《現代台語新約聖經 讀經日記》

 | | | 轉寄

第四篇 「按手」是讀作“hōaⁿ-chhiú”á是“àn-chhiú”？

作者 李南衡 2012.01.01

讀經版本：羅馬字版《現代台語譯本新約聖經》，2007，台北：台灣聖經公會
進　　度：使徒行傳第六章

第六章第6節：“In hō͘ chiah-ê lâng khiā tī sù-tô͘ bīn-chêng, sù-tô͘ chiū ūi-tio̍h in kî-tó, kā in àn-chhiú.”《巴克禮版》是按呢譯：“hō͘ in khiā tī sù-tô͘ ê bīn-chêng; chiū kî-tó, kā in hōaⁿ chhiú.”《紅皮》譯作：“In hō͘ chit chhit ê lâng khiā tòa Sù-tô͘ ê bīn-chêng, Sù-tô͘ chiū kî-tó, iā kā in àn-chhiú.”一個譯作“hōaⁿ-chhiú”兩個譯作“àn-chhiú”到底tó一個才tio̍h？我想，應該是攏無m̄-tio̍h。

　　中文《聖經啟導本》(1542頁)註解講：按手：有時kah祈禱配合；有時是醫病，分賜聖靈，á是分派特別職事ê表示。照《聖經啟導本》所提示ê經文，咱每項theh一節《巴克禮版》hō͘ 逐個參考。1. 配合祈禱，馬太十九：13：“Hit sî ū lâng chhōa sòe-kiáⁿ chiū-kūn I, ài I ēng chhiú hōaⁿ in, lâi kî-tó; ha̍k-seng chek-pī in.” 2. 醫病，馬可五：23：“chhiat-chhiat kiû I kóng, Góa sòe-hàn ê cha-bó͘-kiáⁿ chha-put-to beh sí; chhiáⁿ lí lâi ēng chhiú hōaⁿ i, hō͘ i tit-tio̍h kiù lâi oa̍h.” 3. 分賜聖靈，使徒八：17：“Tùi án-ni kā in hōaⁿ chhiú, in chiū siū Sèng Sîn .” 4. 分派特別職事，提前四：14：“Lí sim-lāi ê un-sù, tùi sian-ti ê ōe kap tiúⁿ-ló-hōe hōaⁿ chhiú lâi hō͘ lí ê, lí m̄ thang hut-lio̍k.”　　

　　咱若看漢字版台語聖經á是華語中文聖經（和合本á是現代中文譯本），攏無問題。但是咱是看台語聖經讀出聲，就會有問題。無管咱讀“hōaⁿ-chhiú”á是“àn-chhiú”人攏應該聽有。不過chit本《現代台語聖經》有小可問題。

　　阮發現chit本《現代台語聖經》佇使徒行傳第六章第6節，阮一開始theh出來作例hit節經文之前，攏譯作“hōaⁿ-chhiú”，之後攏譯作“àn-chhiú”。少等咧，之後佇使徒行傳第二八章第8節猶koh出現一遍“hōaⁿ-chhiú”。阮m̄是beh論斷到底是“hōaⁿ-chhiú”á是“àn-chhiú” khah好。阮只是建議仝一本聖經譯本，上好是前後攏使用仝一個譯詞，beh“hōaⁿ-chhiú”就“hōaⁿ”透底，mài“hōaⁿ” “hōaⁿ”一下才koh改作“àn-chhiú”，按呢會hō͘讀者感覺怪怪、誤會是兩項代誌。希望再版ê時會tàng注意chit點。

第六章第11節後半：“Goán bat thiaⁿ tio̍h i húi-pòng Mô-se kap Siōng-tè ê ōe.”咱看《巴克禮版》譯作：“Goán bat thiaⁿ-kìⁿ i kóng pòng-to̍k Mô͘-se kap Siōng-tè ê ōe.”《巴克禮版》（台語漢字本）pòng-to̍k譯作「謗瀆」。《和合本》（華文）譯作：「我們聽見他說謗讟摩西和　神的話。」《聖經現代中文譯本》修訂版（華文）譯作：「我們聽見這人說了毀謗摩西和褻瀆上帝的話。」雖然“húi-pòng”kah “pòng-to̍k”仝款意思，總是因為咱台灣刑法中ê「誹謗罪」是對人，「褻瀆祀典罪」是對神，所以阮會想講對摩西（人）用「誹謗」無m̄-tio̍h，但是對上帝ê話是m̄是用「褻瀆」khah適合？阮認為《現代中文》譯了上好。所以chit節經文是m̄是譯作“Goán bat thiāⁿ tio̍h i húi-pòng Mô͘-se kap siat-to̍k Siōng-tè ê ōe.”khah好？

註解：
註1. 《聖經現代中文譯本》修訂版，1995年，香港聖經公會出版。以下簡稱《現代中文》。