《現代台語新約聖經 讀經日記》

 | | | 轉寄

讀經筆記14 中間人敢是台語？

作者 李南衡 2015.06.07

讀經筆記14 中間人敢是台語？
讀經版本：羅馬字版《現代台語譯本新約聖經》，2007，台北：台灣聖經公會
進　　度：希伯來書第九章

第7節中句：“m̄-ku ta̍k nî chí-ū chit-piàn, ta̍k piàn tio̍h tòa huih ji̍p-khì,”第12節：“In chí-ū chit pian chìn-jip Chì-sèng-só͘, ”第25節“chit piàn koh chit piàn”第26節mā sī講“chit piàn koh chit piàn”Khah奇怪的是第27節忽然間變作：“Chiàu só͘ chù-tiāⁿ, lâng tio̍h chit-pái sí,”那會變“chit-pái”？咱看其他台語聖經版本，Chit幾個所在攏使用“chi̍t pái”。阮m̄是beh評論“chit piàn”抑是“chit pái”khah好？阮是講若beh用“chit piàn”上好是攏總用“chit piàn”，若beh用“chit pái”攏總用“chit pái”。另外，第27節“lâng tio̍h chit-pái sí,”雖然《巴克禮》mā是按呢譯，總是感覺猶原《紅皮》譯作「Ta̍k人攏tio̍h死一pái」抑是《全民》譯作「人lóng tio̍h死一pái」讀tio̍h khah順。

第10節尾句：“sī sio̍k gōa-piáu ê kui-lē, chí-ū sek-iōng kàu Siōng-tè keng-sin bān-mih ê sî.”“keng-sin bān-mih ê sî.”是啥意思？漢字：「更新萬物的時。」那會用「更新」咧？別的版本按怎譯？《巴克禮》：「設立來thèng候改正的時。」；《紅皮》：「干單適用到上主將一切改革的時為止。」；《和合本》：「命定到振興的時候為止。」“BBE”：“ till the time comes when things will be put right.”　《全民》：「這kan-taⁿ適用到上主完成一切ê改革為止。」「更新」敢有啥特別的涵意？ 第15節：“Ki-tok chòe sin ê iok ê toing-kan-jîn,”咱看《巴克禮》、《紅皮》、《全民》、《和合本》攏譯作“tiong-pó”漢字寫作「中保」。真濟種台語字典辭典攏有收「中保」chit-ê詞，干單《台灣話大詞典》有收「中間人」註音“toing-kan-lâng”意思是「中人」。《李氏台語辭典》（註1，以下簡稱《李氏》）所收的「中保」華語解釋有兩個意思：一個是「在買賣或借貸方面的中間保證人。」第二個是「在宗教方面所謂神人間救續的保證人（贖罪的羔羊）。」有夠清楚，而且大部分的基督徒攏瞭解「中保」的意思，那會來chit-ê怪怪的“toing-kan-jîn”咧？查看《現代中文》譯作「中間人」。Hō͘阮感覺足奇怪的是chit本《現代台語聖經》真濟用詞用字借用《現代中文》譯本。In敢無考慮真濟華語用詞並m̄是台語？

第24節中段：“che put-kò sī chin Sèng-só͘ ê hù-pún,”漢語上權威的《漢語大辭典》用漢語解釋講：「副本是著作、書籍或文件正本以外的複製品。」《台灣話大詞典解釋講：「副本是圖書文件的預備另本，與正本內容完全相同。」《李氏》解釋講：「副本是與原本（版）同樣的抄本或影印本。」攏是講「著作、圖書、文件」的複製品。“Sèng-só͘”「聖所」並m̄是著作、圖書、文件，講“hù-pún”「副本」敢會通？咱看別種版本按怎翻譯：《巴克禮》：「做真聖所ê影像ê」《紅皮》：「he不過是模仿真正ê聖殿而已。」《全民》：「人ê手模仿真聖所所造ê聖所。」《和合本》：「（這不過是真聖所的影像）」《現代中文》：「那不過是真的聖所的副本。」真可惜，koh一個借用《現代中文》所犯錯誤的例。

註解：
註1 ：《李氏台語辭典》，著者李春祥，2001年，台北。以下簡稱《李氏》。