《陳雷文選》

 | | | 轉寄

為啥物háu a？霧社

作者 陳雷 2007.07.29

(1)

湯銀花9歲hit年，生作kap伊老母9歲ê時仝款，sán-sán thiu-thiu，足gâu走pio。10月27日hit工，老母第一擺chhōa伊去社外hit個墓á埔，óa tī東旁ê山phiâⁿ，頭前一chōa lò-lò長淺行ê山谷，無發樹á，全是一人koân ê長草，一大片thàng去到山腳ê溪頭。攏總無幾個墓，mā無墓牌，kan-na óa內底hit個有一枝koân-koân直直，koh是烏石á磨金金刻ê。

達雅牽銀花ê手去摸hit枝烏石á ê墓牌，嘴念：“阮為你háu，m̄-kú你無悲傷流目屎。”銀花也tòe 伊念。了後，山尖ê日頭ùi後山出來，照著土腳頂ê白霧，若像有人伸一枝長手，kā khàm tī山谷ê大領báng-tà掀起來，一時規枝山光iàⁿ-iàⁿ青piàng-piàng。已經7冬a，ta̍k冬這日伊攏來chia，摸這tè烏石á刻ê墓牌，念這句話，tō是馬太福音內底也有按呢寫。這日，頭一擺chhōa銀花來，也教伊念，因為銀花已經9歲a，kap伊hit一年平大漢。

“咱為啥物為伊háu?”銀花問。達雅chhōa伊轉去厝，kā伊講：“因為伊叫作賓踏。”“伊是啥人？”“Tō是我ê阿母。”The̍h一張有印súi字ê紙hō͘銀花看。銀花m̄ bat字，問：“Che是啥？”達雅坐ku t„土腳，講昭和5年霧社公學校運動會ê代誌。這時，霧社ê母á kiáⁿ攏猶講in泰雅ê話，he聲音kē-kē若手teh 拍戰鼓，若山水sù-sù流…。“Hit陣我kap你仝款，足gâu走pio。…”這日，銀花mā háu，為伊ê阿媽悲傷流目屎。

美鳳9歲hit年，仁愛鄉仁愛國小ê老師chhōa in去拜鄉裡一個新起ê大墓，規個白石á thia̍p ê，墓牌有刻大字：“莫那魯道烈士之墓”。墓頭前有幾lōa chàn ê gîm-kîⁿ，上頭前一個三節ê大門thiāu，頂面又koh刻大字：“碧血英風”。老師kā in講，日本人kā莫那魯道烈士ê骨頭khǹg tī台灣大學醫學院43冬，hō͘人作解剖實習。Chit-má政府特別kā伊sóa轉來霧社，koh起chiah大個墓hō͘伊。美鳳轉來kā老母講，莫那魯道是中華民族ê英雄，伊有thâi死真chē日本人。

銀花the̍h一張有印súi字ê紙hō͘查某kiáⁿ美鳳看，嘴念：“咱為伊háu，m̄-kú伊無悲傷流目屎。” Hit時，霧社ê gín-á已經攏bē曉聽in泰雅ê話，像拍戰鼓ê聲，若山水sù-sù流…。美鳳聽無老母ê話，銀花用中國話koh念一遍。美鳳看he紙，日本字讀無，問老母：“咱為啥物為伊háu ？”老母應：“因為伊上蓋勇敢。”“伊是啥人？”“伊是我ê阿媽。”

美鳳真歡喜，the̍h hit張有印súi字ê紙去學校展phóng，kā老師講：“伊上蓋勇敢，伊是民族英雄。”老師看hit張紙，日本字讀無。去請教蔡旺老師。蔡老師是咱霧社ê人，bat讀過日本冊。才知影是昭和5年能高郡郡守發hō͘佐塚淳子ê感謝狀。因為霧社事件ê時，佐塚淳子有救2個日本gín-á。老師問：“這個佐塚淳子是啥人？”美鳳講：“我ê阿母講，tō是伊ê阿媽。伊上蓋勇敢。”老師問：“伊是日本人？”美鳳應：“ M̄是。伊ê名叫作賓踏 。”老師驚一tiô，受氣t„ 規班同學ê面前大聲罵伊：“為啥物無像莫那魯道thâi日本人！？為啥物koh救日本gín-á?！”罵伊無廉恥、民族敗類。Kā hit張感謝狀沒收，the̍h去交校長。

(2)

