《陳雷文選》

 | | | 轉寄

生kiáⁿ發pōng

作者 陳雷 2007.05.27

林美娘以前對龍無啥認識。有身了後，親身經驗，才知影龍ê厲害。本來田庄人顧三頓上要緊，ná有êng工去計較che有若無ê物件？嫁來張家了後，in張家tī台中有一間大厝，tī大雅有一個大墓。Che大厝kap大墓靠風水teh運轉，龍ê大誌就是按hia來。

M̄-koh張家tī這方面上有研究ê猶是美娘ê ta家張李氏枝，並m̄是學歷ê關係。李氏雖然無讀冊，m̄-koh伊有bat一位風水師父，自來深交，chē少有kā伊指點兼引示。這位師父眼看虛無界，手算渺茫事，嘴講了然語，心想金銀事，人叫伊作真眼大師。可惜十全功夫欠一點，作人有一個愛錢癖。替人看風水作好事，若是紅包包無夠，伊就chhìn-chhái kā你看，兔穴貓穴烏白報，he你就淒慘食力幾lōa代。風水這款事ná會hō͘你滾笑得？

美娘ê ta官khioh金hit chām，師父tī大雅點指著一個好位。後面一條溝，頭前一phō竹，講是龍tòa ê所在。李氏枝hō͘師父一點開，lú看lú有影。明明土腳平平，看作一窟深深，臭溝á有龍teh siû水。包一包紅包謝師父，師父嘴講m̄免，心內想，咱法術界人士，靠這枝嘴食飯，收人chiah chē錢，無加講幾句好話mā pháiⁿ勢。Ká李氏枝講：「我實在kā你講，這句話你m̄通講hō͘別人知。這穴是百年穴，teh beh成果。我看恁張家無lōa久就會生龍子，龍穴添龍，一定發pōng大趁錢！」

Tú好hit年龍年李氏chhōa新婦。這新婦林美娘田庄人好性格，ta̍k項代誌順人意，bē kap人計較。有身了後，ta家chhōa新婦去看邱婦產科，問醫生：「是查甫抑是查某？」醫生hip超音波，the̍h相片hō͘伊看，這嬰á有一枝té-té ê，正正是查甫。

李氏枝心內想，師父比醫生khah高明，免照就知。掠一隻chhio雞kap一打雞卵去謝師父，kā師父講：「Hō͘你講kap準準。阮新婦beh生後生。」

The̍h相片hō͘師父看：「你看這嬰á，醫生講，chia這枝té-té ê tō是查甫ê。」

師父問伊：「Tâng時beh生？」

李氏枝講：「醫生算是二月十四。」

師父聽了面變色，搖頭講：「今年生龍，龍穴添龍，大發pōng。明年生蛇，龍穴生蛇，m̄是好事！」

李氏枝問：「怎樣m̄好？」

師父m̄講，伸手桌頂摸一粒生雞卵來手裡，tiām-tiām出一個力，雞卵tēⁿ破去。手拍開，攏是膏膏粘粘ê卵仁kap卵清，流kah一四界，嘴講：「破穴！…破穴！」頭一直hiàⁿ，差一sut á beh昏去，到chia來，李氏枝才知影che事ê嚴重，穴破去kap kòng破雞卵相像，膏膏粘粘ê好物流了了，了大錢，bē發pōng!原來這風水kap雞卵仝款，攏是會kòng破ê物件。著急問師父：「Taⁿ beh按怎好？Gín-á已經有a，koh是查甫ê，敢會使講m̄生？」

師父講：「你m̄免煩惱。Chit má醫學chiah發達，tâng時beh生kù chāi咱。我kā你kéng一個好時好日，破pak生。Bē痛bē艱苦，比雞母生雞卵khah快活。」

李氏枝想，這師父講了有理，難得連醫學也bat！師父the̍h一本開字天書出來算，一算「十二月十二子時上大好。」

李氏枝去chhōe邱婦產科，講in新婦beh破pak生。邱婦產科講：「破pak tō m̄是破西瓜，hoah破就破？大人gín-á攏好好，按怎beh破pak生？…he嬰á早兩個月出世，早產ê問題…」m̄肯答應。

李氏枝無法度，去拜託鄭婦產科。這位鄭婦產科m̄知是tó一間學校畢業ê,開業幾年無生理。伊講：「He邱先生古頭腦！破pak生像雞母生雞卵，bē痛bē艱苦。大人快活，gín-á上安全。Chit-má大家上時行，會曉ê攏mā beh破pak生。Nā是嬰á早產出來，khǹg落自動保溫箱，beh燒beh冷kù chāi咱調節，比tī老母pak肚內khah爽，ná有啥問題？」

林美娘驚開刀，kā翁講伊m̄ 破pak生，伊beh家己生。In翁去kap老母參詳：「美娘少年勇勇，家己生敢m̄好？」老母罵伊：「聽聽he草地人講話無智識，講著開刀像beh hō͘人割肉。…醫生講，chit-má市內人攏時行破pak生…下底m̄免ka，m̄免thīⁿ，無像古早生kah活beh艱苦死。」

真實十二月十二準子時開刀，全身麻醉，破pak生產。He嬰á好好tī老母pak肚內，早產出世，soah bē曉háu，身軀反烏綠，救真久才救活起來。結果腦部受損害，變做永久性腦麻痺白痴。飼到歲外猶bē坐bē爬，身軀nńg kô-kô像無骨ê。規日目睭仁kô-kô-liàn，嘴開開，舌吐吐，m̄知是beh食抑是beh放。做老母ê時常半暝起來io嬰á，抱嬰á金金看，目屎流…，beh知hit時家己生，…。

李氏枝因為嬰á白痴無正常，無啥愛óa去看。尤其是想起師父講過發pōng ê事，罵嬰á tú數：「你這個查某chi á，明明生來beh破格！」有時the̍h超音波相片出來看khah真leh，去厝邊tâu，現現有一枝té-té tī hia，按怎生出來就無去？…難免怨嘆命運bái,因為師父有明講，無hit枝就bē發pōng。

佳哉後來師父有吩咐：「下擺beh有gín-á先來算日，查甫ê包你生。」李氏枝心情安定落來，心內有長景ê光明，堅持生一個kiáⁿ發pōng ê希望，下擺龍年才koh生。