《陳雷文選》

 | | | 轉寄

白菜博士

作者 陳雷 2007.05.13

作sit人陳桔過身hit日，厝邊ê人kap桔嫂真傷心。離in厝khah hn̄g ê所在，親像新化菜市á內ê人，也有淡薄幾分ê傷悲，m̄-koh主要是無彩、可惜ê心情，好比罕罕一時，in新化社會上失去了一位偉大ê發明家，出色ê貢獻者。尤其是陳桔這款人，青暝牛無讀冊，完全靠伊ê辛勞kap智慧，發明這種差不多十全ê白菜，ná有輸讀大冊ê大學生？所以tī台南縣農會菜類競賽，連續兩年冠軍兼一屆特別獎以後，人就尊稱伊作白菜博士，伊ê白菜叫作博士白菜。

Che博士白菜m̄是咱替伊pûn雞kui，實在是人súi嫁妝chē，beh嫌chhōe無話。大欉koh幼、好看koh好食，白ê所在就是白，綠ê所在就是翠。若是洗清氣排tī菜籃內，親像是玉á刻ê排tī博物館內面hit款，人看人愛。尤其是農會tio̍h獎了後，價數比人khah貴，mā是大家相爭買。

有人看陳桔thān錢，就來學伊種菜ê方法。仝款翻土iā肥，ak水除草，就是種bē出hit種白菜。可惜陳桔有hit款ê錢，無hit款ê命，無外久就來破病。醫生診斷是肝癌，三個月後，倒leh peh bē起來。陳桔病了食力，倒tī眠床想，不如kā這個方法傳hō͘我ê查某kiáⁿ。叫kiáⁿ婿來，眠床邊兩kha塑膠桶比hō͘看，ná講ná喘：「一份che，兩份he，lām作伙iā落去…。水a kā he桶拍開，一桶白菜子，一桶好年冬。原來博士白菜就是這款ê種法，一份che，兩份he，…。

轉去講hō͘ in某聽，in某講：「Che菜一份che，兩份he，農藥食飽飽，koh beh會食--得！？」水a講：「你看che菜連蟲tō m̄食，人ná會食得？可憐咱tia 無讀冊，m̄知che好年冬ê厲害，伊che肝病就是按chia來！」in某講：「按呢這種菜ná有彩工？」水a講：「你ná會chiah gōng? che白菜農藥食飽飽，ná有要緊？人客愛就好。咱是種來beh賣ê，m̄是種來beh食ê。」

Tō 按呢規個菜園攏改落去種白菜。一份che，兩份he，lām作伙iā落去，真實發出來攏是súi súi ê白菜。水a ê兄哥知影這項代誌，強逼水a教伊，也改落去種白菜。過來伊ê兄哥教伊ê老pē，伊ê老pē教伊ê好朋友，一人傳一個不無外久，規ê新化攏出產這款ê白菜。大家攏是種來賣，m̄是種來食ê。後來有人傳謠言，新化ê白菜無清氣，食農藥大ê。買菜ê人ná像有注意著，he賣菜ê kap種菜ê人家己攏無啥teh食菜。漸漸che白菜就無啥人beh買，主要變作大賣，出口去大都市。

後來聽講有人改進，別種菜kap蕃麥也有這款ê種法。菜市á內ê菜，soah m̄知tó一項有清氣，tó一項無清氣，買菜ê人好pháiⁿ字運靠運氣，食菜ê人目睭kheh kheh據在伊去，也有台大教授報紙頂按呢講，青菜食chē會著肝病。若是厝邊隔壁有時有人肝病死翹翹，hit幾日就會心肝膽膽，ná喉nâ ân，青菜吞bē啥會落去。

M̄-koh新化ê作sit人對陳桔原在主要是尊重ê感情。死了後時常有人講起伊，阮新化青暝牛無讀冊，實在無輸讀大冊ê大學生。