達雅tú好去tī便所放尿，雄雄聽著運動埕hè-hè叫ê聲，叫是運動會已經開始，緊ùi便所出來。Kā看，規個運動埕ká-ká滾，一 大陣查甫人thǹg-pak-theh，hâ頭巾，gia̍h刀gia̍h鎗四界chông，若像teh趕雞á，夭壽oh，hì-hè叫teh thâi人。達雅驚，oa̍t轉來便所bih，也想beh走。看著另外二個查某gín-á，kap伊平平大漢，穿真súi ê日本衫，ku tī土腳phi̍h-phi̍h-chhoah 。順續一手牽一個，giú leh tō lōng。達雅路熟，chhōa in入去樹林內bih。等到足久無聲a，才bi出來小路，ná行ná走。M̄知走外久，日頭當me̍h，hit二個穿日本衫ê查某gín-á走bē行，tun tī路旁háu｡這時路hit頭一個查某人āiⁿ一梱柴行來，達雅hoah：“In teh thâi人！In teh thâi人！”Hit個查某十八、九歲，ka短頭毛，thǹg赤腳，穿一領破破破ê布衫，驚一大tiô,才知影公學校內出大代誌，teh thâi日本人。趕緊kā hit二個查某gín-á ê súi衫thǹg掉，頭鬃phián hō͘散iā-iā，me土砂粉抹面kō身軀。Kā三個gín-á chhōa轉來社裡bih 。

10月27日hit日，馬赫坡社頭目莫那盧魯道chhōa頭，ham八社ê三百個戰士攻擊霧社公學校kap駐在所。攏總thâi死一百外個日本人，能高郡郡守kap霧社分室主任在內。走去校長宿舍bih ê婦仁人kap gín-á全部thâi死。有二個thâi無死，藏tī一堆身屍內底，三日後才走出來。佐塚和子kap近藤春子因為tú好tī便所放尿，tòe達雅走有lī。半路遇著馬希巴托翁社ê少年查某賓踏，kā in救轉去社--裡，化裝作社裡ê查某gín-á藏起來，結局也無死。

經過beh二個月，霧社戰事差不多結束，thâi chhun ê八社ê人bih tī山洞內，日本兵拍bē著，放毒瓦斯攻擊。結果參加戰事ê八社，查甫查某、大人gín-á戰死、燒死、自殺ê攏總有六百外人。達雅ê pē母kap二個阿姊，in是塔羅灣社ê人，mā tī山洞內吊tāu自殺，一家chhun達雅一個。不而過，到大漢達雅攏m̄知影，in tau規家人是按怎無去ê。

事件了後三個月，代誌定著落來。賓踏chhōa佐塚和子kap近藤春子去霧社分室，kā in交hō͘巡查。調查起來，知影這二個gín-á ê pē母tī運動會hit日hō͘泰雅ê戰士thâi死，變作孤兒。日本人感謝賓踏救這二個日本gín-á，能高郡郡守代表政府，發一張印súi字ê感謝狀hō͘賓踏，koh用gín-á pē母ê姓佐塚hō͘伊，kā伊改名作佐塚淳子。

賓踏chhōa達雅大漢，kā這個孤兒khioh作家己ê查某kiáⁿ。尾a，日本人kā八社thâi chhun ê人全部sóa去北港溪頭óa khah山腳ê所在，tō是chit-má仁愛鄉互助村hia。原來ê霧社叫無參加事件ê泰雅人搬入去tòa,也tō是chit-má ê仁愛鄉霧社。

10冬後，昭和15年ê腳tau，賓踏過身。Hit時大東亞戰爭已經3年。日本人猶會記得霧社事件ê時，馬希托巴翁社泰雅人賓踏救日本gín-á ê代誌。特別為伊tâi tī社外東旁青翠ê蕃草嶺hia，koh作一su彩色有印súi花ê和服hō͘伊穿，chhāi一枝烏石á磨金ê墓牌，刻佐塚淳子ê名。

(3)

仁愛國小ê校長the̍h著hit張印日本字ê感謝狀，驚出代誌，家己m̄敢處理，交去hō͘仁愛鄉派出所。派出所叫湯銀花去問。銀花講賓踏tī霧社事件時ê代誌。警察問：“墓tī tó位？”銀花chhōa警察去蕃草嶺ê墓á埔。警察一看是日本字、日本名ê墓牌、受氣罵伊：“真他媽的！不知廉恥！” 叫村裡ê人giâ槓槌á來hám，mau-mau作四koe̍h。Hit張感謝狀沒收，折kah碎碎，cho̍h tòa屎ha̍k á裡。

1999年9月大地動，蕃草嶺山崩，墓á埔規遍tâi無看去。不而過hit個以後，hit tah原在kāu霧，若等一時a山尖ê日頭ùi後山出來，照著土腳，tō親像有人伸一枝大手，tiām-tiām-á kā這領大領báng-tà掀起來，茫霧散去。Tō看會出規個新翻ê山phiâⁿ若臭頭光光禿禿，連hit chōa lò-lò長淺行ê山谷，mā hō͘崩落來ê爛土砂石thūn kah tīⁿ-tīⁿ ah。Hit個以後，霧社ê人時常有人念，阮為伊háu ，m̄-kú伊無悲傷流目屎。