kiaⁿ, tio̍h bia̍t-bông! ” 紅皮譯作：「gâu藐視人ê」、巴克禮譯作：「藐視ê人ah」（呣知藐視啥？）、現代中文譯作：「藐視上帝的人哪」、RSV譯作：“yo͘ scoffers,”（mā呣知藐視啥？）、聖經新譯本（註１）譯作：「傲慢的人哪！」、日文聖書譯作：「侮る者よ、」。干單現代台語kap現代中文兩種版本譯作“Biáu-sī Siōng-tè ê lâng” 「藐視上帝的人哪」。讀歸晡煞花去，到底是藐視上帝抑是藐視人？抑是干單beh講是「傲慢」niā-niā？ 註解：註１《聖經新譯本》（神字版），2002年，香港，環球聖經公會出版。